ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ចំណាយ​ប្រាក់​ជាង​១០​លាន​ដុល្លារ​ប្រយុទ្ធ​នឹង​កូវីដ១៩​រហូត​មក​ដល់​ពេល​នេះ​


មន្ត្រីសុខាភិបាលមួយក្រុមស្ថិតក្នុងសម្លៀកបំពាក់តាមក្បួនខ្នាត ខណៈពួកគេកំពុងបំពេញកិច្ចការគ្រប់គ្រង និងទប់ទល់ការឆ្លងរាលដាលនៃវីរុសកូរ៉ូណានៅកម្ពុជា។ (រូបថតដោយ៖ នាយកដ្ឋានប្រយុទ្ធនឹងជំងឺឆ្លង CDC)

មន្រ្តី​ក្រសួង​សុខាភិបាល​អះអាង​នៅ​ថ្ងៃ​ច័ន្ទ​នេះ​ថា​រដ្ឋាភិបាល​បាន​ត្រៀម​ថវិកា​រាប់​សិប​លាន​ដុល្លារ​អាមេរិក​ដើម្បី​ទប់​ស្កាត់​ការ​រីករាល​ដាល​នៃ​វីរុស​កូរ៉ូណា​នៅ​កម្ពុជា​ ហើយ​ថវិកា​ទាំង​នោះ​ក៏​បាន​មក​ពី​ការ​ចូលរួម​របស់​សាធារណជន​ផង​ដែរ ​ក្នុង​នោះ​ក៏​មាន​មន្រ្តី​រដ្ឋាភិបាល ​និង​អ្នក​ជំនួញ​នៅ​កម្ពុជា។​

ក្នុង​សន្និសីទ​សារ​ព័ត៌មាន​មួយ​នៅ​ថ្ងៃ​ច័ន្ទ​នេះ ​លោកស្រី ​យក់ សម្បត្តិ ​រដ្ឋលេខាធិការ​ក្រសួង​សុខាភិបាល​ទទួល​បន្ទុក​ថវិកា ​និង​សម្ភារៈ​ពេទ្យ ​ឲ្យ​ដឹង​ថា​រដ្ឋាភិបាល​បាន​ចំណាយ​លើ​ការងារ​ទប់​ស្កាត់​ជំងឺ​កូវីដ១៩ ​អស់​ប្រមាណ​១០,៥​លាន​ដុល្លារ​អាមេរិក ​រហូត​មក​ដល់​ពេល​នេះ ​ដែល​ក្នុង​នោះ​៤,៥​លាន​ដុល្លារ​ជា​កញ្ចប់​បម្រុង​ក្នុង​ថវិកា​ជាតិ​ដែល​មាន​សរុប​៣០​លាន​ដុល្លារ​ និង​៦​លាន​ដុល្លារ​ទៀត ​កាត់​ចេញ​ពី​កញ្ចប់​ជំនួយ​ដែល​ចូល​រួម​បរិច្ចាគ​ដោយ​សាធារណជន។​

លោកស្រី​បន្ត​ថា​ ក្នុង​ទឹក​ប្រាក់​ជំនួយ​៦​លាន​ដុល្លារ​នេះ​មាន​១​លាន​ដុល្លារ​កំពុង​ប្រើប្រាស់​សម្រាប់​ការ​ពិនិត្យ​សុខភាព ​និង​ការ​ទុក​កម្មករ​កាត់​ដេរ​ឲ្យ​នៅ​ដាច់​ដោយ​ឡែកដោយ​មាន​ការ​រំពឹង​ទុក​ថា​ពួក​គេ​ជាង​១​ម៉ឺន​នាក់ ​បាន​ធ្វើ​ដំណើរ​ពី​ស្រុក​កំណើត​ ត្រឡប់​ចូល​ភ្នំពេញ​វិញ ក្រោយ​បញ្ចប់​បុណ្យ​ចូល​ឆ្នាំ។​

លោក​ស្រី​បន្ថែម​ថា ​ ដោយសារ​មួយ​សប្តាហ៍​នេះ ​មិន​មាន​ករណី​ឆ្លង​ថ្មី ​ ការ​ចំណាយ​ក៏​មិន​សូវ​មាន​ធំ​ដុំ​នោះ​ទេ។​

