ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

រដ្ឋាភិបាល​ស្នើ​លើក​លែង​និង​បន្ធូរ​បន្ថយ​ទោស​ទណ្ឌិត​ជិត​៧០០​នាក់ ច្រើន​ជាង​រាល់​ឆ្នាំ


រូបឯកសារ៖ រូបថតបង្ហាញដៃរបស់អ្នកតវ៉ាមួយក្រុមកាន់របងខ្លោងទ្វារនៅមុខតុលាការរាជធានីភ្នំពេញ កាលពីថ្ងៃទី៥ ខែមីនា ឆ្នាំ២០១៣។

គណៈ​កម្មការ​ជំនាញ​របស់​រដ្ឋាភិបាល បាន​ស្នើ​សុំ​ព្រះ​រាជ​ទាន​អនុ​គ្រោះ​ទោស​ដល់​ទណ្ឌិតប្រមាណ​៧០០ ​នាក់ ដែល​ក្នុង​នោះ​មាន​ការ​លើក​លែង​ទោស​ចំនួន​ ១៩ ​នាក់ ហើយ​ក្រៅ​ពី​នោះ​ជា​ការ​បន្ធូរ​បន្ថយ​ទោស​ពី​ ៦ ​ខែ​ទៅ​ ១ ​ឆ្នាំ។

ក្រោយ​ព្រះ​មហាក្សត្រ​ចេញ​ព្រះ​រាជក្រឹត្យ​លើក​លែង​ទោស​សម្រាប់​បុណ្យ​អុំ​ទូក​នេះ ទណ្ឌិត​ចំនួន ​១៩ ​នាក់​នេះ នឹង​ត្រូវ​ដោះ​លែង​ភ្លាមៗ​ពី​ពន្ធនាគារ។ នេះ​បើ​តាម​លោក គឹម សន្តិភាព រដ្ឋលេខាធិការ និង​ជា​អ្នក​នាំពាក្យ​ក្រសួង​យុត្តិធម៌។

យោង​តាម​លោក គឹម សន្តិភាព គណៈកម្មការ​ថ្នាក់​ជាតិ​កាល​ពី​ថ្ងៃ​ព្រហស្បតិ៍ បាន​សម្រេច​គោរព​ស្នើ​សុំ​ទៅ​នាយក​រដ្ឋមន្ត្រី ដើម្បី​ទូល​ថ្វាយ​ព្រះ​មហាក្សត្រ​ផ្តល់​ភាព​អនុ​គ្រោះ​ទោស​ដល់​ទណ្ឌិត​សរុប ​៦៩៥ ​នា​ក់ ក្នុង​នោះ​មាន​ស្ត្រី​ ៦៥​ នាក់​។

លោក​បន្ត​ថា​ គណៈ​កម្មការបាន​ស្នើ​សុំ​បន្ថយ​ទោស​មួយ​ជីវិត​មក​នៅ ២០ ​ឆ្នាំ​ចំនួន ​៥ ​នាក់ ស្នើ​សុំ​លើក​លែង​ទោស​ចំនួន ​១៩​ នាក់ ដែល​ជា​ទណ្ឌិត​មាន​ជំងឺ​រ៉ាំរ៉ៃ និង​ចាស់​ជរា។ ក្រៅ​ពី​នោះ​ជា​ការ​ស្នើ​សុំ​បន្ធូរ​បន្ថយ​ទោស ក្នុង​នោះ​បន្ធូរ​បន្ថយ​ទោសរយៈ​ពេល​ ១២ ​ខែ មាន​ចំនួន ​៩២ ​នាក់ រយៈ​ពេល ​៩ ខែ មាន​ចំនួន​ ៩៥​ នាក់ និង​រយៈ​ពេល ​៦ ​ខែ មាន​ចំនួន ​៤៨៤ នាក់។

លោក គឹម សន្តិភាព ថ្លែង​ប្រាប់ ​VOA ​ថា​អ្នក​ទោស​ដែលត្រូវ​បន្ធូរ​បន្ថយ​ទោស នឹង​អាច​ចេញ​ពី​ពន្ធនាគារ​នៅ​ពេល​ណាមួយ​ អាស្រ័យ​ទៅ​តាម​ទោស​ដែល​ពួកគេ​បាន​អនុវត្ត​ហើយ។ ត្រង់​ចំណុច​នេះ លោក​ពន្យល់​ថា​ ការ​បន្ធូរ​បន្ថយ​រយៈ​ពេល​ជាប់​ទោស​អាច​ធ្វើ​ទៅ​បាន ​សម្រាប់​ទណ្ឌិត​ដែល​បាន​ជាប់​ទោស​មួយ​ភាគ​បី​ហើយ​តែ​ប៉ុណ្ណោះ។ ចំណែក​ការ​លើក​លែង​ទោស​ឲ្យ​ចេញ​ពី​ពន្ធនាគារ គឺ​សម្រាប់​ទណ្ឌិត​ ដែល​ជាប់​ទោស​ពីរ​ភាគ​បី​រួច​ហើយ។

