កម្មករនៅរោងចក្រ HANA (Cambodia) I Inc. ក្នុងរាជធានីភ្នំពេញ នៅថ្ងៃអង្គារនេះ បានទាមទារប្រាក់ឈ្នួល និងប្រាក់អត្ថប្រយោជន៍ផ្សេងៗទៀតទៅតាមច្បាប់ការងារ ក្រោយពីពួកគេអះអាងថា រោងចក្រនេះ បានបិទទ្វារលែងដំណើរការ ហើយមិនបានបើកប្រាក់ទាំងនេះឲ្យកម្មករ។
កញ្ញា សៅ គង្គា កម្មការិនី និងជាតំណាងម្នាក់នៃក្រុមកម្មករដែលបានធ្វើការតវ៉ាទាមទារនៅមុខរោងចក្រ បានប្រាប់វីអូអេថា កញ្ញា និងកម្មករផ្សេងទៀតនៃរោងចក្រ ដែលមានកម្មករប្រមាណ៨០០នាក់នេះ ត្រូវការប្រាក់អត្ថប្រយោជន៍ទាំងនេះដើម្បីដោះស្រាយជីវភាពក្នុងអំឡុងពេលវិបត្តិកូវីដ១៩។
«ឥឡូវរោងចក្រគេបិទច្រើន ហើយពិបាករកការងារធ្វើ។ អ៊ីចឹងពេលយើងបាន(លុយនេះ) មកអាចដោះស្រាយមួយខែៗបាន។ សូម្បីខ្លួនខ្ញុំផ្ទាល់ ក៏ជំពាក់លុយអង្គការដែរ»។
លិខិតសរសេរដោយដៃរបស់ក្រុមកម្មករចុះថ្ងៃទី២៣ខែមិថុនានេះ ស្នើឲ្យសហជីព និងអ្នកពាក់ព័ន្ធជួយដោះស្រាយកង្វល់របស់កម្មករ និងឲ្យក្រុមហ៊ុនទូទាត់ប្រាក់អត្ថប្រយោជន៍ទាំងអស់ជូនពួកគេ។
ការទាមទារនេះធ្វើឡើងមួយថ្ងៃក្រោយពីសហជីព និងសហព័ន្ធការងារជាង១០ ដែលតំណាងឲ្យកម្មករនិយោជិតដែលធ្វើការងារក្នុងរោងចក្រកាត់ដេរ និងវិស័យការងារផ្សេងទៀត បានទាមទារឲ្យក្រសួងការងារ ជំរុញឲ្យថៅកែរោងចក្រ និងក្រុមហ៊ុនបើកប្រាក់អតីតភាពការងារមុនឆ្នាំ២០១៩ និងប្រាក់បំណាច់អតីតភាពការងារថ្មីឆ្នាំ២០២០ ដល់កម្មករ។
វីអូអេ មិនអាចទាក់ទងលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានទេ នៅយប់ថ្ងៃអង្គារនេះ។
កម្មកររាប់ម៉ឺននាក់ត្រូវបានព្យួរ ឬ បាត់បង់ការងារដោយសាររោងចក្រជាច្រើនបានបិទទ្វារ ឬ ផ្អាកដំណើរការ ដោយសារផលប៉ះពាល់នៃការរីករាលដាលនៃការឆ្លងជំងឺកូវីដ១៩។ នេះ បើយោងតាមក្រុមសហជីពការងារ៕
