ការផ្ទុះរាតត្បាតជាសាកលនៃជំងឺកូវីដ១៩បានឈានដល់ដំណាក់កាលមិនល្អមួយ គឺមានចំនួនអ្នកឆ្លងបានកើនឡើងដល់មួយលាននាក់ហើយនៅក្នុងថ្ងៃសុក្រនេះ។
ការរាប់ចំនួនករណីឆ្លងនៅទូទាំងពិភពលោកដែលធ្វើឡើងដោយសាកលវិទ្យាល័យ Johns Hopkins បង្ហាញថា ប្រមាណ១ភាគ៤នៃករណីឆ្លងនេះ ស្ថិតនៅសហរដ្ឋអាមេរិក ដែលមកដល់ថ្ងៃសុក្រនេះមានចំនួនប្រមាណជាង២៤៥,០០០ករណី។
នៅទូទាំងពិភពលោក ចំនួនអ្នកស្លាប់សរុបពីកូវីដ១៩ បានកើនឡើងដល់ជាង៥៣,០០០នាក់។ ប្រទេសអ៊ីតាលីបានរាយការណ៍អំពីចំនួនអ្នកស្លាប់ច្រើនជាងគេដោយមានអ្នកស្លាប់ជាង១៣,០០០និងកើនឡើងរាល់ថ្ងៃ។
នៅសហរដ្ឋអាមេរិក សំណួរដែលមនុស្សគ្រប់គ្នាឆ្ងល់គឺតើពួកគេគួរពាក់ម៉ាស់មុខដែរឬទេ? អ្នកជំនាញខ្លះថាអ្នកដែលមិនឈឺឬដែលមិនថែអ្នកជំងឺកូវីដ១៩មិនចាំបាច់ពាក់ម៉ាស់ទេ ដោយពួកគេថាម៉ាស់មិនបញ្ឈប់វីរុសនេះទេ។ ប៉ុន្តែអ្នកជំនាញផ្សេងទៀតថា ការពាក់ម៉ាស់ការពារមុខនៅប្រសើរជាងអត់ម៉ាស់។
អភិបាលក្រុងញូវយ៉ក លោក Bill de Blasio បានណែនាំឲ្យពលរដ្ឋក្នុងក្រុងនេះពាក់ក្រណាត់ដូចជាក្រម៉ាគ្របមាត់និងច្រមុះ ដោយទុកម៉ាស់មុខសម្រាប់បុគ្គលិកសុខាភិបាលដែលត្រូវការចាំបាច់។ ក្រុងផ្សេងទៀតដូចក្រុងផ្សេងទៀតក៏ចាប់ផ្តើមណែនាំ ដូច្នេះខណៈលោកប្រធានាធិបតី ដូណាល់ ត្រាំ ថា ក្រុមការងារសេតវិមានកំពុងសម្រេចអំពីថាតើគួរណែនាំពលរដ្ឋឲ្យពាក់ម៉ាស់ឬយ៉ាងណា។
ធនាគារពិភពលោកក៏បានអនុម័តមូលនិធិជិត២ពាន់លានដុល្លារសម្រាប់ប្រទេសក្រីក្របំផុតចំនួន២៥ក្នុងពិភពលោកដើម្បីជួយពួកគេប្រយុទ្ធប្រឆាំងនឹងមេរោគរាតត្បាតជាសាកលនេះ៕
