លោក Rex Tillerson រដ្ឋមន្ត្រីការបរទេសអាមេរិក នៅក្នុងដំណើរទស្សនកិច្ចទៅកាន់ប្រទេសមីយ៉ាន់ម៉ា បានសម្តែងការព្រួយបារម្ភទៅលើសេចក្តីរាយការណ៍ដែលគួរឲ្យទុកចិត្តបាននានា ជុំវិញការកើនឡើងអំពើឃោរឃៅរបស់កងកម្លាំងសន្តិសុខនិងក្រុមការពារសណ្តាប់ធ្នាប់ក្នុងសហគមន៍នៅក្នុងរដ្ឋ Rakhine ប៉ុន្តែលោកបាននិយាយថា ការដាក់ទណ្ឌកម្មសេដ្ឋកិច្ចទូទៅ លើប្រទេសមួយនេះមិនមែនជារឿងដែលគួរធ្វើនោះទេ។
លោក Tillerson បានមានប្រសាសន៍ថា «ខ្ញុំមើលមិនឃើញថា ការដាក់ទណ្ឌកម្មអាចជួយដោះស្រាយវិបត្តិនេះបានឡើយ»។ លោកនិយាយសំដៅទៅលើអ្វីដែលអង្គការសហប្រជាជាតិហៅថា «ជាការបោសសម្អាតជាតិសាសន៍» របស់ជនជាតិភាគតិចរ៉ូហ៊ីងយ៉ា កាន់សាសនាឥស្លាម ហើយលោកបានបន្ថែមថា «ការដាក់ទណ្ឌកម្មទៅលើបុគ្គល «ប្រហែលជាសាកសក្តិជាង»។ លោកបានថ្លែងយ៉ាងដូច្នេះនៅទន្ទឹមជាមួយនឹងលោកស្រី អង់សាន ស៊ូជី ដែលជាមេដឹកនាំតាមជាក់ស្តែងរបស់មីយ៉ាន់ម៉ា។
លោកបាននិយាយថា «យើងចង់ឃើញប្រទេសមីយ៉ាន់ម៉ាទទួលបានជោគជ័យ»។លោកបានប្រកាសថា សហរដ្ឋអាមេរិកនឹងផ្តល់ប្រាក់៤៧លានដុល្លារបន្ថែមទៀតដើម្បីជួយដល់ជនភៀសខ្លួនរ៉ូហ៊ីងយ៉ា ដែលធ្វើឲ្យទឹកប្រាក់សរុបឡើងដល់៨៧លានដុល្លារក្នុងឆ្នាំនេះ។
លោក Tillerson បានហៅទិដ្ឋភាពនៅក្នុងរដ្ឋ Rakhine ថាគួរឲ្យរន្ធត់ ហើយជំរុញឲ្យមីយ៉ាន់ម៉ាធ្វើទៅតាមអនុសាសន៍នៃរបាយការណ៍មួយដែលដឹកនាំដោយអតីតអគ្គលេខាធិការអង្គការសហប្រជាជាតិ លោក Kofi Annan ដែលរួមមានទាំងការបង្កើតមាគ៌ាមួយដើម្បីផ្តល់សញ្ជាតិពេញលេញដល់ជនជាតិភាគតិចរ៉ូហ៊ីងយ៉ាផងដែរ។
លោកស្រី អង់សាន ស៊ូជី បានឆ្លើយតបទៅវិញដោយថ្លែងអំណរគុណចំពោះលោក Tillerson ដែលបានទទួលស្គាល់ស្ថានភាពលំបាកនេះ និងបើកចិត្តទូលាយចំពោះបញ្ហានេះ៕
