ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ ​ហ៊ីង ប៊ុនហៀង​ ​ត្រូវ​ចាត់តាំង​ឲ្យ​ទប់ស្កាត់​និង​ដោះស្រាយ​​បណ្ដឹង​តវ៉ា​ផ្សេងៗ​នៅ​មុខ​ភូមិ​គ្រឹះ​លោក​ ​ហ៊ុន សែន


រូបឯកសារ៖ ​នាយ​​​​​​​​​​​​​​ឧត្ដមសេនីយ៍​ ​ហ៊ីង ប៊ុនហៀង​ ​​​អគ្គ​មេ​បញ្ជាការ​​​​​​​​​​​​​​​​​​​​​​​​​​​​​​រង​នៃ​កង​យោធពលខេមរភូមិន្ទ​ និង​ជា​មេ​បញ្ជាការ​នៃ​បញ្ជាការដ្ឋាន​អង្គរក្ស​របស់​​នាយក​រដ្ឋ​មន្ត្រី​កម្ពុជា​​​​​​​​​​​​លោក​ ​ហ៊ុន សែន​ ​នៅ​អាកាសយានដ្ឋានអន្តរជាតិ​ភ្នំពេញ​កាលពី​ថ្ងៃ​ទី២៧​ ខែមេសា ឆ្នាំ២០១៨។ (រូបថត Reuters)
រូបឯកសារ៖ ​នាយ​​​​​​​​​​​​​​ឧត្ដមសេនីយ៍​ ​ហ៊ីង ប៊ុនហៀង​ ​​​អគ្គ​មេ​បញ្ជាការ​​​​​​​​​​​​​​​​​​​​​​​​​​​​​​រង​នៃ​កង​យោធពលខេមរភូមិន្ទ​ និង​ជា​មេ​បញ្ជាការ​នៃ​បញ្ជាការដ្ឋាន​អង្គរក្ស​របស់​​នាយក​រដ្ឋ​មន្ត្រី​កម្ពុជា​​​​​​​​​​​​លោក​ ​ហ៊ុន សែន​ ​នៅ​អាកាសយានដ្ឋានអន្តរជាតិ​ភ្នំពេញ​កាលពី​ថ្ងៃ​ទី២៧​ ខែមេសា ឆ្នាំ២០១៨។ (រូបថត Reuters)

នាយឧត្ដមសេនីយ៍​ ​ហ៊ីង ប៊ុនហៀង​ ​អគ្គ​មេ​បញ្ជាការរង​នៃ​កង​យោធពលខេមរភូមិន្ទ​ និង​ជា​មេ​បញ្ជាការ​នៃ​បញ្ជាការដ្ឋាន​អង្គរក្ស​របស់នាយក​រដ្ឋ​មន្ត្រី​កម្ពុជាលោក​ ​ហ៊ុន សែន​ ​ត្រូវ​បាន​ចាត់​តាំង​ឲ្យ​ដឹក​នាំ​ក្រុម​ការងារ​ចម្រុះ​ ទទួលនិង​ដោះស្រាយបណ្ដឹង​តវ៉ា​ផ្សេងៗ​ ​នៅ​មុខ​ភូមិគ្រឹះ​លោក​ ​ហ៊ុន សែន​ ​និង​ភរិយា​របស់​លោកគឺ​លោក​ស្រី​ ​ប៊ុន រ៉ានី។​ ​នេះ​បើ​យោង​តាម​សេចក្ដី​សម្រេច​របស់​រដ្ឋាភិបាល​កម្ពុជា​ដែល​ត្រូវ​បាន​ផ្សព្វផ្សាយ​តាម​អង្គភាព​ព័ត៌មាន​ក្នុងស្រុក​មួយ​ដែល​ស្និទ្ធ​នឹង​រដ្ឋាភិបាល។​

ការ​បង្កើត​ក្រុមការងារ​ចម្រុះ​នេះ ធ្វើ​ឡើង​នៅ​គ្រា​មន្ត្រី​សិទ្ធិ​មនុស្ស​នៅ​តាម​បណ្ដា​ខេត្ត​មួយ​ចំនួន​ក្នុង​ប្រទេស​បាន​ឲ្យ​ដឹង​ថា​ជម្លោះ​ដីធ្លី​ជាច្រើន​ ​នៅមិនទាន់​ត្រូវ​បាន​ដោះស្រាយ​ ​ហើយ​ជម្លោះ​ខ្លះ មាន​ជាប់ពាក់​ព័ន្ធ​នឹង​ក្រុមហ៊ុន​ចិន។

