ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រោយ​​ជ័យ​ជម្នះ​ភ្លូកទឹកភ្លូកដី​ ​លោក​ ​ហ៊ុន សែន​ ​អំពាវនាវ​កុំ​ឱ្យ​មាន​ការ​ប្រកាន់​ខឹង​គ្នា​រវាង​អ្នក​ទៅ​និង​មិន​ទៅ​បោះ​ឆ្នោត


រូបឯកសារ៖ លោក​នាយករដ្ឋ​មន្រ្តី​​ ហ៊ុន សែន កំពុង​ថ្លែង​មុន​នឹង​​ការ​ធ្វើ​យុទ្ធនាការ​ឃោសនា​បោះ​ឆ្នោត​ថ្ងៃ​ចុងក្រោយ​របស់​គណបក្ស​កាន់​អំណាច​គឺ​គណបក្ស​ប្រជាជន​កម្ពុជា​​នៅ​ក្នុង​រាជធានី​ភ្នំពេញ​ចាប់ផ្តើម​កាលពី​ព្រឹក​ថ្ងៃទី​២៧ កក្កដា ​សម្រាប់​ការ​បោះឆ្នោត​ជាតិ​អាណត្តិ​ទី​០៦​ដែល​នឹង​ប្រព្រឹត្តទៅ​នៅ​ថ្ងៃទី​២៩ ខែ កក្កដា ឆ្នាំ​២០១៨ ខាង​មុខ​ក្នុង​ប្រទេស​កម្ពុជា។(ទុំ ម្លិះ/VOA)

ខណៈ​សហគមន៍​អន្តរជាតិ​មួយ​ចំនួនកំពុង​រិះគន់​ការ​បោះ​ឆ្នោត​នៅ​កម្ពុជា​ថាជាការ​បោះ​ឆ្នោត​ដែល​មិន​អាច​ទទួល​យក​បាន លោក​នាយក​រដ្ឋ​មន្ត្រី​ ​ហ៊ុន សែន​ ​នៅ​ថ្ងៃ​ព្រហស្បតិ៍​នេះ​ ​បាន​អង្វរ​ដល់​ប្រជា​ពលរដ្ឋ​ខ្មែរ​​ទាំង​អស់​ដែល​បាន​ទៅ​បោះ​ឆ្នោតនិង​មិន​បាន​ទៅ​បោះ​ ​​កុំ​មាន​ការ​រើសអើង និង​ស្អប់ខ្ពើម​គ្នា។

នៅ​ក្នុង​ថ្ងៃ​ទី​ពីរ​នៃ​ការ​បង្ហាញ​ខ្លួន​ជា​សាធារណៈ​ក្រោយ​ទទួល​ជ័យជម្នះ​ភ្ល្លូកទឹកភ្លូកដី​ ​លោក​នាយក​រដ្ឋ​មន្ត្រី​ ​ហ៊ុន សែន​ ​នៅ​ថ្ងៃ​ព្រហស្បតិ៍​នេះ​ ​បាន​អង្វរពលរដ្ឋ​ខ្មែរ​ទាំង​អស់​កុំ​រើសអើង​និង​ស្អប់ខ្ពើម​គ្នា​ ​ជៀសវាង​ការ​បង្ក​ឲ្យ​មាន​ជម្លោះ​ណា​មួយ​កើត​ឡើង​ ​រវាង​អ្នក​បាន​ទៅ​បោះ​ឆ្នោត​ ​និង​មិន​ទៅ​បោះ​ឆ្នោត។​