លោកស្រី​មាន​ប្រសាសន៍​ថា៖​ «សម្រាប់​ឥឡូវ​នេះ ​អវិជ្ជមាន​មួយ​អាទិត្យ​នេះ​យើង​បាន​ធូរ​ស្បើយ​ខ្លះ។​យើង​សង្ឃឹម​ថា​ មួយ​អាទិត្យ​ទៀត ​ បើ​យើង​អវិជ្ជមាន​ទៀត ​ យើង​សល់​ថវិកា​ច្រើន។​ យើង​មិន​មាន​ចំណាយ​អ្វី​ធំ​ដុំ​ទេ»។​

នៅ​ពេល​សួរ​ថា​ ​តើ​ថវិកា​ធនធាន​ដែល​មាន​ស្រាប់​អាច​គ្រប់គ្រាន់​សម្រាប់​ចំណាយ​បាន​យូរ​ប៉ុណ្ណា​ លោកស្រី​យក់ សម្បត្តិ​បាន​បញ្ជាក់​យ៉ាង​ខ្លីថា៖​«អត់​អី​ទេ»។​

ក្រសួង​សុខាភិបាល​ឱ្យ​ដឹង​ថា ​ ថវិកា​បាន​យក​ទៅ​ប្រើ​ប្រាស់​បញ្ជា​ទិញ​សម្ភារៈ​ពេទ្យ​ ដូចជា​ម៉ាស​N95​ ម៉ាស​វេជ្ជ​សាស្ត្រ​ធម្មតា​សរុប​១១​លាន​ម៉ាស​សម្លៀក​បំពាក់​ការពារ​ខ្លួន​របស់​ពេទ្យ​(PPE) ​សរុប​ចំនួន​៣៥០០០​កំផ្លេ ​ដែល​សម្ភារៈ​បច្ចេកទេស​ទាំង​នេះ​ត្រូវ​ស្ដុក​ទុក​នៅ​ឃ្លាំង​រដ្ឋ​ចំនួន​ពីរ​កន្លែង​ដើម្បី​ផ្គត់ផ្គង់​តម្រូវ​ការ​ព្យាបាល​ក្នុង​ប្រទេស។​

បើ​តាម​ហ្វេសប៊ុក​របស់​លោក​នាយក​រដ្ឋមន្ត្រី​ ហ៊ុន សែន​ ដែល​បាន​បង្ហោះ​កាល​ពីថ្ងៃ​សុក្រ​សប្តាហ៍​ មុន មន្ត្រី​រាជការ​ កម្លាំង​ប្រដាប់​អាវុធ​ចំនួន ​១៤ .៧៥១​នាក់ ​បាន​បរិច្ចាគ​ប្រាក់​ខែ​របស់​ខ្លួន ​ដោយ​ផ្នែក​និង​ទាំង​ស្រុង​ដើម្បី​ចូលរួម​ប្រយុទ្ធ​នឹង​ជំងឺ​ឆ្លង​នេះ។ ​ សរុប​ថវិកា​ដែល​បាន​មក​ពី​សាធារណ​ជន​ មាន​ប្រមាណ​១៣,៥​លាន​ដុល្លារ​អាមេរិក​ គិត​ត្រឹម​ថ្ងៃ​ច័ន្ទ​នេះ ​ បន្ថែម​ពី​លើ​កញ្ចប់​ទឹក​ប្រាក់​បម្រុង​ទុក​ចំនួន​៣០​លាន​ដុល្លារ​របស់​រដ្ឋាភិបាល។​

បណ្ដា​ប្រទេស​ដទៃ​ទៀត ​និង​ដៃគូ​អភិវឌ្ឍន៍​នានា​ក៏​បាន​ផ្ដល់​ជំនួយ​ជា​សម្ភារៈ ​និង​សាច់​ប្រាក់​ផង​ដែរ ​ដោយ​ក្នុង​នោះ​ប្រទេស​ចិន​បាន​ផ្ដល់​ជំនួយ​១៨​កញ្ចប់​ធំៗ ​ដែល​មាន​ជា​សម្ភារៈ​ពេទ្យ សហរដ្ឋអាមេរិក​ផ្ដល់​ជំនួយ​២,១​លាន​ដុល្លារ​ប្រទេស​អាល្លឺម៉ង់​ផ្ដល់​ជំនួយ​១,៦​លាន​ដុល្លារ​ធនាគារ​ពិភពលោក​ផ្ដល់​ជំនួយ​២០​លាន​ដុល្លារ​ជា​បរិក្ខារ​បច្ចេកទេស ​និង​ជប៉ុន​សន្យា​ជួយ​២០​លាន​ដុល្លារ​អាមេរិក។​

