ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ កូហ្វី​ អាណាន់ ​អតីត​អគ្គលេខាធិការ​អង្គការ​សហប្រជាជាតិ​បាន​ទទួល​មរណភាព​​​នា​ជន្មា​យុ ៨០ឆ្នាំ


រូបឯកសារ៖ លោក កូហ្វី អាណាន់ អតីត​អគ្គលេខាធិការ​អង្គការ​សហប្រជាជាតិ។

គ្រួសារ​របស់​លោក ​អាណាន់​ និង​អង្គការ​មូលនិធិ​របស់លោក​បាន​ប្រកាស​នៅ​លើ ​Twitter ​ថា ​លោក​«បាន​ស្លាប់​តាម​សម្រួល»​កាល​ពី​ថ្ងៃ​សៅរ៍ ​បន្ទាប់​ពី​មាន​ជំងឺ​រយៈ​ពេលខ្លី។ ​

ការ​ប្រកាស​នៅ​លើ ​Twitter ​នេះ​បាន​រៀប​រាប់​ថា លោកអាណាន់ ជា​«អ្នក​នយោបាយ​សកល​ និង​ជា​អ្នក​អន្តរជាតិ​និយម​ដ៏​សកម្ម​ម្នាក់​ដែល​បាន​តស៊ូ​ពេញ​មួយ​ជីវិត​របស់​លោក​សម្រាប់​ពិភព​លោក​មាន​យុត្តិធម៌ និង​សន្តិភាព​ជាង​មុន»។

ក្នុង​អំឡុង​ពេល​អាជីព​ដ៏ល្បីល្បាញ​របស់​លោក​ជា​អ្នក​ដឹក​នាំ​របស់​អង្គការ​សហ​ប្រជាជាតិ​លោក​ គឺជា​ជើង​ឯក​នៃ​សន្តិភាព​និង​ការ​អភិវឌ្ឍ​ប្រកប​ដោយ​និរន្តរភាព ​សិទ្ធិ​មនុស្ស​និង​នីតិរដ្ឋ។ ​

លោក ​Antonio Guterres ​អគ្គលេខាធិការ​អង្គការ​សហ​ប្រជា​ជាតិ​នាបច្ចុប្បន្ននេះ​ បាន​រៀបរាប់​អំពី​លោក អាណាន់​ ថា​ជា​«កម្លាំង​ដឹក​នាំ​សម្រាប់​រឿង​ល្អ» ​ហើយ​លោក​បាន​និយាយ​ថា ​«ទោះ​ជា​ក្នុង​កាលៈ​ទេសៈ​ណា​ក៏​ដោយ​ ​លោក​ កូហ្វី អាណាន់ ​គឺជា​អង្គការ​សហ​ប្រជាជាតិ»។​

លោក​ កូហ្វី អាណាន់ ​កើត​នៅ​ក្នុង​ប្រទេស​ហ្កាណា។ ​លោក​ជា​ជន​ជាតិ​អាហ្វ្រិក​ស្បែកខ្មៅ​ដំបូង​ដែល​ដឹកនាំ​អ.ស.ប.​ពីឆ្នាំ១៩៩៧​ដល់​ឆ្នាំ​២០០៦។​

លោក​ក៏​ជា​អគ្គលេខាធិការ​ទីមួយ​ដែល​ចេញពី​ឋានៈ​ជា​បុគ្គលិក​អ.ស.ប.។​ ក្នុង​នាម​ជា​អគ្គលេខាធិការ​អ.ស.ប.​ លោក​ អាណាន់ ​បាន​បង្កើត​មូលនិធិ​សកល​ប្រយុទ្ធ​នឹង​ជំងឺ​អេដស៍ជំងឺ​របេង​និង​ជំងឺ​គ្រុន​ចាញ់ ​និង​ការ​អនុម័ត​យុទ្ធសាស្ត្រដំបូងអង្គការ​សហ​ប្រជាជាតិ​ប្រឆាំង​ភេរវ​កម្ម។ ​ហើយ​ក្នុង​អាណត្តិ​របស់​លោក​ ​ប្រទេស​ជា​សមាជិក​បាន​ទទួល​យក​«ការទទួល​ខុស​ត្រូវ​ក្នុង​ការ​ការពារ»​ប្រឆាំង​អំពើ​ប្រល័យ​ពូជសាសន៍ ​ឧក្រិដ្ឋកម្ម​សង្គ្រាម​ ការ​ប្រល័យ​ជនជាតិ​ ​និង​ឧក្រិដ្ឋកម្ម​ប្រឆាំង​នឹង​មនុស្សជាតិ។

​បេសកកម្ម​អ៊ុនតាក់​នៅ​ប្រទេស​កម្ពុជា​ក៏​បាន​កើត​មាន​ឡើង​ក្នុង​អាណត្តិ​របស់​លោក​ដែរ៕

XS
SM
MD
LG