សហរដ្ឋអាមេរិកបានរកឃើញអ្នកឆ្លងវីរុសកូវីដ១៩ បំប្លែងថ្មីអូមីក្រុង (Omicron) ជាលើកដំបូងនៅក្នុងរដ្ឋ California។ នេះបើតាមការបញ្ជាក់របស់មន្ត្រីសុខាភិបាលអាមេរិកកាលពីថ្ងៃពុធម្សិលមិញ។
អ្នកឆ្លងវីរុសនេះ បានត្រឡប់មកកាន់សហរដ្ឋអាមេរិកវិញពីប្រទេសអាហ្វ្រិកខាងត្បូងកាលពីថ្ងៃទី ២២ ខែវិច្ឆិកា និងត្រូវបានធ្វើតេស្តឃើញថា ឆ្លងវីរុសនេះកាលពីថ្ងៃចន្ទកន្លងទៅ។ នេះបើតាមការបញ្ជាក់របស់លោកវេជ្ជបណ្ឌិត Anthony Fauci ដែលជាអ្នកជំនាញកំពូលផ្នែកជំងឺឆ្លងរបស់សហរដ្ឋអាមេរិក និងជាទីប្រឹក្សាចម្បងផ្នែកវេជ្ជសាស្ត្ររបស់ប្រធានាធិបតីអាមេរិកលោក Joe Biden។
លោក Fauci បាននិយាយថា អ្នកឆ្លងវីរុសនេះ មានរោគសញ្ញាតិចតួច ហើយបានធ្វើចត្តាឡីស័កខ្លួនឯង និងបានប្រសើរជាងមុនហើយ។ អ្នកជំងឺរូបនេះ បានចាក់វ៉ាក់សាំងកូវីដ១៩ ពេញលេញរួចហើយ តែមិនទាន់បានចាក់ដូសជំរុញនៅឡើយទេ។
លោក Fauci ក៏បានបន្ថែមផងដែរថា អ្នកដែលបានពាក់ព័ន្ធជាមួយនឹងអ្នកជំងឺរូបនេះ បានធ្វើតេស្តឃើញថា មិនមានឆ្លងវីរុសនេះទេ។
គិតទាំងសហរដ្ឋអាមេរិក ឥឡូវនេះមានប្រទេសយ៉ាងតិចចំនួន ២៤ នៅលើពិភពលោក ដែលមានករណីឆ្លងវីរុសកូវីដ១៩ បំប្លែងថ្មីអូមីក្រុងនេះ៕