សេចក្ដី​សម្រេច​របស់​លោក​ ​ហ៊ុន សែន​ ​ចុះ​ថ្ងៃ​ទី១៦​ ​ខែ​តុលា​ ឆ្នាំ២០១៨​ ​បាន​បញ្ជាក់​ថា​ ​នាយ​ឧត្ដមសេនីយ៍ ហ៊ីង ប៊ុនហៀង​ ​នឹង​ត្រូវ​ធ្វើការ​ជាមួយក្រុម​មន្ត្រី​ជាច្រើន ដែល​ភាគច្រើន​មក​ពី​កង​ទ័ព​ជាតិ​និង​កងកម្លាំង​ការពារ​លោក​ ​ហ៊ុន សែន​ ​ហើយនិងស្នង​ការ​នគរ​បាល​រាជធានី​ភ្នំពេញ​ ឧត្ដមសេនីយ៍​ឯក​ ​ស ថេត​ ​មេ​បញ្ជាការ​កងរាជអាវុធហត្ថរាជធានី​ភ្នំពេញ​ ឧត្ដមសេនីយ៍​ឯក​ រ័ត្ន ស្រ៊ាង​ ​ អភិ​បាល​រាជធានី​ភ្នំពេញ​លោក​ ​ឃួង ស្រេង​ ​អភិបាលខេត្ត​កណ្ដាល​លោក ​ម៉ៅ​ ភិរុណ ស្នងការ​នគរ​បាល​ខេត្ត​កណ្ដាល​ឧត្ដមសេនីយ៍​ទោ​ ​អ៊ាវ ចំរើន​ ​មេធាវី​ប្រចាំ​បញ្ជាការដ្ឋាន​អង្គរក្ស​លោក​ ​ ស៊ុយ ឈុនហាក់​ ​និង​មន្ត្រី​តំណាង​មក​ពី​ស្ថាប័ន​រដ្ឋ​ជាច្រើន​នាក់​ទៀត​ ​សរុប​ចំនួន​២២នាក់។​

ប្រការ២​នៃ​សេចក្ដី​សម្រេច​របស់​លោក​ហ៊ុន​ សែន​ដដែល​ បាន​ឲ្យដឹង​ទៀត​ថា ក្រុមការងារ​ចម្រុះ​ក្រោម​ការ​បញ្ជា​របស់​លោក ​ហ៊ីង ប៊ុនហៀង​ មាន​ភារកិច្ច​ទប់ស្កាត់​ ការ​ញុះញង់​ពី​ក្រុម​ឆ្លៀតឱកាស​ដែល​កេង​ចំណេញ​មក​លើ​ក្រុម​អ្នក​តវ៉ា។​

ក្រុម​ការងារ​ចម្រុះ​ដឹកនាំ​ដោយ​លោក​ ​ហ៊ីង ប៊ុនហៀង​ ​ក៏​មាន​ភារកិច្ច​ផ្សេងទៀត​ដោយ​ត្រូវ​ «សហការជាមួយ​អាជ្ញាធរ​មាន​សមត្ថកិច្ច​ ​ពាក់ព័ន្ធ​ទាំងអស់​ ទប់ស្កាត់​ក្រុម​អ្នក​តវ៉ា​មាន​បាតុករ ច្រើន​នាក់​ដែល​មាន​បំណង​មក​ដាក់​ពាក្យ​បណ្ដឹង​តវ៉ា​ផ្សេងៗ​ ជូន​លោក​ហ៊ុន​ សែន និង​ភរិយា​លោក»។

ក្រុម​ការងារ​ចម្រុះ​ខាងលើនេះ​ ក៏​នឹង​ព្យាយាម​ពន្យល់​អំពី​នីតិវិធី​ជូន​ក្រុម​អ្នក​តវ៉ា​ឲ្យ​យល់​ពី​ភារកិច្ច​របស់​ការងារ​ចម្រុះ ​និង​ច្បាប់​ជា​ធរមាន​ផ្សេងៗ​ ហើយ​ទទួលពាក្យ​បណ្ដឹង​ផ្សេងៗ​នៅ​មុខ​ភូមិ​គ្រឹះ​លោក​ ​ហ៊ុន សែន​ ​នៅ​វិមាន​ឯករាជ្យរាជធានី​ភ្នំពេញ​និង​តាខ្មៅ​ ​នៅ​ខេត្ត​កណ្ដាល​រួច​បញ្ជូន​ទៅ​ជំនាញ​ពាក់ព័ន្ធ​ ​ដើម្បី​សម្រេច ឬ​ធ្វើ​របាយការណ៍​ជូន​លោក​នាយករដ្ឋមន្ត្រី​ ​ហ៊ុន សែន។

