ក្រុមមេដឹកនាំនៃបណ្តាប្រទេសដែលមានសេដ្ឋកិច្ចលូតលាស់ជាងគេបំផុតនៅក្នុងពិភពលោកឬហៅថា G7 បានស្នើឲ្យដាក់កំណើនសេដ្ឋកិច្ចរបស់ខ្លួនជាអាទិភាពទីមួយជាបន្ទាន់ និងបានសម្តែងក្តីបារម្ភទៅលើប្រទេសកូរ៉េខាងជើង ប្រទេសរុស្ស៊ី និងជម្លោះដែនសមុទ្រ ខណៈដែលកិច្ចប្រជុំកំពូលរបស់ពួកគេបានបញ្ចប់នៅថ្ងៃសុក្រនេះ។
សេចក្តីថ្លែងការណ៍ចុងក្រោយបង្អស់នៃកិច្ចប្រជុំនេះបានលើកឡើងពីបញ្ហាទូលំទូលាយដែលសេដ្ឋកិច្ចសាកលលោកកំពុងជួបប្រទះ ខណៈដែលមេដឹកនាំ G7 មានការខ្វែងគំនិតគ្នាមួយចំនួន ជុំវិញវិធីសាស្រ្តក្នុងការបង្កើនចំណូលចូលរដ្ឋ។
សេចក្តីប្រកាសដែលមានចំនួន៣២ទំព័រនេះបានសរសេរថា «តម្រូវការទាបនិងបញ្ហាស្មុគស្មាញដែលមិនអាចដោះស្រាយបាន គឺជាកត្តាគន្លឹះដែលធ្វើឲ្យបារម្ភដល់កំណើនសេដ្ឋកិច្ចជាក់ស្តែងនិងសក្តានុពលកំណើន។ យើងនៅតែប្តេជ្ញាដើម្បីធានាថា កំណើននេះមានលក្ខណៈទូលំទូលាយ និងធ្វើឲ្យសម្បូរការងារ ដែលផ្តល់អត្ថប្រយោជន៍ដល់គ្រប់ភាគីទាំងអស់នៅក្នុងសង្គមរបស់យើង»។
បណ្តាប្រទេសទាំងនោះឯកភាពប្រឆាំងនឹង «ការបន្ទាបតម្លៃដ៏ប្រកួតប្រជែងនៃរូបិយប័ណ្ណ» របស់ពួកគេ ដើម្បីសម្រេចឲ្យបាននូវគោលនយោបាយមួយដែលកាន់តែស្វាហាប់និងមានតុល្យភាពបូកបញ្ចូលគ្នា ក្នុងការទទួលបានកំណើនដ៏ខ្លាំងក្លា មាននិរន្តរភាព និងមានតុល្យភាពមួយ ដោយយកចិត្តទុកដាក់ទៅលើតម្រូវការរបស់បុគ្គលម្នាក់ៗនៅក្នុងប្រទេសនីមួយៗ។
ខណៈដែលលោកប្រធានាធិបតីអាមេរិក បារ៉ាក់ អូបាម៉ា បានមានប្រសាសន៍ដោយសុទិដ្ឋិនិយមអំពីនិរន្តរភាពនៃការរើបឡើងសេដ្ឋកិច្ចនៅក្នុងសហរដ្ឋអាមេរិក លោកនាយករដ្ឋមន្ត្រីជប៉ុន Shinzo Abe បានបញ្ចេញទស្សនៈព្រួយបារម្ភទៅលើសេដ្ឋកិច្ចសាកលលោក ដោយប្រៀបធៀបស្ថានភាពសេដ្ឋកិច្ចនាពេលបច្ចុប្បន្ននេះជាមួយនឹងស្ថានភាពសេដ្ឋកិច្ចកាលពីឆ្នាំ២០០៨ នៅពេលដែលធនាគារវិនិយោគអាមេរិក Lehman Brothers បានដួលរលំ និងបានធ្វើឲ្យសេដ្ឋកិច្ចសាកលលោកជាប់គាំង។
អ្នកតាមដានស្ថានភាពសេដ្ឋកិច្ចជាច្រើននាក់ជឿថា លោក Abe ធ្វើការប្រៀបធៀបយ៉ាងដូច្នេះគឺដើម្បីទុកពេលវេលាសម្រាប់លោកក្នុងការពន្យារពេលអនុវត្តផែនការបង្កើនពន្ធប្រើប្រាស់ក្នុងប្រទេសជប៉ុន ដែលនេះជាដំណើរវិវឌ្ឍន៍មួយដែលបណ្តាមេដឹកនាំនានាមិនគាំទ្រ ដូចជាលោកស្រីអធិការបតីអាល្លឺម៉ង់ Angela Merkel ដែលប្រុងប្រយ័ត្នចំពោះការចំណាយរបស់សាធារណជនដើម្បីបង្កើនកំណើនសេដ្ឋកិច្ច។
ក្រុមមេដឹកនាំ G7 ក៏បានអំពាវនាវឲ្យប្រទេសកូរ៉េខាងជើងអនុលោមទៅតាមបទបញ្ញត្តិរបស់អង្គការសហប្រជាជាតិ និងបញ្ឈប់រាល់ការសាកល្បងអាវុធនុយក្លេអ៊ែរ ការបាញ់កាំជ្រួចមីស៊ីល និងសកម្មភាពបង្ករឿងដទៃទៀត។
ក្រុមមេដឹកនាំទាំងនេះក៏បានថ្កោលទោសទៅលើប្រទេសរុស្ស៊ីចំពោះការបញ្ចូលឧបទ្វីប Crimea របស់ប្រទេសអ៊ុយក្រែនទៅជាឧបសម្ព័ន្ធរបស់ខ្លួនផងដែរ ដោយបានចាត់ទុកសកម្មភាពនេះថាខុសច្បាប់។ ក្រុមមេដឹកនាំ G7 បានព្រមានអំពីការបន្ថែមចំណាត់ការដាក់កំហិតខ្លាំងជាងមុនទៅលើរដ្ឋាភិបាលក្រុងមូស្គូ ប៉ុន្តែមេដឹកនាំទាំងនេះក៏បានបន្ថែមថា គេអាចនឹងដកទណ្ឌកម្មទាំងនោះចេញបាន ប្រសិនបើប្រទេសរុស្ស៊ីបំពេញទៅតាមលក្ខខណ្ឌមួយចំនួន ដូចជាគោរពអធិបតេយ្យភាពរបស់ប្រទេសអ៊ុយក្រែនឲ្យបានពេញលេញជាដើម។
ដោយមិនបានលើកឡើងពីប្រទេសចិនឲ្យចំ សេចក្តីប្រកាសចុងក្រោយនេះបានសន្យាថានឹងជួយដល់ការដោះស្រាយវិវាទដែនទឹកនៅសមុទ្រចិនខាងត្បូង ដែលចិនបានសាងសង់កោះសិប្បនិម្មិតរបស់ខ្លួនយ៉ាងគឃ្លើន បើទោះបីជាមានការទាមទារពីសំណាក់ប្រទេសជិតខាងក៏ដោយ៕
