លោក Kofi Annan អតីតអគ្គលេខាធិការអ.ស.ប.បានទទួលអនិច្ចកម្មហើយក្នុងជន្មាយុ៨០ឆ្នាំ។បើតាម tweet មួយមកពីមូលនិធិ Kofi Annan ថាលោកបានស្លាប់នៅក្រោយមាន«ជំងឺមួយក្នុងរយៈពេលខ្លី»។
លោក Annan ជាជនជាតិអាហ្រិ្វកស្បែកខ្មៅទីមួយដែលជាមេដឹកនាំរបស់អង្គការពិភពលោកនេះដោយលោកបានបម្រើការពីឆ្នាំ១៩៩៧ទៅដល់ឆ្នាំ២០០៦។ លោកក៏ជាអគ្គលេខាធិការដំបូងគេដែលបានលេចចេញពីជួរបុគ្គលិកអ.ស.ប.ដែរ។
កាលពីឆ្នាំ២០០១ លោកបានទទួលរង្វាន់ Nobel សន្តិភាពរួមគ្នាជាមួយអ.ស.ប.សម្រាប់ការងារខាងមនុស្សធម៌។ លោក Kofi Annan និងលោកស្រី Nane ជាភរិយាលោកមានកូនបីនាក់៕
