របាយការណ៍ប្រចាំឆ្នាំរបស់មូលនិធិ Bill & Melinda Gates ដែលបានចេញផ្សាយនៅថ្ងៃទី ២៣ ខែកញ្ញា នេះ បានឲ្យដឹងថា មានមនុស្សរាប់ពាន់លាននាក់នៅក្នុងពិភពលោកនេះដែលជួបប្រទះនឹងភាពក្រីក្រ ដោយសារតែវិសមភាព។
ជីវភាពរស់នៅរបស់ប្រជាជននៅក្នុងពិភពលោក សូម្បីតែរបស់ប្រជាជនក្រីក្របំផុត បានប្រសើរឡើងចាប់តាំងពីឆ្នាំ២០០០មក ប៉ុន្តែប្រជាជនរាប់ពាន់លាននាក់កំពុងជាប់ផុងនៅក្នុងវិសមភាពយ៉ាងចាក់ស្រេះ។
នេះគឺជាការវាយតម្លៃរបស់មូលនិធិ Bill & Melinda Gates នៅក្នុងរបាយការណ៍ប្រចាំឆ្នាំរបស់ខ្លួន ទៅលើវឌ្ឍនភាពឆ្ពោះទៅកាន់យន្ដការនៃគោលដៅអភិវឌ្ឍន៍ប្រកបដោយនិរន្ដរភាពទាំង១៧របស់អង្គការសហប្រជាជាតិ ដែលប្រទេសភាគច្រើនបានសន្យាថានឹងព្យាយាមសម្រេចឲ្យបានត្រឹមឆ្នាំ២០៣០ខាងមុខនេះ។ កិច្ចខិតខំប្រឹងប្រែងទាំងនោះកំពុងតែជួបប្រទះនឹងបញ្ហា។ នេះបើយោងតាមការបញ្ជាក់របស់លោក Bill Gates។
លោក Bill Gates បានថ្លែងប្រាប់ VOA ថា៖ «ទោះជាយើងសម្រេចបានវឌ្ឍនភាពដែលយើងសម្រេចបានក្នុងពេលកន្លងមកក៏ដោយ ក៏កុមារជាង១០%ក្នុងប្រទេសជាច្រើនស្លាប់មុនអាយុ៥ឆ្នាំ។ ចំណែកឯនៅតាមបណ្ដាប្រទេសធូរធារជាងនេះវិញ មានអត្រាកុមារស្លាប់មុនអាយុ៥ឆ្នាំទាបជាង១%។ ដូច្នេះគឺថា កុមារស្លាប់មុនអាយុ៥ឆ្នាំមានចំនួន១០%នៅក្នុងប្រទេសមួយចំនួន ហើយនៅក្នុងប្រទេសមួយចំនួនទៀតមានរហូតដល់ជិត១៥%។ នេះគឺជាតួលេខដ៏ខ្ពស់ហួសហេតុមួយ ហើយយើងគួរតែធ្វើការងារឲ្យបានកាន់តែល្អជាងមុនដើម្បីដោះស្រាយបញ្ហានេះ»។
មហាសេដ្ឋីវ័យ៦៣ឆ្នាំរូបនេះ ដែលជាសហស្ថាបនិកក្រុមហ៊ុនបច្ចេកវិទ្យា Microsoft និងជាសប្បុរសជនផ្នែកសុខាភិបាលម្នាក់ បានផ្ដល់បទសម្ភាសន៍ដល់ VOA នៅឯការិយាល័យនៃមូលនិធិរបស់លោក។ បទសម្ភាសន៍នេះត្រូវបានធ្វើឡើងនៅមុនពេលដែលរបាយការណ៍របស់មូលនិធិលោកចេញផ្សាយជាសាធារណៈនៅថ្ងៃទី១៧ ខែកញ្ញា ស្របពេលដែលមហាសន្និបាតអង្គការសហប្រជាជាតិឆ្នាំ២០១៩ចាប់ផ្ដើម។
របាយការណ៍ឆ្នាំនេះប្រើប្រាស់ភូមិសាស្ត្រនិងយេនឌ័រសម្រាប់ពិនិត្យមើលទៅលើដំណើរវិវត្តន៍ ជាពិសេសផ្នែកសុខភាពនិងការអប់រំ។
របាយការណ៍នេះបានរកឃើញថា «មានការផ្ដោតយកចិត្តទុកដាក់ខ្លាំងជាងមុនទៅលើអត្រាមរណៈរបស់កុមារនិងការទទួលបានកម្រិតអប់រំទាប នៅក្នុងតំបន់ Sahel នៃទ្វីបអាហ្វ្រិក ក៏ដូចជានៅតាមតំបន់មួយចំនួននៃប្រទេសប៉ាគីស្ថាន អាហ្វហ្កានីស្ថាន និងប៉ែកខាងជើងប្រទេសឥណ្ឌាផងដែរ»។
ប្រជាជននៅតាមតំបន់ទាំងនោះជួបប្រទះនឹងបញ្ហាជាច្រើន ដូចជាបញ្ហាអត្រាមានកូនច្រើននៅក្នុងពិភពលោក បញ្ហាអត្រាលូតលាស់យឺតរបស់កុមារ និងមានថ្នាំបង្ការតិចតួច។