ក្នុង​ពិធី​សំណេះ​សំណាល​ជា​មួយ​កម្មករ​ ​កម្មការិនី​ក្នុង​ខណ្ឌ​មាន​ជ័យ​ ​រាជធានី​ភ្នំពេញ​ នៅ​ព្រឹក​ថ្ងៃទី​០២​ ​ខែ​សីហា​ ​ឆ្នាំ​២០១៨​នេះ​ ​លោក​នាយក​រដ្ឋ​មន្ត្រី​ថ្លែង​ថា​ ​លោក​សូម​អង្វរ​ដល់​ប្រជា​ពលរដ្ឋដែល​បាន​ទៅ​បោះ​ឆ្នោត ​សូម​កុំ​ប្រកាន់នឹង​អ្នក​មិន​បាន​ទៅ​បោះ​ឆ្នោត​ ​និង​ថា​អ្នក​ដែល​មិន​បាន​ទៅ​បោះ​ឆ្នោត​ ​សូម​កុំ​ចោទ​អ្នក​ដែល​ទៅ​បោះ​ឆ្នោត​ថា​ជា​ជន​បរទេស។​

ថ្លែង​ទៅ​កាន់​កម្មករ​-​កម្មការិនី​ក្នុង​ជំនួប​ជា​ថ្មី​លើក​ទី១​ក្រោយ​ការ​បោះ​ឆ្នោត​ ​លោក​នាយក​រដ្ឋ​មន្ត្រី ​ដែល​បានប្រកាស​ត្រៀម​ខ្លួន​កាន់​អំណាច​បន្ត​៥ឆ្នាំ​ទៀតបញ្ជាក់​ថា៖​

«ខ្ញុំ​សូម​អង្វរករ​ចំពោះ​ប្រជា​ពលរដ្ឋរបស់​យើង​ ​ចំពោះ​កម្មករ​ ​កម្មការិនី​របស់​យើង​មិន​ត្រូវ​ធ្វើ​ការ​រើស​អើង​ណា​មួយ​ចំពោះ​អ្នក​ដែល​បាន​ទៅ​បោះ​ឆ្នោត​ ​និង​អ្នក​ដែល​មិន​បាន​ទៅ​បោះ​ឆ្នោត​នោះ​ទេ​ ​[…]​ ទោះ​បី​ហេតុ​ផល​ដោយ​កត្តា​ធុរៈ​ផ្ទាល់ខ្លួន​និង​ដោយ​កត្តា​នយោបាយ​ក៏​ដោយ​ចុះ​ ​មេត្តា​សុំ​កុំ​ធ្វើ​ការ​រើស​អើង​ ​និង​ការ​ស្អប់ខ្ពើម​គ្នា​ ​ដែល​អាច​បង្កើត​ឲ្យ​មាន​ជម្លោះ​នៅ​តាម​ភូមិ​ឃុំ​ ​ក៏​ដូចជា​ជម្លោះ​នៅ​តាម​សហគមន៍​នានា​ ​រាប់​ទាំង​ជម្លោះ​តាម​រោង​ចក្រដែល​អាច​មើល​មុខ​គ្នា​មិន​ត្រង់»។

លោក​នាយក​រដ្ឋ​មន្ត្រី​ ​ក៏​បាន​អរគុណ​ដល់​ប្រជា​ពលរដ្ឋ​ ​និង​កម្មករ​កម្មការិនី​ទាំង​អស់​ដែល​បាន​ទៅ​បោះ​ឆ្នោត​ ​ថា​បាន​ចូល​រួម​គាំទ្រ​ដំណើរ​ការ​លទ្ធិ​ប្រជាធិបតេយ្យ​នៅ​កម្ពុជា។​ ​

លោក​ក៏​បាន​លើក​ឡើង​ថា​ ​ការ​បោះ​ឆ្នោត​ឆ្នាំ​២០១៨​ ​មាន​ភាព​ស្ងប់ស្ងាត់​ ​និង​សុខ​សុវត្ថិភាព​ ​ខុស​គ្នា​ឆ្ងាយ​ទៅ​នឹង​ការ​បោះ​ឆ្នោត​ឆ្នាំ​២០១៣​ ​ដែល​ពោរ​ពេញ​ដោយ​ភាព​ច្របូក​ច្របល់​ ​និង​ការ​ភិតភ័យ​សម្រាប់​ប្រជា​ពល​រដ្ឋ។​

