នៅក្នុងប្រទេសកាហ្សាក់ស្ថាន ពលរដ្ឋបាននាំគ្នាចេញធ្វើបាតុកម្មតាមផ្លូវដើម្បីសម្តែងនូវការខឹងសម្បាររបស់ខ្លួនចំពោះការឡើងថ្លៃប្រេងឥន្ធនៈយ៉ាងខ្លាំង។ នៅក្នុងការឆ្លើយតប រដ្ឋាភិបាលកាហ្សាក់ស្ថាន បានចុះចេញពីតំណែង ហើយប្រធានាធិបតីបានប្រកាសស្ថានភាពអាសន្ន។
គេហដ្ឋានប្រធានាធិបតីនៅទីក្រុង Almaty ដែលជាទីក្រុងធំជាងគេបង្អស់នៅក្នុងប្រទេសកាហ្សាក់ស្ថាន បានឆាបឆេះនៅថ្ងៃទី៥ ខែមករាក្នុងអំឡុងពេលនៃការតវ៉ាប្រឆាំងនឹងការឡើងថ្លៃប្រេងឥន្ធនៈភ្លាមៗ។
ការតវ៉ាប្រឆាំង ក៏បានផ្ទុះឡើងនៅរដ្ឋធានី Nursultan និងទីក្រុងធំៗផ្សេងទៀតដែលបណ្តាលមកពីការសម្រេចរបស់រដ្ឋាភិបាលលប់ចោលការកម្រិតតម្លៃប្រេងឥន្ធនៈដែលបានចូលជាធរមាននៅថ្ងៃទី១មករា។
សេចក្តីសម្រេចនេះបណ្តាលឲ្យតម្លៃប្រេងឥន្ធនៈឡើងទ្វេដងមួយថ្ងៃបន្ទាប់មក។
កាលពីថ្ងៃពុធ លោកប្រធានាធិបតី Kassym-Jomart Tokayev បានបណ្តេញនាយករដ្ឋមន្ត្រីនិងគណៈរដ្ឋមន្ត្រីរបស់លោកចេញពីតំណែង ហើយបានដកអតីតប្រធានាធិបតីលោក Nursultan Nazabayev ចេញពីដំណែងជាមេដឹកនាំក្រុមប្រឹក្សាសន្តិសុខជាតិ។ លោកក៏បានសន្យាបង្ក្រាបពួកបាតុករផងដែរ។
បណ្តាញផ្សាយព័ត៌មានកាហ្សាក់របស់រដ្ឋ បានរាយការណ៍ថា បាតុករជាច្រើនដែលបានប្រមូលផ្តុំគ្នានៅខាងក្រៅគេហដ្ឋានប្រធានាធិបតីនិងអាគាររដ្ឋបាលដ៏សំខាន់នៅទីក្រុង Almaty បានកាន់ដំបងនិងខែលការពារខ្លួន។
ការតវ៉ាប្រឆាំងបានចាប់ផ្តើមកាលពីថ្ងៃអាទិត្យ ទី២ មករានេះនៅក្នុងទីក្រុង Zhanaozen ហើយបានរាលដាលយ៉ាងរហ័ស។
ប្រធានាធិបតី Tokayev បានសន្យាធ្វើឲ្យមានតម្លៃប្រេងស្មើនឹងតម្លៃប្រេងកាលពីឆ្នាំទៅ ហើយបានប្រកាសស្ថានភាពអាសន្នរយៈពេល២សប្តាហ៍នៅក្នុងទីក្រុងធំៗគឺ ទីក្រុង Almaty និងរដ្ឋធានី Nursultan ។ បទបញ្ជានេះរួមមានបម្រាមគោចរនៅពេលយប់ហើយនឹងកម្រិតការធ្វើដំណើរនៅខាងក្នុងនិងជុំវិញទីក្រុងទាំងនោះ៕