លោក​មាន​ប្រសាសន៍​ថា៖ «អញ្ចឹង​ចង់​មិន​ចង់​រយៈ​ពេល​ហ្នឹង វា​ថយ​ជាង​មុន។ បាន​ន័យ​ថា​ខ្លី​ជាង​មុន រយៈ​ពេល​ដែល​គាត់​នៅ​ក្នុង​ពន្ធនា​គារ។ អញ្ចឹង​រយៈ​ពេល​ដែល​មនុស្ស​ត្រូវ​ចេញ​ពី​ពន្ធនាគារ ក៏​វា​លឿន​ជាង​មុន​ដែរ។ ឧទាហរណ៍​ថា ​យើង​បន្ថយ​ ៦ ​ខែ មាន​ន័យ​ថា​ គាត់​ចេញ​បាន​ពី​ពន្ធនាគារ លឿន​ជាង ​៦ ​ខែ ​នៃ​ទោស​ដែល​គាត់​នៅ​សល់»។

មន្ត្រី​ក្រសួង​យុត្តិធម៌​រូប​នេះ​ឲ្យ​ដឹង​ទៀត​ថា​ ការ​លើក​លែង​និង​បន្ធូរ​បន្ថយ​ទោសនា​ឱកាស​បុណ្យ​អុំ​ទូក​ឆ្នាំ​ឆ្នាំ​នេះ មាន​ទណ្ឌិត​ច្រើន​ជាង​ឆ្នាំ​មុន ដែល​កាល​ពី​ឆ្នាំ ​២០១៩ មាន​ប្រមាណ ​៥០០​ នាក់​តែ​ប៉ុណ្ណោះ។ លោក​បញ្ជាក់​ថា ​ឆ្នាំ​នេះ​មាន​ការ​ស្នើ​សុំ​រហូត​ដល់​ ១០៨៦ ​នាក់ ​ពី​ពន្ធនាគារ​តាម​ខេត្ត ហើយ​ការ​បន្ធូរ​បន្ថយ​ច្រើន​ជាង​ឆ្នាំ​មុនៗ គឺ​ជា​ការ​ចូលរួម​ចំណែក​មួយ​ ដើម្បី​កាត់​បន្ថយ​ការ​កក​ស្ទះ​ក្នុង​ពន្ធនា​គារ។

លោក​មាន​ប្រសាសន៍​ថា៖ «ដោយ​សារ​ចំនួន​ស្នើ​មក​ក៏​វា​ច្រើន​ដែរ។ ចំនួន​ស្នើ​មក​ពី​ខាង​ក្រោម ពី​គណៈ​កម្ម​ការ​រាជធានី​ខេត្ត ជាមួយ​នឹង​គណៈ​កម្មការ​ក្រសួង​មហាផ្ទៃ​សរុប​វា​ឡើង​ដល់ ​១ ពាន់​នាក់​ជាង​ឆ្នាំ​នេះ»។

លោក គឹម សន្តិភាព ពន្យល់​ថា គណៈ​កម្មការ​ជំនាញ​បាន​វាយ​តម្លៃ​បញ្ជី​ឈ្មោះអនុ​គ្រោះ​ទោស​យ៉ាង​យក​ចិត្ត​ទុក​ដាក់ ហើយ​មិន​ពិចារណា​ករណី​ដែល​មាន​ «ភាព​សាហាវ​យង់​ឃ្នង» ដូច​ជា​ការ​រំលោភ​កូនខ្លួន​ឯង និង​អនីតិជន​ជា​ដើម ប៉ុន្តែ​ផ្តល់​អាទិភាព​ករណី​អ្នក​ទោស​មាន​ភាព​ចាស់​ជរា ជំងឺ និង​ស្ត្រី​មាន​កូន។