កម្ពុជា​ទើប​នឹង​បញ្ចប់​ការ​បោះ​ឆ្នោត​ជ្រើស​តាំង​តំណាងរាស្ត្រ​អាណត្តិ​ទី៦​ ​ដោយ​មិន​មាន​ការ​ចូល​រួម​ពី​គណ​បក្សសង្គ្រោះជាតិ​ ​ដែល​ជា​គណ​បក្សទទួល​បាន​ការ​គាំទ្រ​ពី​ប្រជា​ពលរដ្ឋជាង​៤០​ភាគរយ​នៅ​ទូ​ទាំងប្រទេស​ ​កាលពី​ការ​បោះ​ឆ្នោត​ឆ្នាំ​២០១៧​កន្លង​ទៅ។​

​លទ្ធផល​បឋម​នៃ​ការ​បោះ​ឆ្នោត​កាលពី​ថ្ងៃ​អាទិត្យ​បង្ហាញ​ថា​ ​ក្នុង​ចំណោម​ពលរដ្ឋ​ដែល​មាន​ឈ្មោះ​ក្នុង​បញ្ជី​បោះ​ឆ្នោត​ជាង​៨​លាន​៣​សែន​នាក់​ ​មាន​ជិត​៧​លាន​នាក់ ឬ​ស្មើ​នឹង​ជិត​៨៣%​ ​បានបោះ​ឆ្នោត។​

គណ​បក្សប្រជាជន​កម្ពុជា​របស់​លោក​ ​ហ៊ុន សែន​ ​ដែល​ដឹក​នាំ​ប្រទេស​អស់​រយៈ​ពេល​ជាង​៤០ឆ្នាំ​មក​ហើយ​នោះ​ ​ទទួល​បាន​សំឡេង​ឆ្នោត​យ៉ាង​ច្រើន​លើស​លុប​ ​និង​កំពុង​ឈាន​ទៅ​គ្រប់​គ្រង​រដ្ឋសភា​ជាតិ​ដោយ​ឯក​បក្ស​ ​ក្នុង​ពេល​ឆាប់ៗ។​

នៅ​មុន​ការ​បោះ​ឆ្នោត​ ​លោក​ ​ហ៊ុន សែន​ ​បាន​អំពាវនាវ​ឲ្យ​ប្រជា​ពលរដ្ឋទៅ​បោះ​ឆ្នោត​ឲ្យ​បាន​គ្រប់​គ្នា ដោយ​រួម​ទាំង​ការ​ព្រមាន​ថា​អ្នក​ដែល​មិន​ទៅ​បោះ​ឆ្នោត​ តែ​យក​ទឹក​ថ្នាំ​ខ្មៅ​មក​លាប​ដៃ​បន្លំ​ថា​បាន​ទៅ​បោះ​ ​ត្រូវ​ប្រឈម​នឹង​ការ​មាន​ទោស​ ​ព្រម​ទាំង​ការ​ចាត់​វិធានការ​ផ្លូវ​ច្បាប់​មួយ​ចំនួន លើ​អ្នក​ដែល​បង្ហោះ​សារ​ថា​មិន​ទៅ​បោះ​ឆ្នោត​ជា​ដើម។ ​

​លោក​ ​សម រង្ស៊ី​ ​អតីត​ប្រធាន​គណ​បក្សសង្គ្រោះជាតិ​ ​និង​ជា​ប្រធាន​ចលនា​សង្គ្រោះជាតិ​ដែល​កំពុង​រស់​នៅ​ប្រទេស​បារាំង​ ​ថ្លែង​ក្នុង​កម្មវិធី​ ​Hello VOA​ ​ពិសេស​នៅ​យប់​ថ្ងៃ​ពុធ​នេះ​ថា តួ​លេខ​នៃ​ចំនួន​ប្រជា​ពលរដ្ឋចេញ​ទៅ​បោះ​ឆ្នោត​ ​និង​តួ​លេខ​ផ្សេងៗ​ពាក់​ព័ន្ធនឹង​ការ​បោះ​ឆ្នោត​ ​គឺ​សុទ្ធ​តែ​ជា​តួ​លេខ​ក្លែង​ក្លាយ ដែល​លោក​ថា​ ​ជា​ការ​រៀបចំ​ដោយ​គណ​បក្សកាន់​អំណាច​ប៉ុណ្ណោះ។​

