ភ្ជាប់​ទៅ​គេហទំព័រ​ទាក់ទង

អ្នក​ប្រវត្តិ​សាស្ត្រ​ចងក្រង​ប្រវត្តិ​​របាំ​ព្រះរាជ​ទ្រព្យ​ដ៏​ចំណាស់


ភ្ញៀវ​ទៅ​ទស្សនា ចង្អុល​រូប​លោក​ស្រី​ព្រឹទ្ធាចារ្យ​ អែម ធាយ ដែល​នៅ​ឆ្នាំ​នេះ លោក​យាយ​មាន​ជន្មាយុ​៨៥ឆ្នាំហើយ។ រូបថត​លោក​យាយ​អែម ធាយ ដែល​ជា​ស្នាដៃ​ថត​របស់​លោក Aray Steven ត្រូវ​បាន​ដាក់តាំង​នៅ​សារមន្ទីជាតិ​ក្នុង​ទីក្រុង​ភ្នំពេញ​នៅ​ថ្ងៃទី៦ ខែវិច្ឆិកា ឆ្នាំ២០១៥។ (ផន បុប្ផា/VOA)

វប្បធម៌​បរទេស​បានហូរ​ចូល​ប្រទេស​​កម្ពុជា​ច្រើន ​តែ​វា​មិន​អាច​អូស​ទាញ​​អារម្មណ៍​ពលរដ្ឋ​ខ្មែរ ​ឲ្យ​ឃ្លាត​ឆ្ងាយ​​ប្រពៃណី​របស់​ខ្លួន​បាន​ឡើយ​ ជាពិសេស​របាំ​ក្បាច់​ខ្មែរ​បុរាណ​ ក្នុង​នោះ​មាន​របាំ​អប្សរា​ និង​របាំ​ព្រះរាជ​ទ្រព្យ​ជា​ដើម។​​

បើ​ទោះ​បីជាវប្បធម៌​បរទេសមាន​ឥទ្ធពល​នៅក្នុង​ប្រទេស​កម្ពុជា​យ៉ាង​ណាក្តី តែវា​មិន​អាច​គ្របដណ្តប់លើ​របាំ​ព្រះ​រាជទ្រព្យ​ខ្មែរ​បាន​ឡើយ។​ ​របាំនេះ​ បាន​ទាក់ទាញចំណាប់​អារម្មណ៍​របស់​អ្នក​ប្រវត្តិ​សាស្ត្រ​អន្តរជាតិ​ ដែល​កំពុង​ចងក្រង​ឯកសារ​អំពី​របាំ​នេះ​ និង​អំពី​ប្រវត្តិ​អ្នក​របាំ​ដ៏​ចំណាស់​ម្នាក់។​

វប្បធម៌​បរទេស​បានហូរ​ចូល​ប្រទេសកម្ពុជា​ច្រើន ​តែ​វា​មិន​អាច​អូស​ទាញអារម្មណ៍​ពលរដ្ឋ​ខ្មែរ ​ឲ្យ​ឃ្លាត​ឆ្ងាយប្រពៃណី​របស់​ខ្លួន​បាន​ឡើយ​ ជាពិសេស​របាំ​ក្បាច់​ខ្មែរ​បុរាណ​ ក្នុង​នោះ​មាន​របាំ​អប្សរា​ និង​របាំ​ព្រះរាជ​ទ្រព្យ​ជា​ដើម។

អង្គការ​ Unesco​ បាន​ដាក់​របាំ​ព្រះរាជ​ទ្រព្យ​ជា​សម្បត្តិ​បេតិកភណ្ឌ​ភិភព​លោក​នៅ​ឆ្នាំ​២០០៣ ​ដោយសារ​ភាព​ទន់ភ្លន់​នៃ​ក្បាច់រាំ​របាំ​នេះ។​ ហើយ​បច្ចុប្បន្ន​នេះ​ អ្នក​ប្រវត្តិ​សាស្ត្រ​អន្តរជាតិ​កំពុងចងក្រង​ឯកសារ​អំពី​ប្រវត្តិ​របាំព្រះ​រាជទព្យ​ខ្មែរ ​ដូច្នេះ​អ្នក​របាំ​ជើងចាស់​ក៏ជា​តួអង្គ​សំខាន់​ក្នុង​ការ​ចងក្រង​នេះ​ដែរ។

