ប្រធានាធិបតីកាហ្សាក់ស្ថាន បាននិយាយនៅក្នុងសុន្ទរកថាផ្សាយតាមទូរទស្សន៍នៅថ្ងៃសុក្រនេះថា លោកបានអនុញ្ញាតឲ្យកងកម្លាំងសន្តិសុខរបស់កាហ្សាក់ស្ថាន«បាញ់សម្លាប់ដោយគ្មានការព្រមាន»ខណៈដែលលោកស្វះស្វែងបញ្ចប់ការធ្វើបាតុកម្មប្រឆាំងរដ្ឋាភិបាល។
ប្រធានាធិបតី Kassym-Jomart Tokayev បាននិយាយថា វាជា«ការឆ្កួតលីលា»ដើម្បីចរចា ជាមួយពួកបាតុករដែលលោកបានពណ៌នាថាជា«ឧក្រិដ្ឋជននិងឃាតករ»។
មេដឹកនាំកាហ្សាក់ស្ថានរូបនេះ បាននិយាយថា កងទ័ពរក្សាសន្តិភាពរុស្ស៊ីបានស្ថិតនៅក្នុងប្រទេសតាមសំណើរបស់លោកឲ្យស្ថិតនៅបណ្តោះអាសន្នដើម្បីធានាសន្តិសុខ។
នៅព្រឹកថ្ងៃសុក្រនេះ លោកប្រធានាធិបតីបាននិយាយនៅក្នុងសេចក្តីថ្លែងការណ៍ថា របៀបរៀបរយភាគច្រើនត្រូវបានស្តាឡើងវិញហើយ បន្ទាប់ពីមានចលាចលអស់មួយសប្តាហ៍នៅក្នុងប្រទេសនៅតំបន់អាស៊ីកណ្តាលនេះ។
សេចក្តីថ្លែងការណ៍របស់ប្រធានាធិបតី បានបញ្ជាក់ថា «អាជ្ញាធរមូលដ្ឋាន កំពុងក្តាប់ស្ថានការណ៍។ ក៏ប៉ុន្តែ ពួកភេរវជន នៅកំពុងប្រើប្រាស់អាវុធនិងកំពុងធ្វើឲ្យខូចខាតទ្រព្យ សម្បត្តិរបស់ប្រជាពលរដ្ឋ។ ដូច្នេះ ចំណាត់ការប្រឆាំងភេរវកម្ម ត្រូវតែបន្តរហូតទាល់តែពួកជនសកម្មប្រយុទ្ធ ត្រូវបានកំចាត់ចោលទាំងស្រុង»។
ទីភ្នាក់ងារព័ត៌មាន Reuters បានរាយការណ៍ថា នៅមានឮស្នូរកាំភ្លើងនៅព្រឹកថ្ងៃសុក្រនេះនៅក្នុងទីក្រុង Almaty ដែលជាទីក្រុងធំជាងគេបង្អស់នៅក្នុងប្រទេស។
ក្រសួងមហាផ្ទៃកាហ្សាក់ស្ថាន បានបញ្ជាក់នៅក្នុងសេចក្តីថ្លែងការណ៍មួយនៅថ្ងៃសុក្រនេះថា «ឧក្រិដ្ឋជនប្រដាប់អាវុធចំនួន២៦នាក់»បានត្រូវកំទេច ហើយមនុស្សជាង៣ពាន់នាក់បានត្រូវឃុំខ្លួន។ ក្រសួងនោះ ក៏បាននិយាយដែរថា ប៉ូលិសនិងសមាជិកឆ្មាំការពារជាតិ១៨នាក់បានស្លាប់ចាប់តាំងពីការតវ៉ាប្រឆាំង បានចាប់ផ្តើម។
បាតុកម្មបានចាប់ផ្តើមកាលពីចុងសប្តាហ៍មុននៅផ្នែកភាគខាងលិចនៃប្រទេសកាហ្សាក់ ស្ថានដើម្បីតវ៉ាចំពោះការឡើងថ្លៃប្រេងឥន្ធនៈទ្វេដង៕
ព័ត៌មានមួយចំនួននៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន The Associated Press Agence France-Presse និង Reuters។
