ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជោគ​វាសនា​​ជន​ភៀស​ខ្លួន​៨៥០​នាក់​ស្ថិត​ក្នុង​ភាព​មិន​ប្រាកដ​ប្រជា​​ក្រោយ​ពេលបិទ​​ជំរំ​ជន​ភៀស​ខ្លួន​អូស្រ្តាលី


រូបឯកសារ៖ ក្រុម​អ្នក​ស្វែង​រក​សិទ្ធិ​ជ្រកកោន​នៅ​ឯ​មណ្ឌល​ឃុំឃាំង​កោះ​ Manus ក្នុង​ប្រទេស ​ប៉ាពួ នូហ្គីណេ។
រូបឯកសារ៖ ក្រុម​អ្នក​ស្វែង​រក​សិទ្ធិ​ជ្រកកោន​នៅ​ឯ​មណ្ឌល​ឃុំឃាំង​កោះ​ Manus ក្នុង​ប្រទេស ​ប៉ាពួ នូហ្គីណេ។

មន្ត្រី​រដ្ឋាភិបាល​អូស្ត្រាលី​កំពុង​តែ​សម្រេច​ថា​ ត្រូវ​ធ្វើ​យ៉ាង​ណា​ចំពោះ​ជន​ភៀស​ខ្លួន​រាប់​រយ​នាក់​ដែល​ស្ថិត​ក្នុង​មជ្ឈមណ្ឌល​ឃុំ​ឃាំង​ក្នុង​ប្រទេស​ប៉ាពួ នូហ្គីណេ ក្រោយ​ពេល​រដ្ឋាភិបាល​ប្រទេស​ទាំង​ពីរ ឯកភាព​គ្នា​បិទ​មជ្ឈ​មណ្ឌល​ឃុំឃាំង​ដ៏​ចម្រូង​ចម្រាស​នេះ។

តុលាការ​កំពូល​របស់ ប៉ាពួ នូហ្គីណេ បាន​សម្រេច​កាល​ពី​ខែ​មេសា​កន្លង​ទៅ​ថា ជំរំ​ជន​ភៀស​ខ្លួន​មួយក្នុង​ចំណោម​ជំរំ​ទាំង​ពីរ​របស់​អូស្ត្រាលី​នៅ​លើ​កោះ​ Manus មហា​សមុទ្រ​ប៉ាស៊ីហ្វិក​ខាង​ត្បូង​មិន​មាន​លក្ខណៈ​សម​ស្រប​ជាមួយ​ច្បាប់​រដ្ឋ​ធម្មនុញ្ញ​ប៉ាពួ នូហ្គីណេ​ឡើយ។

ការ​ប្រកាស​បិទ​ជំរំ​ជន​ភៀស​ខ្លួន​នៅ​លើ​កោះ Manus ត្រូវ​បាន​ធ្វើ​ឡើង​កាល​ពី​ថ្ងៃ​ពុធ​កន្លង​ទៅ តាម​រយៈ​សេចក្ដី​ថ្លែងការណ៍​របស់​លោក​នាយក​រដ្ឋមន្ត្រី ភីតធើ អូនៀល (Peter O'Neill) ដែល​បាន​ឲ្យ​ដឹង​ថា កិច្ច​ព្រម​ព្រៀង​នេះ​ត្រូវ​បាន​សម្រេច​ក្រោយ​ការ​ប្រជុំ​ជាមួយ​រដ្ឋ​មន្ត្រី​ក្រសួង​អន្តោ​ប្រវេសន៍​អូស្ត្រាលី លោក ភីតធើ ដាត់​តុន (Peter Dutton) នៅ​រដ្ឋ​ធានី Port Moresby ប្រទេស​ប៉ាពួ នូហ្គីណេ។

មាន​ការ​ចោទ​ជា​សំណួរ​ថា តើ​នឹង​មាន​អ្វី​កើត​ឡើង​ចំពោះ​ទី​លំនៅ​របស់​ជន​ភៀស​ខ្លួន​ប្រមាណ ៨៥០ នាក់​នៅ​ជំរុំ​នោះ? មន្ត្រី​ជាន់​ខ្ពស់​ប្រចាំ​ទីក្រុង​កង់បេរ៉ា​ ប្រទេស​អូស្ត្រាលី​បាន​និយាយ​ថា មជ្ឈមណ្ឌល​ឃុំ​ឃាំង​នឹង​មិន​ត្រូវ​បាន​គេ​បិទ​ភ្លាមៗ​នោះ​ទេ។ ហើយថា ​ជន​ភៀស​ខ្លួន​ទាំង​អស់​នឹង​មិន​ត្រូវ​បាន​តាំង​ទី​លំនៅ​ក្នុងប្រទេស​អូស្ត្រាលី​ឡើយ។ ជន​ភៀស​ខ្លួន​ទាំង​នោះ​ភាគ​ច្រើន​មក​ពី​ប្រទេស​ អាហ្វហ្គានីស្ថាន​ អ៊ីរ៉ង់ អ៊ីរ៉ាក់ និង​ស៊ីរី ដូច្នេះ​ហើយ​បាន​ជា​ក្រុម​សិទ្ធិ​មនុស្ស​មួយ​ចំនួន​យល់​ឃើញ​ថា ការ​ធ្វើ​មាតុ​ភូមិ​និវត្តន៍​ដោយ​ស្ម័គ្រ​ចិត្ត​ទំនង​ជា​មិន​អាច​កើត​មាន​ឡើយ។