ស្ត្រីជួបប្រទះនឹងបញ្ហាទាំងនេះច្រើនជាងបុរស។ ក្មេងស្រីតែងតែទទួលបានការអប់រំតិចជាងក្មេងប្រុស ហើយក្មេងស្រីនៅតំបន់ភាគខាងត្បូងវាលខ្សាច់សាហារ៉ាជាមធ្យមទទួលបានការអប់រំតិចជាងក្មេងប្រុសចំនួនពីរឆ្នាំ។ ទោះបីជាក្មេងស្រីទទួលបានការអប់រំល្អក៏ដោយ ក៏ពួកគេកម្រនឹងប្រើប្រាស់ចំណេះដឹងទាំងនោះដើម្បីធ្វើការងារបានប្រាក់កម្រៃណាស់។ របាយការណ៍ដដែលនេះបានឲ្យដឹងទៀតថា នៅទូទាំងពិភពលោក គម្លាតរវាងស្ត្រីនិងបុរសក្នុងវិស័យការងារខុសគ្នាចំនួន២៦%។
ការតាមដានត្រួតពិនិត្យទៅលើដំណើរវិវត្តន៍នេះគឺស្របគ្នាជាមួយនឹងការប្ដេជ្ញារបស់មូលនិធិ Gates ដែលរួមមានទាំងការលើកកម្ពស់វិស័យសុខាភិបាលនៅទូទាំងពិភពលោក និងការផ្ដល់ជំនួយអភិវឌ្ឍន៍ដល់បណ្ដាប្រទេសដែលមានប្រាក់ចំណូលទាប។
ចាប់តាំងពីមូលនិធិនេះចាប់ផ្ដើមដំណើរការកាលពីឆ្នាំ២០០០មក មូលនិធិនេះបានចំណាយប្រាក់អស់រាប់ពាន់លានដុល្លារទៅលើកិច្ចខិតខំប្រឹងប្រែងនានា ដូចជាលើកកម្ពស់វ៉ាក់សាំងបង្ការនិងអាហារូបត្ថម្ភ ប្រយុទ្ធប្រឆាំងនឹងជំងឺគ្រុនចាញ់និងជំងឺដទៃទៀត គាំទ្រគំនិតច្នៃប្រឌិតថ្មីដើម្បីផលិតបង្គន់អនាម័យ និងធានាប្រមូលទិន្នន័យនានាដែលចាំបាច់ដើម្បីកំណត់បញ្ហាដែលត្រូវដោះស្រាយ។
ដូចដែលបណ្ដាញសារព័ត៌មាន Vox បានលើកឡើង ជារៀងរាល់ឆ្នាំ មូលនិធិ Gates បានចំណាយប្រាក់ទៅលើវិស័យសុខាភិបាលក្នុងពិភពលោកអស់ច្រើនជាងអង្គការសុខភាពពិភពលោក WHO និងបណ្ដាប្រទេសភាគច្រើនទៅទៀត។ មូលនិធិនេះបានក្លាយជាមូលនិធិសប្បុរសធម៌ ដែលមានប្រាក់ច្រើនបំផុតនៅក្នុងពិភពលោក គឺដល់ទៅ៤ម៉ឺន៦ពាន់៨រយលានដុល្លារ គិតត្រឹមខែធ្នូ ឆ្នាំ២០១៨ នេះ។ នេះបើយោងតាមការបញ្ជាក់របស់គេហទំព័រមូលនិធិនេះ។
ទឹកប្រាក់ដ៏ច្រើនសន្ធឹកសន្ធាប់នេះបានចោទជាសំណួរអំពីតួនាទីនៃសប្បុរសធម៌ផ្នែកសុខាភិបាលនៅក្នុងការអភិវឌ្ឍ។
នាយកផ្នែកទំនាក់ទំនងនៃមូលនិធិសប្បុរសធម៌ Wellcome លោក Mark Henderson បានសរសេរនៅក្នុងគេហទំព័រសប្បុរសជន Inside Philanthropy កាលពីសប្ដាហ៍មុនថា៖ «មូលនិធិ Gates មូលនិធិ Rockefeller និងមូលនិធិ Wellcome ដែលមានប្រាក់រាប់ពាន់លានដុល្លារ ប្រហែលជាចំណាយប្រាក់ក្នុងចេតនាសប្បុរស ប៉ុន្តែមូលនិធិទាំងនោះត្រូវពិភាក្សាអំពីអំណាចដ៏ខ្លាំងក្លាដែលពួកគេមាន នោះគឺអំណាចដែលមិនចាំបាច់មានការទទួលខុសត្រូវច្រើន»។
លោក Mark Henderson បានប្រកាសថា មូលនិធិសប្បុរសធម៌ដែលធ្វើការលើផ្នែកសុខភាព និងមានមូលដ្ឋាននៅទីក្រុង ឡុងដ៏ ហើយក៏ជាមូលនិធិដែលចំណាយប្រាក់ច្រើនបំផុតទីពីរ បន្ទាប់ពីមូលនិធិ Gates នេះ នឹងបង្កើនតម្លាភាពរបស់ខ្លួន៕
ប្រែសម្រួលដោយអ្នកស្រី ហុង ចិន្ដា