លោក​ ​សម រង្ស៊ី​ ​ដែល​តែង​អំពាវនាវ​ឲ្យ​ពលរដ្ឋ​កុំ​ទៅ​បោះ​ឆ្នោត​ ​ដោយ​ថា​ ​ការ​បោះ​ឆ្នោត​នោះ​គឺជា​ការ​បោះ​ឆ្នោត​ក្លែង​ក្លាយ បាន​និយាយ​ថា៖​

«ស្រុក​ខ្មែរ​ឥលូវ​ក្រោម​ការ​ដឹក​នាំ​របស់​លោក​ ​ហ៊ុន សែន​ ​លទ្ធិ​ប្រជាធិបតេយ្យ​ក៏​ក្លែង​ក្លាយ​ ​នីតិរដ្ឋ​ក៏​ក្លែង​ក្លាយ អភិវឌ្ឍន៍​ក៏​ក្លែង​ក្លាយ បោះ​ឆ្នោត​ក៏​ក្លែង​ក្លាយ ដូច្នេះ​គាត់​ធ្វើ​អ្វី​ក៏​ក្លែង​ក្លាយ​ទាំង​អស់។​ ​អញ្ចឹង​ហើយ​បាន​អន្តរជាតិ​គេ​ថា​ល្មម​ហើយ​ ​ល្មម​ឈប់​ល្បែង​ហ្នឹង​ហើយ​ ​ធ្វើ​អ្វី​ធ្វើ​ឲ្យ​ពិត​ប្រាកដ។​ ​ហើយ​អ្វី​ដែល​យើង​ចង់​បានដើម្បី​ដោះ​ស្រាយបញ្ហា​នោះ​ ​គឺ​ឈប់​បោះ​ឆ្នោត​ក្លែង​ក្លាយ​ ​លុប​ចោល​ទៅ​អា​លទ្ធផល​បោះ​ឆ្នោត​ក្លែង​ក្លាយ​កាលពី​ថ្ងៃ​អាទិត្យ​ហ្នឹង​ ​គឺ​រៀបចំ​ការ​បោះ​ឆ្នោត​មែន​ទែន»។​

លោក​ ​ហង្ស ពុទ្ធា​ ​អ្នក​នាំ​ពាក្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត​ ​(គ.ជ.ប)​ ​ប្រាប់​ ​VOA​ ​កាល​ពី​ថ្ងៃ​ពុធ​ថា​ ​នឹង​មិន​មាន​ការ​បោះ​ឆ្នោត​ឡើង​វិញ​សម្រាប់​អាណត្តិ​ទី៦​នេះ​ឡើយ​ ​ទោះ​បី​ជា​មាន​ប្រតិកម្ម​ពី​មជ្ឈដ្ឋាន​មួយ​ចំនួន​ដែល​មិន​ទទួល​ស្គាល់​លទ្ធផល​នៃ​ការ​បោះ​ឆ្នោត​នេះ​ក៏​ដោយ។​

​តុលា​ការ​កំពូល​កាលពី​ពាក់​កណ្ដាល​ខែ​វិច្ឆិកា​ឆ្នាំ​២០១៧​ ​បាន​រំលាយ​គណ​បក្សសង្គ្រោះជាតិ​ទៅ​តាម​បណ្ដឹង​របស់​ក្រសួង​មហា​ផ្ទៃ​ ​ដោយ​ចោទ​ថា​ ​គណ​បក្សនេះ​បាន​ឃុបឃិត​ជា​មួយ​បរទេស​ ​រៀបចំ​គម្រោង​ផ្ដួល​រំលំ​រដ្ឋាភិបាល​ដែល​ដឹក​នាំ​ដោយ​លោក ហ៊ុន សែន។​

