ភ្ជាប់​ទៅ​គេហទំព័រ​ទាក់ទង

លោក​ស្រី​ Clinton៖ FBI ត្រូវ​បញ្ចេញ​ព័ត៌មាន​ទាំង​អស់​ទាក់ទិន​នឹង​អ៊ីម៉ែល​ឯកជន


បេក្ខជន​ប្រធានាធិបតី​គណបក្ស​ប្រជាធិបតេយ្យអ្នកស្រី Hillary Clinton ថ្លែង​នៅ​ក្នុង​ការជួបជុំ​មួយ​នៅ​ផ្សារទីក្រុង NewBo ក្នុង​ Cedar Rapids​ រដ្ឋ Iowa កាលពី​ថ្ងៃសុក្រ​ទី២៨ តុលា ២០១៦។

បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​លោកស្រី Hillary Clinton បាន​ថ្លែង​សុន្ទរកថា​អំពី​សេចក្តី​ប្រកាស​របស់​ទីភ្នាក់ងារ​ស៊ើប​អង្កេត​សហព័ន្ធ​ FBI ដែល​ថា​ខ្លួន​បាន​រក​ឃើញ​អ៊ីមែល​ថ្មីៗ​ទាក់​ទិន​នឹង​ការ​ប្រើ​ប្រាស់​ប្រព័ន្ធ​អ៊ីមែល​ឯកជន​ក្នុង​ពេល​ដែល​លោក​ស្រី​កាន់​តំណែង​ជា​រដ្ឋ​មន្ត្រី​ក្រសួង​ការបរទេស​ ហើយ​កំពុង​តែ​ត្រួត​ពិនិត្យ​ទៅ​លើ​ករណី​នេះ។

លោកស្រី​ Clinton បាន​បង្ហាញ​ខ្លួនកាលពី​ថ្ងៃ​សុក្រ​ត្រឹម​ប៉ុន្មាន​ម៉ោង​ប៉ុណ្ណោះ​មុន​នឹង​មាន​សេចក្តី​ប្រកាស​ដោយ​នាយក​ទីភ្នាក់​ងារ FBI លោក James Comey ដែល​បាន​ថ្លែង​ថា​អ៊ីមែល​ទាំង​នោះ​បាន​លេច​ឡើង​ ក្នុង​អំឡុង​ពេល​ធ្វើ​ការ​ស៊ើប​អង្កេត​មួយ​ផ្សេង​ទៀត​ដែល​អាច​ធ្វើ​ឲ្យ​ប៉ះពាល់​ដល់​លោកស្រី Clinton។

លោកស្រី Clinton បាន​អំពាវ​នាវ​ឲ្យ​ទីភ្នាក់ងារ FBI បញ្ចេញ​ព័ត៌មាន​ទាំង​អស់​ដែល​មាន​ជាប់​ទាក់​ទិន​ជា​មួយ​នឹង​ការ​ស៊ើប​អង្កេត​ទៅ​លើ​ការ​រក​ឃើញ​ថ្មី​នោះ។ លោកស្រី​បាន​ថ្លែង​ថា៖«យើង​អំពាវនាវ​ឲ្យ​ទីភ្នាក់ងារ FBI ចេញ​ផ្សាយ​ព័ត៌មាន​ទាំង​អស់​ដែល​ FBI មាន។ បើ​ទោះ​បី​ជា​លោក Comey នាយក​ FBI បាន​បង្ហាញ​ថា​ព័ត៌មាន​ថ្មី​ទាំង​នោះ​មិន​សំខាន់​ក៏​ដោយ គួរ​តែ​បង្ហាញ​ឲ្យ​ឃើញ​អ៊ីមែល​ទាំង​នោះ​ទៅ‍»។

លោក​ស្រី​ក៏​បាន​ថ្លែង​ថា លោក​ស្រី​មាន​ការ​ជឿជាក់​ថា​ការ​ពិនិត្យ​ពិច័យ​បន្ថែម​នេះ​នឹង​មិន​អាច​ផ្លាស់​ប្តូរ​សេចក្តី​សម្រេច​របស់​ទីភ្នាក់ងារ FBI ទៅ​លើ​ករណី​របស់​លោកស្រី​កាលពី​ខែ​កក្កដា​នោះ​ទេ។ ស្រប​ពេល​ជា​មួយ​គ្នា​នេះ​ដែរ​ លោក Comey បាន​ថ្លែង​ថា លោកស្រី​ Clinton ពិត​ជា​ធ្វេស​ប្រហែស​ខ្លាំង​ណាស់​ ដែល​លោក​ស្រី​បាន​រក្សា​អ៊ីមែល​រដ្ឋាភិបាល​នៅ​លើ​ប្រព័ន្ធ​អ៊ីមែល​ឯកជន ប៉ុន្តែ​លោក​ក៏​បាន​ថ្លែង​ទៀត​ថា​ មិន​មាន​ភស្តុតាង​ណា​មួយ​ដែល​ថា​លោក​ស្រី​បាន​ចែក​រំលែក​ព័ត៌មាន​សម្ងាត់​ជា​មួយ​នឹង​ភាគី​មិន​ស្រប​ច្បាប់​ដោយ​ចេតនា​ហើយ​ព្យាយាម​លាក់​បាំង​នោះ​គឺ​គ្មាន​នោះ​ទេ៕

XS
SM
MD
LG