ការខឹងសម្បាកំពុងមានតទៅទៀតដោយសារការប្រកាសកាលពីថ្ងៃសុក្រដោយទីភ្នាក់ងារ FBI ដែលថា ខ្លួននឹងពិនិត្យសើរើមើលជាថ្មីនូវអ៊ីម៉ែលមួយចំនួនដែលអាចជាប់ទាក់ទងជាមួយការប្រើប្រាស់បណ្តាញអេឡិចត្រូនិចរបស់លោកស្រី Hillary Clinton កាលពីលោកស្រីនៅកាន់តំណែងជារដ្ឋមន្ត្រីការបរទេសស.រ.អា.។ ការពិនិត្យមើលអ៊ីម៉ែលរបស់លោកស្រីដោយទីភ្នាក់ងារ FBI បានបិទច្រើនខែមកហើយ។
លោក Tim Caine បេក្ខជនអនុប្រធានាធិបតីស.រ.អា.ខាងគណបក្សប្រជាធិបតេយ្យបានមានប្រសាសន៍នៅឯកម្មវិធី «សប្តាហ៍នេះ» របស់បណ្តាញទូរទស្សន៍អាមេរិកាំង ABC ថា «ការពិនិត្យជាថ្មីនេះនាំឱ្យមានការងឿងឆ្ងល់ខ្លាំងណាស់។ ខ្ញុំមិនយល់សោះអំពីសកម្មភាពទាំងនេះ។ សកម្មភាពបែបនេះមិនធ្លាប់មានពីពេលមុនសោះ»។
អ្នកស្រី Kellyanne Conway អ្នកចាត់ចែងកិច្ចការឃោសនាបោះឆ្នោតរបស់គណបក្សសាធារណរដ្ឋឱ្យលោក Donald Trump បាននិយាយនៅក្នុងកម្មវិធី «សប្តាហ៍នេះ» ដែរថា «ការសង្ស័យអំពីអំពើពុករលួយនេះនៅតែតាមលង Hillary Clinton ជានិច្ច។ ហើយសម្រាប់ FBI ដែលចាត់វិធានការដ៏ប្រសើរនេះក្នុងពេល១១ថ្ងៃមុនការបោះឆ្នោត មានន័យថាមានអ្វីខ្លះហើយក្នុងបញ្ហានេះ»។
សកម្មភាពរបស់ទីភ្នាក់ងារ FBI ក្នុងពេលតិចជាងពីរអាទិត្យមុនថ្ងៃបោះឆ្នោតបានបង្កើតឱ្យមានភាពវីវក់ខ្លះខាងនយោបាយ ពីព្រោះគេមិនដឹងអំពីសេចក្តីនិងភាពទាក់ទងនៃអ៊ីម៉ែលទាំងនេះទេ ហើយគេនៅតែមិនដឹងយល់អំពីការត្រួតពិនិត្យនេះនៅពេលដែលប្រជារាស្ត្រអាមេរិកាំងបោះឆ្នោតនៅថ្ងៃទី៨ ខែវិច្ឆិកា ខាងមុខនេះ។
លោកស្រី Clinton បេក្ខជនប្រធានាធិបតីអាមេរិកខាងគណបក្សប្រជាធិបតេយ្យបានមានប្រសាសន៍នៅក្នុងពេលឃោសនាបោះឆ្នោតមួយថា៖ «វាជាការចម្លែកមួយដែលលើកយកអ្វីមួយបែបនេះមកនិយាយ ដោយមានព័ត៌មានតែបន្តិចបន្តួចនៅមុនពេលបោះឆ្នោត»។
នៅពេលជាមួយគ្នានេះ លោក Trump បានចាប់យកឱកាសមួយដើម្បីគូសបញ្ជាក់បញ្ហាសំខាន់បំផុតនៃការវាយប្រហាររបស់លោកលើលោកស្រី Clinton។
បេក្ខជនប្រធានាធិបតីស.រ.អា.ខាងគណបក្សសាធារណរដ្ឋរូបនេះបាននិយាយថា៖ «ការបោះឆ្នោតឱ្យ Hillary ជាការបោះឆ្នោតមួយដើម្បីដាក់រដ្ឋាភិបាលយើងឱ្យចុះញ៉មអំពើពុករលួយសាធារណៈ ការពុករលួយ ការនិយមមិត្តភ័ក្តិជិតស្និទ្ធដែលគំរាមកំហែងការរស់រានរបស់រដ្ឋធម្មនុញ្ញយើងផ្ទាល់តែម្តង»៕