VOA ​មិន​អាច​សុំ​ការ​អធិប្បាយ​ពី​នាយឧត្តមសេនីយ៍​ ​ហ៊ីង ប៊ុនហៀង​ ​នៅ​ថ្ងៃ​ព្រហស្បតិ៍​នេះ​បាន​ទេ ដោយលោក​បាន​លើក​ទូរស័ព្ទ​រួច​ ហើយ​ក៏​ទម្លាក់​ទៅវិញ។

លោក​ ​អំ សំអាត​ ​ប្រធាន​ការិយាល័យ​បច្ចេកទេស​ស៊ើប​អង្កេត​នៃ​អង្គការ​សិទ្ធិ​មនុស្ស​លីកាដូ​មាន​ប្រសាសន៍​ថា​រដ្ឋាភិបាល​គួរតែ​ពង្រឹង​យន្តការ​ដោះស្រាយ​បណ្ដឹង​តវ៉ា​របស់​ពលរដ្ឋ​នៅ​តាម​មូលដ្ឋាន​ជា​ជាង​ការ​បង្កើត​ក្រុមការងារ​ចម្រុះ​នេះ​ ​ដែល​លោក​នៅ​មាន​មន្ទិលពី​ប្រសិទ្ធភាព​ការងារ​ ហើយ​ក៏​បារម្ភ​អំពី​ការ​ផ្ទុះ​ហិង្សា​ ដោយសារ​សមាសភាព​ភាគ​ច្រើន​នៃ​ក្រុម​ការងារ​នេះ​គឺ​ជា​កង​កម្លាំង​ប្រដាប់​អាវុធ។​

«យើង​ឃើញ​ហើយ​នៅ​ក្នុង​អត្ថន័យ​ថា​ ទី​មួយ​ គឺ​ដើម្បី​ទទួល​ពាក្យ​បណ្តឹង​ និង​ដោះស្រាយ​ នៅ​ក្នុង​ប្រការ​ផ្សេង​ចែង​ថា​ ដើម្បី​ទប់ស្កាត់​ ជៀសវាង​កុំ​ឲ្យ​មាន​មនុស្ស​ច្រើន​ហ្នឹង​ឡើង​មក​តវ៉ា​ អានេះ​បាន​ន័យ​ថា​ម៉េច? បានន័យ​ថា​ បើ​សិន​ជា​មានការ​ទប់​ស្កាត់ មានការ​អីចឹង​ អាច​ជៀស​មិន​ផុត​ទេ​ អំពី​បញ្ហា​នៃ​ការ​បង្ក្រាប​ នៃ​ការ​ធ្វើ​ឲ្យ​មាន​បាតុភាព​កើតឡើង​ អ៊ីចឹង​ខ្ញុំ​គិត​ថា​ អា​ចំណុច​នេះ​ វា​អត់​សូវ​ល្អ​ទេ​ បើ​ជា​ចំណុច​ល្អ​គឺ​ ត្រូវតែ​ពង្រឹង​យន្តការ​នៅ​អាជ្ញាធរ​ថ្នាក់​ក្រោម​ជាតិ​ហ្នឹង​ ឲ្យ​ដោះ​ស្រាយ​ជូន​ប្រជាពលរដ្ឋ​ ឲ្យ​មាន​ប្រសិទ្ធភាព អានោះ​វា​ជា​ល្អ»។

លោក ​អំ សំអាត​ ថ្លែង​បន្ថែម​អំពី​ការ​ចាត់​តាំងកង​កម្លាំង​ប្រដាប់​អាវុធ​ឲ្យ​ចូលរួម​ជាមួយ​ក្រុមការងារ​ចម្រុះ​នេះយ៉ាង​ដូច្នេះ៖​

«បើ​យើង​មើល​ភាគច្រើន​នៅ​ក្នុង​គណៈកម្មការ​ចម្រុះ​នេះ​ ភាគច្រើន​សុទ្ធ​តែ​កងកម្លាំង​ដែល​ជា​នាយ​ឧត្ដម​សេនីយ៍​ និង​ឧត្ដមសេនីយ៍​ដែល​ជា​កងកម្លាំង​ទៅ​ទៀត​ អ៊ីចឹង​តើ​ គណៈកម្មការ​ចម្រុះ​នោះ​គោលបំណង​ដើម្បី​ដោះស្រាយ​ បញ្ហា​ជូន​ប្រ​ជា​ពលរដ្ឋ​ ឬ​ក៏​ដើម្បី​ធ្វើ​ការ​ទប់​ស្កាត់​កុំ​ឲ្យ​មាន​ការ​ឡើង​មក​តវ៉ា​ច្រើន​នោះ​បាទ»។​