លោក​ស្រី​ព្រឹទ្ធាចារ្យ​ អែម ធាយ ឈរ​នៅ​ពី​មុខ​រូបថត​របស់​លោក​យាយ ដែល​ជា​ស្នាដៃ​ថត​របស់​លោក Aray Steven ហើយ​ត្រូវ​បាន​ដាក់តាំង​នៅ​សារមន្ទីរជាតិក្នុង​ទីក្រុង​ភ្នំពេញ​នៅ​ថ្ងៃទី៦ ខែវិច្ឆិកា ឆ្នាំ២០១៥។ (ផន បុប្ផា/VOA)
លោក​ស្រី​ព្រឹទ្ធាចារ្យ​ អែម ធាយ ឈរ​នៅ​ពី​មុខ​រូបថត​របស់​លោក​យាយ ដែល​ជា​ស្នាដៃ​ថត​របស់​លោក Aray Steven ហើយ​ត្រូវ​បាន​ដាក់តាំង​នៅ​សារមន្ទីរជាតិក្នុង​ទីក្រុង​ភ្នំពេញ​នៅ​ថ្ងៃទី៦ ខែវិច្ឆិកា ឆ្នាំ២០១៥។ (ផន បុប្ផា/VOA)

លោក​យាយ​អែម ធាយ​ ជា​អ្នក​របាំ​ និងជាគ្រូ​បង្រៀន​របាំ​ព្រះរាជ្យ​ទ្រព្យ​ដែលរួច​ជីវិត​ពី​សម័យ​ខ្មែរក្រហម។​ ​លោក​យាយ​មាន​កំណើត​នៅ​ក្នុង​ព្រះ​បរមរាជ​វាំង​នៅ​ក្នុង​ទសវត្សរ៍​១៩៣០ ​នៅ​ពេល​ដែល​ឪពុក​ម្តាយ​លោក​យាយ​ធ្វើការ​នៅ​ក្នុង​ព្រះ​បរម​រាជវាំង។ ​លោក​យាយ​បាន​សម្រេច​ចិត្ត​ចាប់​យក​របាំ​ព្រះ​រាជ្យទ្រព្យ​ជា​អាជីព​តាំង​ពី​លោក​យាយ​មាន​អាយុ​តិច​ជាង​ដប់​ឆ្នាំ។​ ហើយ​ក្រោយ​មក​លោក​យាយ​បាន​បង្រៀន​របាំ​នេះ​ទៅ​ក្មេងៗ​ជំនាន់​ក្រោយ។​

ដោយ​ឃើញ​ភាព​ប៉ិន​ប្រសព្វ​របស់​លោក​យាយ​ លោក ​Arjay Stevens​ ជនជាតិ​អាល្លឺម៉ង់ ដែល​ជា​អ្នក​ថត​រូប​ បាន​ចាប់​ផ្តើម​ថត​អំពី​សកម្មភាព​ផ្សេងៗ​របស់​លោក​យាយ​ដើម្បី​ចងក្រង​ជា​សៀវភៅ​កម្រង​រូបភាព។ ​លោក​ Arjay Steven ​បាន​ចាប់​ផ្តើម​ថតរូប​លោក​យាយ​នៅ​ក្នុង​ឆ្នាំ​២០០២ ​នៅ​ទី​ក្រុង​ប៊ែកឡាំង​ ប្រទេស​អាល្លឺម៉ង់​ បន្ទាប់​ពី​លោក​បាន​ជួប​លោកយាយ​នៅ​ក្នុង​ឆ្នាំ​១៩៩៧​ ក្នុង​ប្រទេស​កម្ពុជា។