ពួក​គេ​អាច​នឹង​ត្រូវ​បាន​ផ្ទេរ​ទៅ​កាន់​ជំរំ​មួយ​ទៀត​ដែល​ឧបត្ថម្ភ​ដោយ​ប្រទេស​អូស្ត្រាលី មាន​ទីតាំង​នៅ​ក្នុង​ឈូង​សមុទ្រនៅ​លើ​កោះ Nauru ជា​កោះ​តូច​មួយដែល​ថ្មីៗនេះ​ទើប​តែ​លេច​ចេញ​ព័ត៌មាន​ជុំវិញការ​ចោទ​ប្រកាន់​ទាក់​ទិន​នឹង​ការ​រំលោភ​បំពាន​អ្នក​ជាប់​ឃុំ​ជា​ច្រើន ក្នុង​នោះ​មាន​ទាំង​កុមារ​ផង​ដែរ។ កាល​ពី​ពេល​កន្លង​ទៅ​ រដ្ឋាភិបាល​ទីក្រុង​កង់បេរ៉ា​ បាន​ស្នើប្រទេស​កម្ពុជា និង​ម៉ាឡេស៊ី​ឲ្យ​ទទួល​យក​អ្នក​សុំ​សិទ្ធិ​ជ្រក​កោន​ទាំង​នោះ។ ប្រទេស​នូវែលហ្សេឡង់​ក៏​បាន​ស្នើ​ផ្ដល់​ជម្រក​ដល់​ជន​ជាប់ឃុំ ដែល​នៅ​ក្នុង​ជំរំ​ជន​ភៀស​ខ្លួន​នៃ​ប្រទេស​ទី​បី​ទាំង​នោះ​ផង​ដែរ។

រដ្ឋ​មន្ត្រី​ក្រសួង​អន្តោ​ប្រវេសន៍​អូស្រ្តាលី លោក ភីតធើ ដាត់​តុន (Peter Dutton) សង្ឃឹម​ថា ​គ្រួសារ​ជា​ច្រើន​ដែល​រស់​នៅ​លើ​កោះ​ Manus នឹង​សម្រេច​ចិត្ត​ធ្វើ​មាតុភូមិ​និវត្តន៍​ដោយ​ស្ម័គ្រ​ចិត្ត ដូច​គ្នា​ទៅ​នឹង​ករណី​ដែល​បាន​កើត​ឡើង​ពី​អតីត​កាល​។

លោក ដាត់​តុន (Dutton) បាន​និយាយ​ថា៖ «យើង​ផ្ដល់​ប្រាក់​ជំនួយ​រាប់​ម៉ឺន​ ដុល្លារ​របស់​អ្នក​ជាប់​ពន្ធ ដើម្បី​ផ្ដល់​ជា​កញ្ចប់ ជួយ​ដល់​ជន​ភៀស​ខ្លួន​ទាំង​នោះ ឲ្យ​ត្រឡប់​ទៅ​ប្រទេស​កំណើត​របស់​ពួក​គេ​វិញ ហើយ​ជន​ភៀស​ខ្លួន​រាប់​រយ​នាក់​ទទួល​យក​វិធី​នេះ​រួច​ទៅ​ហើយ។ ឥឡូវ​នេះ ដូច​ករណី​ប្រជាជន​មួយ​ចំនួន​មក​ពី ប្រទេស​ស្រីលង្កា វៀតណាម និង​ប្រទេស​ជា​ច្រើន​ទៀត​ដូចជា​ឥណ្ឌា ពួក​យើង​ចាត់​វិធាន​ការ​រួច​ហើយ​ថា ប្រសិន​បើ​អ្នក​ទាំង​នោះ​ត្រូវ​បាន​គេ​រក​ឃើញ​ថា​មិន​មែន​ជា​ជន​ភៀស​ខ្លួន​ពិត​ប្រាកដ ហើយ​ពួក​គេ​បដិសេធ​មិន​ត្រឡប់​ទៅ​ប្រទេស​កំណើត​របស់​ខ្លួន​វិញ​ ពួក​គេ​អាច​នឹង​ត្រូវ​បង្ខំ​ឲ្យ​ត្រឡប់​ទៅ​វិញ។ ​ឧទាហរណ៍​ សម្រាប់​ករណី​ប្រជាជន​អ៊ីរ៉ង់ វា​មិន​ដូច​គ្នា​ឡើយ។ ជន​ភៀស​ខ្លួន​អ៊ីរ៉ង់​ព្រម​ទទួល​យក​ការ​ផ្ដល់​ឲ្យ​នេះ​ដោយ​ស្ម័គ្រ​ចិត្ត មិន​បង្ខំ ហើយ​ពួក​គេ​រាប់​រយ​នាក់​បាន​ស្ម័គ្រ​ចិត្ត​ត្រឡប់​ទៅ​ប្រទេស​អ៊ីរ៉ង់​វិញ។ ប៉ុន្តែ​ឥឡូវ​នេះ​ប្រជាជន​នៅ​លើ​កោះ Nauru កំពុង​តែ​សម្រេច​ចិត្ត​ឲ្យ​អ្នក​ដែល​នៅ​លើ​កោះ Manus និយាយ​ថា​ ពួក​គេ​មិន​ចង់​ត្រឡប់​ទៅ​វិញ​ទេ បើ​ទោះបី​ជា ​ពួក​គេ​ត្រូវ​បាន​គេ​រក​ឃើញ​ថា​មិន​មែន​ជា​ជន​ភៀស​ខ្លួន​ពិត​ប្រាកដ​ក៏​ដោយ​ ហើយ​នេះ​ជា​ស្ថាន​ភាព​ដែល​យើង​មិន​អាច​ទទួល​យក»។