ការ​ចាត់​តាំង​លោក​ ​ហ៊ីង ប៊ុនហៀង​ ​ឲ្យ​ទទួល​ភារកិច្ច​ដោះស្រាយ​ពាក្យ​បណ្ដឹង​របស់​ពលរដ្ឋ​នេះ​ កើត​មាន​ឡើង​ ​នៅ​គ្រា​នាយ​ទាហាន​ជាន់​ខ្ពស់​កម្ពុជា​រូប​នេះ​ រង​ការ​ដាក់​ទណ្ឌកម្ម​របស់​សហរដ្ឋ​អាមេរិក​ ​ដោយ​សារ​តែ​ការរំលោភ​សិទ្ធិ​មនុស្ស​ធ្ងន់ធ្ងរ​ និង​វាយប្រហារ​លើ​ជន​រង​គ្រោះ​ជាច្រើន​ក្នុង​នោះ​មាន​ពល​រដ្ឋ​អាមេរិកាំង​ម្នាក់​ផង​ដែរ។​ ​នេះ​បើ​យោង​តាម​សេចក្ដី​ប្រកាស​ព័ត៌មាន​របស់​ក្រសួង​រតនាគារ​សហរដ្ឋ​អាមេរិក​ដែល​ ​VOA​ ​ទទួល​បាន​កាល​ពីខែ​មិថុនា​ ឆ្នាំ​២០១៨។

សេចក្ដី​ប្រកាស​ព័ត៌មាន​នោះ ​បាន​បញ្ជាក់​ថា ការ​ដាក់​ទណ្ឌកម្ម​នេះ ធ្វើឡើងដោយ​ផ្អែក​លើ​ច្បាប់​សិទ្ធិ​មនុស្ស​ ​Global Magnitskyឆ្នាំ​២០១៦​ ​ដែល​អនុញ្ញាត​ឱ្យ​សហរដ្ឋ​អាមេរិក​ដាក់​ទណ្ឌកម្ម​ដោយ​បង្កក​ទ្រព្យសម្បត្តិ​ជន​ណា​ដែល​រំលោភ​សិទ្ធិមនុស្ស​ឬ​ប្រព្រឹត្ត​អំពើ​ពុករលួយ។

សេចក្តី​ប្រកាស​ដដែលបាន​ឲ្យ​ដឹងថា​ លោក​ហ៊ីង ប៊ុនហៀង​ ​និង​បញ្ជាការដ្ឋាន​អង្គរក្ស​មាន​ជាប់​ពាក់ព័ន្ធ​នឹង​ឧបទ្ទវហេតុ​ជាច្រើន​ដែល​ក្រុម​យោធា​ត្រូវ​បាន​ប្រើប្រាស់​ដើម្បី​គំរាម​កំហែង​ក្រុម​បាតុករ​និង​គណបក្ស​ប្រឆាំង​តាំង​ពីឆ្នាំ​១៩៩៧​ ​មក​ក្នុង​នោះ​មាន​ការ​គប់​គ្រាប់​បែក​ដែល​មាន​ពល​រដ្ឋ​អាមេរិកាំង​ម្នាក់​បាន​រង​របួស។

បញ្ជាការដ្ឋាន​អង្គរក្ស​របស់​លោក​នាយក​រដ្ឋ​មន្ត្រី​ ​ហ៊ុន សែន​ ​ក៏​មាន​ជាប់​ពាក់​ព័ន្ធ​នឹង​ការ​វាយ​ប្រ​ហារ​ជា​ច្រើន​លើ​ពលរដ្ឋ​កម្ពុជា​ដែល​គ្មាន​អាវុធ​ក្នុង​រយៈពេល​ជា​ច្រើន​ឆ្នាំ​មក​នេះ​ ​ក្នុង​នោះ​មាន​ការ​វាយ​ប្រហារ​កាល​ពី​ឆ្នាំ​២០១៣ ​នៅ​ក្បែរ​វត្ត​ភ្នំ​និង​ឆ្នាំ​២០១៥​នៅ​មុខ​រដ្ឋ​សភាជាតិ​កម្ពុជា។​ ​នេះ​បើ​តាម​ការ​រៀបរាប់​របស់​ក្រសួង​រតនាគារ​សហរដ្ឋ​អាមេរិក៕​

អត្ថបទ​ទាក់ទង

XS
SM
MD
LG