បើ​តាម​លោកស្រី ​យក់ សម្បត្តិ ​ ភ្នាក់ងារ​ក្រុម​គ្រូពេទ្យ​នៅ​ជួរមុខ ​និង​ជួរ​ក្រោយ​ ប្រមាណ​៣​ពាន់​នាក់​បាន​ទទួល​ប្រាក់​បៀវត្សរ៍​បន្ថែម​ ក្នុង​ម្នាក់ៗ​ចំនួន​៥០​ដុល្លារ​អាមេរិក​ក្នុង​មួយ​ថ្ងៃ។​

លោក ​សន ជ័យ​ នាយក​ប្រតិបត្តិ​ប្រចាំ​ប្រទេស​កម្ពុជា​នៃ​សម្ព័ន្ធភាព​គណនេយ្យ​សង្គម​(ANSA)​បាន​លើក​ឡើង​ថា ​គណៈ​កម្មាធិការជាតិ​ប្រយុទ្ធ​នឹង​ជំងឺ​កូវីដ១៩​ គួរ​ផ្ដល់​ព័ត៌មាន​ឱ្យ​មាន​តម្លាភាព​ជា​ប្រចាំ​ដល់​សាធារណ​ជន​ជា​ម្ចាស់​ជំនួយ​អំពី​ចំណូល​ចំណាយ​និង​ការ​ចាត់​ចែង​ថវិកា​របស់​ខ្លួន​ផង​ដែរ។​

មន្ត្រី​សង្គម​ស៊ីវិល​រូប​នេះ​បាន​ប្រាប់​VOA​កាល​ពី​សប្តាហ៍​មុន​ថា៖​ «យើង​ចង់​ឃើញ​នោះ ​គឺ​តួ​អង្គ​ពាក់ព័ន្ធ​ផ្សេងៗ​ហ្នឹង​គឺ​មាន​បច្ចុប្បន្ន​ភាព​នៃ​ការ​វិវត្ត​នៃ​ការ​ប្រើប្រាស់​មធ្យោបាយ ​ឬ​ក៏​ការ​ប្រើប្រាស់​ថវិកា​ជា​ប្រចាំ ​ ជា​ប្រចាំ​អាច​ថា​ជា​ការ​ធ្វើ​បច្ចុប្បន្ន​ភាព​ប្រចាំ​សប្ដាហ៍ ​ពី​ចំណូល​ហើយ​និង​ចំណាយ​ដើម្បី​ជា​ប្រយោជន៍​នៃ​ការ​លើក​ទឹក​ចិត្ត​ទៅ​ដល់​អ្នក​ដែល​ផ្ដល់​ជំនួយ​សប្បុរស​ធម៌»។​

មន្ត្រី​អង្គការ​សុខភាព​ពិភព​លោក ​ប្រចាំ​ប្រទេស​កម្ពុជា​គឺ​លោកស្រី​ Li Ailan​ នៅ​ព្រឹក​ថ្ងៃ​ច័ន្ទ​នេះ​បាន​ព្រមាន​ថា​ ស្ថានភាព​ជំងឺ​កូវីដ១៩នៅ​កម្ពុជា ​កំពុង​ស្ថិត​នៅ​ដំណាក់​កាល​ដំបូង​ប៉ុណ្ណោះ ​និង​អំពាវនាវ​ឲ្យ​មាន​ការ​ប្រុង​ប្រៀប​ ប្រយ័ត្ន​ប្រយែង​បន្ត​ទៀត។​

កាល​ពី​សប្តាហ៍​មុន ​លោកស្រី​ Li Ailan​ តំណាង​អង្គការ​សុខភាព​ពិភព​លោក​(WHO)​ប្រចាំ​នៅ​កម្ពុជា​ បាន​ជំរុញ​កម្ពុជា​ឲ្យ​ត្រៀម​ខ្លួន​ជា​ស្រេច​សម្រាប់​ការ​ចម្លង​ទៅ​សហគមន៍​ទ្រង់ទ្រាយ​ធំ​ ក្នុង​នោះ​មាន​ការ​បង្កើន​សម្ភារៈ​ការពារ​ខ្លួន​[PPE]​ ឧបករណ៍​ជំនួយ​ផ្លូវ​ដង្ហើម​[Ventilator]​ និង​គ្រូពេទ្យ​ជំនាញ​ជា​ដើម៕​

តួលេខនៃករណីឆ្លងជំងឺកូវីដ១៩

XS
SM
MD
LG