លោក​យាយធ្លាប់​ធ្វើជា​គ្រូ​នៅ​មហោស្រព​សិល្បៈ​ជាតិ​ និង​នៅ​សាកល​វិទ្យាល័យ​ភូមិន្ទ​ និង​វិចិត្រ​សិល្បៈ​ ព្រម​ទាំង​ជា​អ្នក​របាំ​បុរាណ​ចូល​និវត្តន៍ ហើយ​មាន​ប្រភព​ចេញ​ពី​ព្រះ​បរមរាជ​វាំង​ផង​ដែរ។​

សៀវភៅ​កម្រង​រូបភាព​ដែល​លោក​ Arjay Stevens ​បាន​ចំណាយ​ពេល​ចងក្រង​អស់​រយៈ​ពេលជាង​ដប់​ឆ្នាំ​ដើម្បី​រៀបរៀង​ឡើង​នោះ​ ត្រូវ​បាន​ដាក់​បង្ហាញ​កាល​ពី​ថ្ងៃ​អាទិត្យ​កន្លង​ទៅ​នេះ​នៅ​សារមន្ទីរជាតិ។ ​សៀវភៅ​កម្រង​រូបភាព​ ដែល​មាន​ជាង១០០​ទំព័រ​នេះ​ ត្រូវ​បាន​សរសេរ​ជា​ភាសា ​ខ្មែរ ​ភាសា​បារាំង​ ភាសា​អាល្លឺម៉ង់​ និង​ភាសា​អង់គ្លេស។​

លោក​ Arjay Stevens ​បាន​និយាយប្រាប់​ VOA ​អំពី​លោកយាយ​អែម ធាយ​យ៉ាង​ដូច្នេះ​ថា៖​

«ការ​រាំ​ និង​ការ​ច្រៀង​គឺ​ជា​អាយុ​ជីវិត​របស់​អ្នកគ្រូ។ ​គាត់​នៅ​តែ​ប្តេជ្ញាចិត្ត​តស៊ូ​ដើម្បី​ឲ្យសិល្បៈ​របាំ​ខ្មែរ​រស់​ឡើងវិញ​ និង​បន្ត​ដល់​ក្មេង​ជំនាន់​ក្រោយៗ​ទៀត​ ទោះ​បី​ជា​អ្នក​គ្រូ​រស់​នៅក្នុង​នាម​ជា​សិល្បករ ​ដែល​មាន​ជីវភាព​លំបាក​លំបិន​យ៉ាងណា​ក៏​ដោយ។ ​ទោះ​បី​ជា​អ្នក​គ្រូមាន​វ័យ​៨៥​ឆ្នាំ​ក៏​ដោយ​ ក៏អ្នកគ្រូ​មិន​បោះបង់​ចោល​អាជីព​នេះ​រហូត​មកដល់​សព្វ​ថ្ងៃ»។​

លោក​ ជុច ភឿន​ រដ្ឋ​លេខាធិការ​ក្រសួង​វប្បធម៌​ និង​វិចិត្រ​សិល្បៈ​ បាន​មាន​ប្រសាសន៍​ថា ​លោក​យាយ​ អែម ធាយ​ ជា​គ្រូ​របាំ​បុរាណ​ដ៏​ឆ្នើម​ដែល​បាន​ទទួល​ងារ​ជា​«មរតក​មនុស្ស​រស់»​ ដែល​ផ្តល់​ដោយ​ក្រសួង​វប្បធម៌ និង​វិចិត្រ​សិល្បៈ ​និង​អង្គការ ​UNESCO។​

លោក​បាន​មាន​ប្រសាសន៍​ថា៖​

«លោក​ស្រី​ព្រឹទ្ធាចារ្យ​ អែម ធាយ​ ដែល​ជា​គ្រូ​របាំ​បុរាណ​ដ៏​ឆ្នើម​ បាន​ទទួល​ងារ​'មរតក​មនុស្ស​រស់'​ ដែល​រដ្ឋាភិបាល​បាន​ចាត់​ទុក​ថា​ ជា​មរតក​ដ៏​កម្រ»។​

សៀវភៅ​កម្រង​រូបភាព​នេះត្រូវ​ដាក់​បង្ហាញ​នៅ​មជ្ឈមណ្ឌល​បុប្ផាណា​នៅ​ចុង​សប្តាហ៍​នេះ៕

XS
SM
MD
LG