​ចំណែក​នៅ​ថ្ងៃ​ព្រហស្បតិ៍​នេះ​ ​លោក​នាយក​រដ្ឋ​មន្ត្រី​ ​ហ៊ុន សែន​ ​ក៏​បាន​ប្រកាស​ថា​ ​ការ​រំលាយ​គណ​បក្សសង្គ្រោះជាតិ​ ​គឺ​ជា​ការ​បញ្ចៀស​សង្គ្រាម​នៅ​កម្ពុជា។​

​យ៉ាង​ណា​ក៏​ដោយ​គេ​ឃើញ​ថា​ ​ក្រោយ​ការ​បោះ​ឆ្នោត​ដែល​មិន​មាន​វត្ត​មាន​គណ​បក្សសង្គ្រោះជាតិ ស្ថាប័ន​ ​និង​សហគមន៍​អន្តរជាតិ​មួយ​ចំនួន​ដែល​ប្រកាន់​យក​របប​លទ្ធិ​ប្រជាធិបតេយ្យ​ ​បាន​ចេញ​សេចក្ដី​ថ្លែង​ការណ៍​រិះគន់​ជា​បន្ត​បន្ទាប់។ សហរដ្ឋ​អាមេរិក អូស្ត្រាលី កាណាដា នូវែលសេឡង់​ ​បារាំង អាល្លឺម៉ង់ និង​សហភាព​អឺរ៉ុប បាន​ចោទ​សួរ​អំពី​ភាព​ស្រប​ច្បាប់​នៃ​ការ​បោះ​ឆ្នោត​ដែល​បាន​កើត​មាន​ជា​មួយ​នឹង​ការ​រំលាយ​គណ​បក្សសង្គ្រោះជាតិ​ ​និង​ការ​បង្ក្រាប​អង្គការ​សង្គម​ស៊ី​វិល និង​ប្រព័ន្ធផ្សព្វផ្សាយ​ឯករាជ្យ​នានា​ ​នៅ​មុន​ការ​បោះ​ឆ្នោត។​

ក្រុម​មន្ត្រី​រដ្ឋាភិបាល​កម្ពុជា​និង​គ.ជ.ប តែង​ច្រាន​ចោល​ការ​រិះគន់​របស់​អន្តរ​ជាតិ​ថា​មិន​បាន​ឆ្លុះ​បញ្ចាំង​ពី​ការ​ពិត​ ​និង​ថា​រដ្ឋាភិបាល​កម្ពុជា​ ​និង គ.ជ.ប​ ​បាន​អនុ​វត្តទៅ​តាម​ច្បាប់​ ​ស្រប​តាម​លទ្ធិ​ប្រជាធិបតេយ្យ​នៅ​កម្ពុជា​ប៉ុណ្ណោះ។​

ក្រសួង​ការ​បរទេស​កម្ពុជា​កាលពី​ថ្ងៃ​ទី៣១​ ​ខែ​កក្កដា​ ​ក៏​បាន​ចេញ​សេចក្ដី​ថ្លែង​ការណ៍​មួយ​សម្ដែង​ការ​សោកស្ដាយ​ចំពោះ​រដ្ឋាភិបាល​នៃ​ប្រទេស​ដែល​រិះគន់​ការ​បោះ​ឆ្នោត​នៅ​កម្ពុជា​ ​ថា​មិន​បាន​បញ្ជូនអ្នក​សង្កេត​ការណ៍​មក​សង្កេត​មើល​ការ​បោះ​ឆ្នោត​ ​ប៉ុន្តែ​បែរ​ជា​ប្រកាស​ថា​ ​ការ​បោះ​ឆ្នោត​នេះ​មិន​សេរី​ ​និង​មិន​យុត្តិធម៌​ទៅ​វិញ៕​

XS
SM
MD
LG