កាល​ពី​ខែ​មេសា ចៅក្រម ប៉ាពួ នូហ្គីណេ បាន​និយាយ​ថា ​ការ​ឃុំ​ឃាំង​ជន​ភៀស​ខ្លួន​នៅ​លើ​កោះ Manus គឺ​ជា​អំពើ​ខុស​ច្បាប់។ នៅ​ក្នុង​កិច្ច​ប្រជុំ​ថ្នាក់​មន្រ្តី​ជាន់​ខ្ពស់​នៅ​រដ្ឋធានី Port Moresby កាល​ពី​ថ្ងៃ​ពុធ មាន​ការ​ទទួល​ស្គាល់​មួយ​ធ្វើ​ឡើង​ដោយ​ភាគី​អូស្ត្រាលី និងប៉ាពួ នូហ្គីណេ​ថា​ សេចក្ដី​សម្រេច​របស់​តុលាការ​គឺ​ជា​ការ​សម្រេច​ចុង​ក្រោយ ហើយ​ជំរំ​ជន​ភៀស​ខ្លួន​នោះ​នឹង​ត្រូវ​បិទ ទោះ​ជាកាល​បរិច្ឆេទ​មិន​ទាន់​ត្រូវ​បាន​គេ​កំណត់​ច្បាស់​លាស់​យ៉ាង​ណា​ក៏​ដោយ។

អ្នក​ស្វែង​រក​សិទ្ធិ​ជ្រក​កោន​ដែល​បាន​មក​ដល់​ដែន​ទឹក​អូស្ត្រាលី​ដោយ​ទូក​ត្រូវ​បាន​គេ​បញ្ជូន​ទៅ​ជំរំ​ជន​ភៀស​ខ្លួន​នៅ​តំបន់​មហា​សមុទ្រ​ប៉ាស៊ីហ្វិក​ភាគ​ខាង​ត្បូង​ ​ជា​កន្លែង​ដែលសំណើ​របស់​ជន​ភៀស​ខ្លួន​ត្រូវ​បាន​គេ​ត្រួតពិនិត្យ។

រដ្ឋាភិបាល​ក្រុង​កង់បេរ៉ា​ ទទូច​ថា គោល​នយោបាយ​របស់​ខ្លួន​ក្នុង​ការ​បញ្ជូន​ជន​ភៀស​ខ្លួន​ទៅ​កាន់​ប្រទេស​ទី​បី​ គឺ​ជា​គោលបំណង​ជួយ​សង្គ្រោះ​ជីវិត​ជន​ភៀស​ខ្លួន​តាម​ដែន​សមុទ្រ ដោយ​កំញើញ​ជន​អន្តោប្រវេសន៍​ដទៃ​ទៀត។ អ្នក​ធ្វើ​យុទ្ធនាការ​ជន​ភៀស​ខ្លួន​បាន​និយាយ​ថា ​ស្ថាន​ភាព​នៅ​ក្នុង​ជំរំ​ជន​ភៀស​ខ្លួន​មាន​សភាព​អមនុស្សធម៌ ហើយ​រដ្ឋាភិបាល​អូស្ត្រាលី​កំពុង​តែ​ព្រងើយ​កន្តើយ​នឹង​ជន​ងាយ​រង​គ្រោះ និង​កំពុង​តែ​ស្រែក​ឃ្លាន​ជំនួយ៕

ប្រែ​សម្រួល​ដោយ​ សឿន វឌ្ឍនា

អត្ថបទ​ទាក់ទង

XS
SM
MD
LG