ប្រធានាធិបតីសហរដ្ឋអាមេរិកលោក Joe Biden បានអំពាវនាវជាថ្មីម្តងទៀតនៅថ្ងៃចន្ទនេះឱ្យពលរដ្ឋ អាមេរិកាំងចាក់វ៉ាក់សាំងបង្ការជំងឺកូវីដ១៩ ឬចាក់ដូសជំរុញនៃវ៉ាក់សាំងនេះ ប្រសិនបើពួកគេ បានចាក់ដូសទីមួយ និងដូសទីពីររួចហើយ។
ការអំពាវនាវរបស់លោក Biden នេះ បានធ្វើឡើង ស្របពេលដែលទីប្រឹក្សាជាន់ខ្ពស់ផ្នែកវេជ្ជសាស្ត្ររបស់លោកបាននិយាយថា វីរុសកូវីដ១៩ បំប្លែងថ្មីអូមីក្រុង (Omicron) ដែលគេបានរកឃើញដំបូងនៅប្រទេសអាហ្វ្រិកខាងត្បូងនេះ មិនយូរមិនឆាប់នឹងមានវត្តមាននៅក្នុងសហរដ្ឋអាមេរិក។
លោក Biden បានថ្លែងក្នុងសុន្ទរកថាខ្លីមួយពីសេតវិមានទៅកាន់ពលរដ្ឋអាមេរិកាំងប្រមាណ ៦០ លាននាក់ដែលនៅមិនទាន់បានចាក់វ៉ាក់សាំងកូវីដ១៩ ថា៖ «អ្នកមិនត្រូវរង់ចាំនោះទេ។ ប្រសិនបើអ្នកមិនទាន់បានចាក់វ៉ា់ក់សាំងកូវីដ១៩ សូមរួសរាន់ឡើងដើម្បីទៅចាក់វ៉ាក់សាំងនេះ»។
ប៉ុន្តែលោកបានលើកឡើងថា នៅពេលនេះលោកជឿថា ការបិទអាជីវកម្មឬសាលារៀនដោយសារតែការគំរាមកំហែងនៃវីរុសកូវីដ១៩ អូមីក្រុងនេះ គឺមិនចាំបាច់នោះទេ។
លោក Biden បានបញ្ជាក់បន្ថែមថា លោកនឹង «ប្រឹងឱ្យអស់លទ្ធភាព» ដើម្បីទប់ទល់នឹងវីរុសបំប្លែងថ្មីនេះ។ មន្ត្រីសុខាភិបាលអាមេរិកបានបង្ហាញនូវក្តីសង្ឃឹមថា អ្នកដែលបានចាក់វ៉ាក់សាំងកូវីដ១៩ រួចហើយអាចមានភាពស៊ាំប្រឆាំងនឹងវីរុសបំប្លែងថ្មីនេះបាន បើទោះបីជាអ្នកវិទ្យាសាស្ត្រនៅកំពុងសិក្សាអំពីហានិភ័យនៃវីរុសនេះក៏ដោយ។
លោក Biden បានហាមឃាត់ជើងហោះហើរមកពីប្រទេសអាហ្វ្រិកខាងត្បូង និងប្រទេសចំនួន ៧ ផ្សេងទៀតនៅទ្វីបអាហ្វ្រិក មិនឱ្យចូលមកសហរដ្ឋអាមេរិក ចាប់ពីថ្ងៃចន្ទម្សិលមិញមក។
លោកវេជ្ជបណ្ឌិត Anthony Fauci ដែលជាអ្នកជំនាញជាន់ខ្ពស់ផ្នែកជំងឺឆ្លងរបស់សហរដ្ឋអាមេរិក បានបញ្ជាក់ក្នុងកម្មវិធី «Good Morning America» របស់ទូរទស្សន៍ ABC ថា អ្នកវិទ្យាសាស្ត្រសង្ឃឹមថា នឹងសិក្សាស្វែងយល់នៅសប្ដាហ៍ក្រោយឬពីរសប្តាហ៍ខាងមុខ អំពីប្រសិទ្ធភាពនៃវ៉ាក់សាំងកូវីដ១៩ ក្នុងការទប់ទល់នឹងវីរុសបំប្លែងថ្មីអូមីក្រុងនេះ និងអំពីកម្រិតគ្រោះថ្នាក់របស់វីរុសនេះ៕
