សហរដ្ឋអាមេរិកបានប្រកាសនៅថ្ងៃចន្ទនេះថា ការដាក់ទណ្ឌកម្មថ្មីដែលខ្លួននិង ប្រទេសមានឧស្សាហកម្មជឿនលឿនG 7ផ្សេងទៀតចាត់វិធានការប្រឆាំងនឹងរុស្ស៊ីគឺជាការឆ្លើយតបទៅនឹងសង្គ្រាមក្នុងប្រទេសអ៊ុយក្រែន រួមទាំងវិធានការកាត់រុស្ស៊ីពីការផ្គត់ផ្គង់សម្ភារៈ សេវាកម្មនានាដែលរុស្ស៊ីត្រូវការចាំបាច់លើវិស័យបច្ចេកវិទ្យានិងឧស្សាហកម្ម។
សេតវិមានបាននិយាយថា សហរដ្ឋអាមេរិកនឹងប្តេជ្ញាផ្តល់ទឹកប្រាក់៧,៥ពាន់លានដុល្លារ ដែលជាផ្នែកមួយនៃកិច្ចខិតខំប្រឹងប្រែងរបស់ប្រទេសមានឧស្សាហកម្មជឿនលឿន G-7 ដើម្បីជួយដល់ការចំណាយថវិការយៈពេលខ្លីដែលអ៊ុយក្រែនត្រូវការចាំបាច់ ហើយរដ្ឋាភិបាលនានានៃប្រទេសG-7 នឹងផ្តល់ការជួយជ្រោមជ្រែងផ្នែកសន្តិសុខរយៈពេលវែងដែលមិនធ្លាប់មាន ទៅឲ្យប្រទេសអ៊ុយក្រែន តាមរយៈការគាំទ្រផ្នែក
ហិរញ្ញវត្ថុ មនុស្សធម៌ យោធា និង ការទូតដរាបណាមានតម្រូវការ។
ការប្រកាសបែបនេះកើតឡើងនៅចំពេលដែលមេដឹកនាំប្រទេសមានឧស្សាហកម្មជឿនលឿន G-7 បានជួបប្រជុំគ្នាក្នុងប្រទេសអាល្លឺម៉ង់ ជាទីកន្លែងដែលក្រុមមេដឹកនាំទាំងនោះបានរង់ចាំសេចក្តីថ្លែងការណ៍ពីប្រធានាធិបតីអ៊ុយក្រែនលោក Volodymyr Zelenskyy។
ការដាក់ទណ្ឌកម្មបន្ថែមជាក់លាក់របស់សហរដ្ឋអាមេរិកគឺរួមទាំងការរារាំងក្រុមហ៊ុនសារជីវកម្មយោធារបស់រដ្ឋរុស្ស៊ី និង អង្គការស្រាវជ្រាវផ្នែកកងទ័ព ដោយកាត់បន្ថយសមត្ថភាពរុស្ស៊ីក្នុងការផលិតឡើងវិញគ្រឿងសព្វាវុធដែលរុស្ស៊ីបាត់បង់ក្នុងសង្គ្រាម ហើយហាមការនាំមាសពីរុស្ស៊ីចូលមកសហរដ្ឋអាមេរិក។
រុស្ស៊ីប្រឈមនឹងការខកខានសងបំណុលគឺដោយសារការដាក់ទណ្ឌកម្មលើសកម្មភាពហិរញ្ញវត្ថុរបស់ខ្លួនទាក់ទងនឹងការឆ្លើយតបប្រឆាំងនឹងការឈ្លានពានរបស់រុស្ស៊ីលើប្រទេសអ៊ុយក្រែនចាប់ផ្តើមកាលពីចុងខែកុម្ភ:៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានThe Associated Press និង Reuters)