លោក​មាន​ប្រសាសន៍​ថា៖ «គណៈ​កម្មការ​ជាតិ​ពិនិត្យ​ទាំង​ទៅ​លើ​អង្គ​ហេតុ​លើ​អំពើ​ល្មើស​ហ្នឹង បន្ថែមពី​លើ​អ្វី​ដែល​ជា​ការ​ពិនិត្យ​របស់​គណៈ​កម្មការ​រាជធានី​ខេត្ត។ យើង​ពិនិត្យ​មើល​ទៅ​លើ​គេ​ហៅ​ថា​ ចរិត​លក្ខណៈ​នៃ​ការ​ប្រព្រឹត្ត​បទ​ល្មើស​ភាព​សាហាវ​យង់​ឃ្នង​នៃ​អំពើ​ល្មើស»។

លោក គឹម សន្តិភាព បន្ត​ថា ​ច្បាប់​អនុញ្ញាត​ឲ្យ​មាន​ការ​បន្ធូរ​បន្ថយ​ពី​មួយ​ជីវិត​មក ​២០ ​ឆ្នាំ បើ​ទណ្ឌិតជាប់​ពន្ធនាគារ​យ៉ាង​តិច ​៧ ​ឆ្នាំ ប៉ុន្តែ​ករណី​នេះ​ត្រូវ​បំពេញ​លក្ខខណ្ឌ​ជា​ទណ្ឌិត​មាន​ជំងឺ​រ៉ាំរ៉ៃ ចាស់​ជរា ដែល​លោក​ថា​ជា​ការ​ផ្តល់​ «ស្ថាន​ភាព​អនុគ្រោះ​ប្រភេទ​មនុស្ស​ធម៌»។​

ជា​ធម្មតា ការ​លើក​លែង​និង​បន្ធូរ​បន្ថយ​ទោស​ដល់​ទណ្ឌិត ត្រូវ​បាន​ធ្វើ​ឡើង​៣​លើក​ក្នុង​មួយ​ឆ្នាំ គឺ​ក្នុងពិធី​បុណ្យ​ចូល​ឆ្នាំ​ខ្មែរ​ក្នុង​ខែ​មេសា បុណ្យ​ពិសាខ​បូជា​ក្នុង​ខែ​ឧសភា និង​បុណ្យអុំទូក។

លោក អំ សំអាត នាយក​រងអង្គការ​លីកាដូ មាន​ប្រសាសន៍​ថា ការ​អនុ​គ្រោះ​ទោស​នេះ នឹង​ជួយ​សម្រួល​បន្ទុក​សម្រាប់​អ្នក​ចាស់​ជរា និង​មាន​ជំងឺ​រ៉ាំរ៉ៃ ហើយ​វា​ជា​ជំហាន​មួយ ​ដើម្បី​សម្រួល​ដល់​ការ​កក​ចង្អៀត​ណែន​ក្នុង​ពន្ធនាគារ។ លោក​ជំរុញ​ឲ្យ​ដំណើរ​ការ​នេះ​ធ្វើ​ឡើង​ដោយ​តម្លាភាព និង​យុត្តិធម៌​សម្រាប់​អ្នក​ជាប់​ពន្ធនាគារ។

លោក​ថ្លែង​ប្រាប់​ VOA ​ថា​៖ «អញ្ចឹង​សូម​ឲ្យ​គណៈ​កម្មការ​ធ្វើ​ការ​យ៉ាង​ម៉េច ឲ្យ​តម្លាភាព និង​សុក្រឹត ហើយ​និង​យុត្តិធម៌​ក្នុង​ការ​វាយ​តម្លៃ»។

លោក​បន្ថែម​ថា ​ភាព​ចង្អៀត​ណែន​នៅ​តែ​ជា​បញ្ហា​នៅ​ឡើយ បើ​ទោះ​មាន​ការ​បើក​យុទ្ធនាការ​ពន្លឿន​ការ​កកស្ទះ​សំណុំ​រឿង​នៅ​តុលាការ​ក៏​ដោយ។

គួរ​បញ្ជាក់​ថា អ្នក​កំពុង​ជាប់​ឃុំ​សរុប​ក្នុង​ពន្ធនា​គារ​នៅ​ទូទាំង​ប្រទេសកម្ពុជា មាន​ប្រមាណ ​៣៩.០០០ ​នាក់ ក្នុង​នោះ​ទណ្ឌិត​មាន​ចំនួន​ជាង​ ១១.០០០ នាក់៕

XS
SM
MD
LG