រដ្ឋមន្ត្រីការបរទេសនៃបណ្តាប្រទេសសម្បូរប្រេងក្នុងតំបន់ឈូងសមុទ្រពែក្ស បានធ្វើដំណើរទៅដល់ទីក្រុងប៉េកាំង ប្រទេសចិន កាលពីថ្ងៃចន្ទម្សិលមិញ សម្រាប់ដំណើរទស្សនកិច្ចរយៈពេល ៥ ថ្ងៃ ស្របពេលដែលភាពចលាចលនៅប្រទេសកាហ្សាក់ស្ថាន បានបង្កឲ្យមានក្តីបារម្ភអំពីបញ្ហាសន្តិសុខថាមពលរបស់ប្រទេសចិន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
រដ្ឋមន្ត្រីការបរទេសមកពីប្រទេសអារ៉ាប៊ីសាអូឌីត កូវ៉ែត អូម៉ង់ និងបារ៉ែន និងអគ្គលេខាធិការនៃក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស (GCC) លោក Nayef bin Falah al-Hajrah នឹងស្ថិតនៅប្រទេសចិនរហូតដល់ថ្ងៃសុក្រខាងមុខនេះ។ នេះ បើតាមការបញ្ជាក់របស់ក្រសួងការបរទេសចិន។
ភាពចលាចលនៅក្នុងប្រទេសកាហ្សាក់ស្ថានដែលជាប្រទេសសម្បូរដោយប្រេង និងឧស្ម័ន បានបង្កឲ្យចិនមានការព្រួយបារម្ភ។ ចិន បានវិនិយោគយ៉ាងច្រើនមហិមាជាយូរមកហើយនៅក្នុងវិស័យថាមពលនៅក្នុងប្រទេសកាហ្សាក់ស្ថាន។
ដំណើរទស្សនកិច្ចនេះបានធ្វើឡើង បន្ទាប់ពីរដ្ឋមន្ត្រីការបរទេសចិនលោក Wang Yi បានធ្វើសកម្មភាពការទូតមួយចំនួន ដែលក្នុងនោះ រួមមានទាំងដំណើរទស្សនកិច្ចរបស់លោកទៅកាន់ទ្វីបអាហ្វ្រិក ប្រទេសម៉ាល់ឌីវ និងប្រទេសស្រីលង្កាផងដែរ។
អ្នកនាំពាក្យក្រសួងការបរទេសចិនលោក Wang Wenbin បានបញ្ជាក់នៅក្នុងសន្និសីទសារព័ត៌មានប្រចាំថ្ងៃកាលពីថ្ងៃចន្ទថា៖ «ដោយមើលឃើញនូវក្ដីរំពឹងទុកនៃការអភិវឌ្ឍដ៏ធំទាំងនេះ ប្រទេសចិនជឿថា ដំណើរទស្សនកិច្ចនេះ...នឹងពង្រឹងបន្ថែមទៀតនូវទំនាក់ទំនងរវាងចិន និងក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស និងជំរុញឲ្យសម្រេចបាននូវលទ្ធផលដ៏គាប់ប្រសើរពីកិច្ចពិភាក្សានិងកិច្ចសហប្រតិបត្តិការរវាងចិន និងក្រុមប្រឹក្សានេះលើផ្នែកជាច្រើន»។
លោក Wenbin បានបន្ថែមទៀតថា៖ «យើងមានឆន្ទៈក្នុងការធ្វើការរួមគ្នាឲ្យបានខ្លាំងក្លាជាមួយគ្រប់ភាគីទាំងអស់នៃក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស បន្តសម្រេចឲ្យបាននូវការអភិវឌ្ឍរួម និងធ្វើឲ្យប្រសើរឡើងនូវទំនាក់ទំនងទ្វេភាគីឲ្យដល់កម្រិតថ្មីមួយ»៕
