មន្រ្តីកំពូលសុខាភិបាលសហរដ្ឋអាមេរិកម្នាក់ កំពុងជំរុញឲ្យមនុស្សទាំងអស់ពាក់ម៉ាស់នៅពេលនៅខាងក្រៅក្នុងកន្លែងសាធារណៈដើម្បីការពារការរាលដាលនៃជំងឺកូវីដ១៩ ក៏ប៉ុន្តែលោកមិនបាននិយាយថា ជាការចាំបាច់ដែលត្រូវតែពាក់ម៉ាស់ទូទាំងប្រទេសនោះទេ។
មួយថ្ងៃបន្ទាប់ពីប្រធានាធិបតីសហរដ្ឋអាមេរិកលោក ដូណាល់ ត្រាំ បានត្រូវគេឃើញពាក់ម៉ាស់ជាលើកទី១ជាសាធារណៈ លោក Jerome Adams ប្រធានផ្នែកសុខាភិបាលសហរដ្ឋអាមេរិក បាននិយាយនៅក្នុងកម្មវិធី Face the Nation ក្នុងកម្មវិធីទូរទស្សន៍ CBS កាលពីថ្ងៃអាទិត្យថា ពលរដ្ឋ ចាំបាច់ទទួលបានការអប់រំថាតើហេតុអ្វីបានជាមានសារៈសំខាន់ដើម្បីគ្របមុខរបស់ខ្លួននោះ។
លោក Adams បាននិយាយថា៖ «ក្នុងនាមជាប្រធានផ្នែកសុខាភិបាលសហរដ្ឋអាមេរិក ខ្ញុំចង់ឲ្យប្រជាពលរដ្ឋយល់ថាតើហេតុអ្វីពួកគេគួរតែពាក់ម៉ាស់គ្រប់មុខ ហើយពួកគេនឹងទំនងធ្វើដូច្នេះកាន់តែច្រើនឡើងដោយឆន្ទៈ ហើយពួកគេនឹងទំនងធ្វើដូច្នេះកាន់តែច្រើនឡើងនៅពេលដែលយើងមិនតាមមើលដែលជាការមានសារៈសំខាន់»។
លោកវេជ្ជបណ្ឌិត Adams បាននិយាយទៀតថា រដ្ឋបាលរបស់លោកប្រធានាធិបតី ត្រាំ កំពុងខិតខំធ្វើការយ៉ាងខ្លាំងដើម្បីផ្តាស់ប្តូរសារកាលពីពេលមុនរបស់ខ្លួនដែលថា ការពាក់ម៉ាស់មិនមែនជាការចាំបាច់នោះ។
លោកប្រធានាធិបតី ត្រាំ បានត្រូវគេថតឃើញពាក់ម៉ាស់កាលពីថ្ងៃសៅរ៍សប្តាហ៍មុន ក្នុងអំឡុងនៃដំណើរទស្សនកិច្ចទៅកាន់មន្ទីរពេទ្យកងទ័ពជាតិ Walter Reed ។
លោកប្រធានាធិបតី ត្រាំ បាននិយាយថា៖ «នៅពេលដែលលោក អ្នកស្ថិតនៅក្នុងមន្ទីរពេទ្យ ខ្ញុំគិតថា វាជាបញ្ហាធំបំផុតដែលយើងត្រូវពាក់ម៉ាស់»។
វានឹងក្លាយជាការចាំបាច់ដើម្បីពាក់ម៉ាស់នៅកន្លែងសាធារណៈដោយចាប់ផ្តើមនៅថ្ងៃចន្ទនេះទៅនៅប្រទេសក្រូអាតនិងតំបន់៤ទៀតនៅក្នុងប្រទេសអេស្ប៉ាញ គឺតំបន់ Andalusia, Aragon, La Rioja និង Navarre។
ប្រទេសអេស្ប៉ាញ ជាប្រទេសមួយដែលរងផលប៉ះពាល់យ៉ាងខ្លាំងដោយមេរោគកូរ៉ូណា។ ប្រទេសនេះបានចាប់ផ្តើមបន្ធូររបន្ថយសកម្មភាពសង្គមកាលពីខែមុន៕
