ការស្ទង់មតិថ្មីមួយដោយអង្គការ Gallop បង្ហាញថា ពលរដ្ឋអាមេរិកាំង៣៨ភាគរយគាំទ្រការបំពេញការងាររបស់លោកប្រធានាធិបតី Donald Trump នៅសេតវិមានដែលជាតួលេខមិនមានការប្រែប្រួលច្រើនខុសពីតួលេខកាលពីខែមុនទេ ក៏ប៉ុន្តែបានចុះថយច្រើនពីតួលេខកាលពីដើមខែឧសភា។
លោក Trump ប្រឈមនឹងការប្រកួតប្រជែងតឹងតែងដើម្បីឱ្យបានជាប់ឆ្នោតជាថ្មីនៅក្នុងខែវិច្ឆិកាប្រឆាំងនឹងលោកអតីតអនុប្រធានាធិបតី Joe Biden ដែលមានអត្រាគាំទ្រ៤៩%កាលពីពីរខែមុននេះ។
ក៏ប៉ុន្តែការគាំទ្រដល់លោក Trump បានចុះថយខ្លាំងកាលពីចុងខែឧសភានិងដើមខែមិថុនានៅពេលមានបាតុកម្មពីឆ្នេរសមុទ្រខាងកើតដល់ឆ្នេរសមុទ្រខាងលិចនៃប្រទេសអាមេរិក ដែលបាតុកម្មខ្លះបានក្លាយជាអំពើហិង្សាប្រឆាំងនឹងការរំលោភដោយប៉ូលិសលើពួកជនអំបូរភាគតិចនៅក្រោយការស្លាប់របស់លោក George Floyd ជនជាតិអាមេរិកាំងដើមកំណើតអាហ្វ្រិក នៅពេលលោកឋិតនៅក្នុងការឃាត់ខ្លួនដោយប៉ូលិសនៅក្នុងក្រុង Minneapolis រដ្ឋ Minnesota។
លោក Trump បានសម្តែងការគាំទ្ររបស់លោកដល់ការធ្វើបាតុកម្មដោយសន្តិវិធីដោយលោកបាននិយាយថា ពលរដ្ឋអាមេរិកាំងចង់ឱ្យមានច្បាប់និងរបៀបរៀបរយហើយលោកបានសម្តែងការគាំទ្រដល់ពួកប៉ូលិសផងដែរ។
នៅពេលនេះ នៅពេលបួនខែមុនការបោះឆ្នោតជាតិ អត្រាគាំទ្រលោក Trump មានតែបីភាគរយប៉ុណ្ណោះលើសការគាំទ្រផ្ទាល់ខ្លួនរបស់លោកចំនួន៣៥ភាគរយ ដែលបានត្រូវកត់ត្រានៅក្នុងឱកាសបួនដាច់ដោយឡែកពីគ្នាកាលពីឆ្នាំ២០១៧។ ការចងក្រង ការស្ទង់មតិជាតិដោយគេហទំព័រ Real Clear Politics បង្ហាញថា លោក Biden នាំមុខលោក Trump ជាមធ្យមជិត៩ភាគរយ។
ការស្ទង់មតិថ្មីៗបំផុតរបស់អង្គការ Gallup បង្ហាញឱ្យឃើញការខ្វែងគំនិតគ្នាខាងនយោបាយដែលមិនធ្លាប់មានពីពេលមុននៅក្នុងប្រទេសអាមេរិក។
ពួកអ្នកធ្វើការស្ទង់មតិបាននិយាយថា ការស្ទង់មតិរបស់ពួកគេពីថ្ងៃទី៨ដល់ថ្ងៃទី៣០ខែមិថុនាបានបង្ហាញថា ការគាំទ្ររបស់គណបក្សសាធារណរដ្ឋដល់លោក Trumpបានកើនឡើងពី ៨៥ភាគរយទៅដល់ ៩១ភាគរយ ហើយការគាំទ្រគណបក្សប្រជាធិបតេយ្យបានចុះពី ៥ភាគរយមក ២ភាគរយ។ ការគាំទ្រលោក Trump ពីសំណាក់ពួកអ្នកបោះឆ្នោតដែលហៅខ្លួនឯងថា ជាអ្នកឯករាជ្យនោះបានចុះថយពី៣៩ភាគរយមកត្រឹម៣៣ភាគរយ។
អង្គការ Gallup បាននិយាយថា គម្លាត ៨៩ភាគរយរវាងការគាំទ្ររបស់អ្នកបោះឆ្នោតសាធារណរដ្ឋនិយមនិងក្រុមអ្នកបោះឆ្នោតប្រជាធិបតេយ្យជាគម្លាតធំបំផុតដែលពួកគេបានកត់ត្រានៅក្នុងរយៈពេលនៃការស្ទង់មតិច្រើនទសវត្សរ៍មកហើយ។
អង្គការ Gallup បានថ្លែងថា ការចុះថយការគាំទ្រនេះមាននៅទូទាំងក្រុមអ្នកបោះឆ្នោតច្រើនប្រភេទ។ អង្គការនេះបាននិយាយថា នៅពេលនេះការគាំទ្រលោក Trump ជាខ្លាំងដោយមានរួមបញ្ចូលពួកជនជាតិអាមេរិកាំងស្បែកសមិនមែនជាអំបូរ Hispanic ពួកបុរស ពួកពលរដ្ឋអាមេរិកាំងមានវ័យចំណាស់ ពួកអ្នកស្រុកក្នុងផ្នែកខាងត្បូងប្រទេស និងពួកជនគ្មានបរិញ្ញាប័ត្រពីមហាវិទ្យាល័យ»។
ពួកអ្នកស្ទង់មតិបាននិយាយថា លោក Trump នៅមានការគាំទ្រច្រើនក្នុងចំណោមជនជាតិអាមេរិកាំងស្បែកសគ្មានបរិញ្ញាប័ត្រពីមហាវិទ្យាល័យ ក៏ប៉ុន្តែតួលេខនេះបានចុះថយពីចំនួន៦៦ភាគរយកាលពីដើមឆ្នាំ។
ការគាំទ្រទូទៅដល់លោក Trump នៅក្នុងខែមិថុនានៅឆ្នាំមានការបោះឆ្នោតគឺស្រដៀងគ្នានឹងការគាំទ្រប្រធានាធិបតីពីរនាក់ដែលបានចាញ់នៅក្នុងការបោះឆ្នោតដើម្បីឱ្យបានកាន់តំណែងមួយអណត្តិទៀតក្នុងពេលបួនទសវត្សរ៍មុននេះគឺលោក Jimmy Carter កាលពីឆ្នាំ១៩៨០និងលោក George H. W. Bush ក្នុងឆ្នាំ១៩៩២៕
ប្រែសម្រួលដោយលោកឈឹម សុមេធ
