អតីតអភិបាលខេត្តតាកែវ លោក ឡាយ វណ្ណៈ ដែលត្រូវបានឃាត់ខ្លួនកាលពី៥ឆ្នាំមុន ត្រូវបានព្រះមហាក្សត្រព្រះរាជទានលើកលែងទោស ក្រោម«សិទ្ធិពិសេស» ដែលមិនតម្រូវឱ្យទណ្ឌិតជាប់ទោសក្នុងពន្ធនាគារចំនួនពីរភាគបីនៃទោសសិន មុននឹងត្រូវលើកលែងទោស។ នេះបើយោងតាមព្រះរាជក្រឹត្យ ចុះថ្ងៃទី៦ ខែមេសា ឆ្នាំ២០២៣ និងការអះអាងរបស់មន្រ្តីជាន់ខ្ពស់នៃក្រសួងយុត្តិធម៌។
ការលើកលែងទោសនេះធ្វើឡើងតាមសំណើរបស់លោកនាយករដ្ឋមន្រ្តី ហ៊ុន សែន។
លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់វីអូអេនៅថ្ងៃសុក្រនេះថា ការលើកលែងទោសលោក ឡាយ វណ្ណៈ ជាសិទ្ធិពិសេសមួយរបស់ព្រះមហាក្សត្រ តាមរយៈសំណើរបស់នាយករដ្ឋមន្រ្តី ក្នុងការស្នើលើកលែងទោសដល់ទណ្ឌិតណាមួយ និងក្នុងពេលណាក៏បាន ដោយមិនចាំបាច់បំពេញតាមលក្ខខណ្ឌតម្រូវឱ្យជាប់ទោសពីរភាគបីឡើយ។
លោកថ្លែងថា៖ «នេះជាករណីដោយឡែកមួយទៀតដែលជាសិទ្ធិរបស់ព្រះមហាក្សត្រក្នុងការលើកលែងទោសដល់ទណ្ឌិតណាមួយ តាមការស្នើសុំរបស់នាយករដ្ឋមន្រ្តី ផ្អែកលើរដ្ឋធម្មនុញ្ញ និងច្បាប់ស្តីពីការគ្រប់គ្រងពន្ធនាគារ។ អាហ្នឹងគឺជាសិទ្ធិពិសេសដែលធ្វើឡើងនៅពេលណាក៏បានដែរ ចំពោះទណ្ឌិតណាក៏បានដែរ ដោយមូលហេតុជាក់ស្តែង តម្រូវការចាំបាច់ណាមួយ»។
ប៉ុន្តែគេមិនទាន់ដឹងនៅឡើយទេថាហេតុអ្វីបានជាលោក ឡាយ វណ្ណៈ ដែលត្រូវបានចោទប្រកាន់ពីបទធ្វើឃាតនារីកំណាន់ ត្រូវបានលើកលែងទោស ក្រោមសិទ្ធិពិសេសនេះ។
លោក ឡាយ វណ្ណៈ ត្រូវបានតុលាការកំពូលសម្រេចផ្តន្ទាទោសដាក់ពន្ធនាគារចំនួន១៣ឆ្នាំ កាលពីខែធ្នូ ឆ្នាំ២០២១ ក្រោមបទចោទ «ឃាតកម្ម» នៅក្នុងសំណុំរឿងស្រ្តីម្នាក់ ដែលគេឃើញស្លាប់ ដោយចងកភ្ជាប់នឹងចម្រឹងបង្អួចក្នុងខេត្តតាកែវ កាលពីខែមករា ឆ្នាំ២០១៨។ សមត្ថកិច្ចបញ្ជាក់ថា ការស្លាប់នេះមិនមែនជាការធ្វើអត្តឃាតទេ ប៉ុន្តែជាឃាតកម្មលើស្រ្តីកំណាន់របស់លោក ឡាយ វណ្ណៈ ដែលមានឈ្មោះថា ចេវ សុវឌ្ឍនា។
នៅមុនពេលចាប់ខ្លួន លោក ឡាយ វណ្ណៈ ធ្លាប់បានបង្ហោះសារភ្ជាប់នឹងរូបថតស្និទ្ធស្នាលជាច្រើនសន្លឹកជាមួយអ្នកស្រី ចេវ សុវឌ្ឍនា លើគណនីហ្វេសប៊ុករបស់លោក ដែលបញ្ជាក់ថា លោកពិតជាមានទំនាក់ទំនងស្នេហាជាមួយនឹងស្ត្រីឈ្មោះ ចេវ សុវឌ្ឍនា ពិតមែន។ ទោះជាយ៉ាងណា លោកបានបដិសេធថា លោក និងបងប្រុសរបស់លោក មិនបានប្រព្រឹត្តអំពើមនុស្សឃាតនោះទេ និងថា ការស្លាប់របស់អ្នកស្រី ចេវ សុវឌ្ឍនា គឺមកពីការធ្វើអត្តឃាត ក្រោយលោកសុំផ្តាច់ទំនាក់ទំនងគ្នា។
បងប្រុសរបស់លោក ឡាយ វណ្ណៈ គឺលោក ឡាយ ណារិទ្ធ អតីតស្នងការរងនគរបាលខេត្តតាកែវ ក៏ត្រូវបានកាត់ទោសឱ្យជាប់ពន្ធនាគារ១០ឆ្នាំផងដែរ នៅក្នុងសំណុំរឿងនេះ។
ប្រសិនបើមិនមានសិទ្ធិពិសេសសម្រាប់លើកលែងទោសនេះទេ លោក ឡាយ វណ្ណៈ ត្រូវជាប់ពន្ធនាគារយ៉ាងតិច៨ឆ្នាំកន្លះសិន មុននឹងត្រូវលើកលែងទោសបាន។ រហូតមកដល់ពេលនេះ លោកជាប់ពន្ធនាគារបាន៥ឆ្នាំ គិតចាប់តាំងពីថ្ងៃចាប់ខ្លួនកាលពីដើមខែមេសា ឆ្នាំ២០១៨។
មាត្រា៧៧នៃច្បាប់ស្តីពីពន្ធនាគារចែងថា ក្នុងករណីចាំបាច់ ប្រមុខរាជរដ្ឋាភិបាលមានបុព្វសិទ្ធិធ្វើសំណើថ្វាយព្រះមហាក្សត្រសុំលើកលែងទោសឱ្យទណ្ឌិតនៅពេលណាក៏បាន។
លោក នុត សវនា អ្នកនាំពាក្យនៃអគ្គនាយកដ្ឋានពន្ធនាគារ ដែលជាស្ថាប័នស្ថិតនៅក្រោមក្រសួងមហាផ្ទៃ ប្រាប់វីអូអេនៅថ្ងៃសុក្រនេះថា លោករង់ចាំដីកាដោះលែងរបស់តុលាការជាមុនសិន មុននឹងអនុញ្ញាតឱ្យលោក ឡាយ វណ្ណៈ ចេញពីពន្ធនាគារ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ប្រាប់វីអូអេនៅថ្ងៃសុក្រនេះថា ការលើកលែងទោសលោក ឡាយ វណ្ណៈ ដែលជាប់ពាក់ព័ន្ធនឹងឃាតកម្ម អាចរងការរិះគន់ខ្លះដែរ ខណៈអ្នកទោសមនសិការ និងអ្នកនយោបាយមួយចំនួនទៀតដែលកំពុងជាប់ឃុំឃាំង មិនត្រូវបានលើកលែងទោស ដូចទណ្ឌិតដែលពាក់ព័ន្ធនឹងរឿងឃាតកម្ម៕
