កាលពីថ្ងៃពុធ សហភាពអឺរ៉ុប និងសមាគមប្រជាជាតិអាស៊ីអាគ្នេយ៍ (អាស៊ាន) បានព្រមព្រៀងគ្នានៅក្នុងកិច្ចប្រជុំកំពូលលើកដំបូងអំពីតម្រូវការនៃទំនាក់ទំនងសេដ្ឋកិច្ចកាន់តែស៊ីជម្រៅ និងការគោរពឯករាជ្យភាព និងបូរណភាពដែនដីរបស់ប្រទេសអ៊ុយក្រែន។
មេដឹកនាំនៃប្រទេសជាសមាជិកសហភាពអឺរ៉ុបចំនួន ២៧ និងមេដឹកនាំអាស៊ានចំនួន ៩ ប្រទេស ក្នុងចំណោម ១០ ប្រទេស ត្រូវបានអញ្ជើញឱ្យចូលរួមក្នុងពិធីរំឭកខួប ៤៥ ឆ្នាំនៃទំនាក់ទំនងការទូត ប៉ុន្តែប្រទេសមីយ៉ាន់ម៉ាដែលគ្រប់គ្រងដោយយោធា មិនត្រូវបានអនុញ្ញាតឱ្យចូលរួមទេ។
មេដឹកនាំនានាបានពិភាក្សាអំពីកិច្ចសហប្រតិបត្តិការនាពេលអនាគត រួមទាំងពាណិជ្ជកម្ម អន្តរកាលនៃការពង្រឹងវិស័យថាមពលស្អាត និងឌីជីថល និងវិស័យសុខាភិបាល។ សហភាពអឺរ៉ុប និងអាស៊ានបានចុះកិច្ចព្រមព្រៀងរួចហើយ ដើម្បីអនុញ្ញាតឱ្យក្រុមហ៊ុនអាកាសចរណ៍របស់ប្លុកទាំងពីរ ពង្រីកសេវាកម្មកាន់តែងាយស្រួល។
ប្រធានគណៈកម្មការអឺរ៉ុបនៃសហភាពអឺរ៉ុប លោកស្រី Ursula von der Leyen បានប្រកាសពីការប្តេជ្ញាចិត្តចំណាយថវិកាចំនួន ១០ ពាន់លានអឺរ៉ូ គឺស្មើ ១០,៦៥ ពាន់លានដុល្លារ សម្រាប់ការវិនិយោគលើហេដ្ឋារចនាសម្ព័ន្ធក្នុងតំបន់អាស៊ីអាគ្នេយ៍ ដល់ឆ្នាំ ២០២៧ ដោយផ្តោតលើគម្រោងថាមពលស្អាត និងភាពផ្សារភ្ជាប់គ្នាទៅវិញទៅមក។
សហភាពអឺរ៉ុបចង់ពង្រីកទំនាក់ទំនងពាណិជ្ជកម្មរបស់ខ្លួន បន្ថែមលើកិច្ចព្រមព្រៀងពាណិជ្ជកម្មសេរីជាមួយសិង្ហបុរី និងវៀតណាម និងចរចាជាមួយឥណ្ឌូណេស៊ី។
សហភាពអឺរ៉ុប និងអាស៊ានគឺជាដៃគូពាណិជ្ជកម្មធំជាងគេទីបីរវាងគ្នា ហើយនេះគឺជាកិច្ចប្រជុំកំពូលលើកដំបូងក្នុងប្រវត្តិសាស្ត្ររវាងប្លុកទាំងពីរ។ លោកស្រី Von der Leyen និងនាយករដ្ឋមន្ត្រីកម្ពុជា លោក ហ៊ុន សែន បានថ្លែងថា គោលដៅធំបំផុតគឺកិច្ចព្រមព្រៀងពាណិជ្ជកម្មសេរីពីតំបន់ទៅតំបន់។
ប្លុកទាំងពីរបានបញ្ជាក់ពីការប្តេជ្ញាចិត្តគោរពតាមសណ្តាប់ធ្នាប់អន្តរជាតិដោយផ្អែកលើច្បាប់។ សហភាពអឺរ៉ុបបានបង្ហាញចំណាប់អារម្មណ៍ចំពោះសេចក្តីថ្លែងការណ៍មួយដែលចាត់ទុកសង្គ្រាមនៅអ៊ុយក្រែនជាទង្វើឈ្លានពានរបស់រុស្ស៊ី។ ហើយសេចក្តីថ្លែងការណ៍ចុងបញ្ចប់នៃកិច្ចប្រជុំកំពូលនេះបានបន្ទរនូវអ្វីដែលបានព្រមព្រៀងគ្នាដោយមេដឹកនាំនៃក្រុមប្រទេសមានសេដ្ឋកិច្ចជឿនលឿនចំនួន ២០ ឬ G20 ក្នុងកិច្ចប្រជុំដែលដឹកនាំដោយប្រទេសឥណ្ឌូណេស៊ីដែលជាសមាជិកអាស៊ានកាលពីខែមុន។ ប្លុកទាំងពីរបាននិយាយថា «សមាជិកភាគច្រើន» បានថ្កោលទោសសង្គ្រាម និងទទួលស្គាល់ការឈឺចាប់របស់មនុស្សលោកដែលបង្កឡើងដោយសង្គ្រាមនេះ។
សេចក្តីថ្លែងការណ៍របស់សហភាពអឺរ៉ុបនិងអាស៊ាន បានឲ្យដឹងថា៖ «មានទស្សនៈផ្សេងទៀត និងការវាយតម្លៃផ្សេងៗគ្នាអំពីស្ថានភាព និងការដាក់ទណ្ឌកម្ម។ សម្រាប់ប្រជាជាតិទាំងអស់ យើងបន្តបញ្ជាក់ជាថ្មីទៀតនូវតម្រូវការគោរពអធិបតេយ្យភាព ឯករាជ្យភាពខាងនយោបាយ និងបូរណភាពដែនដីអ៊ុយក្រែន»។
ប្រទេសសិង្ហបុរីកំពុងដាក់ទណ្ឌកម្មលើរុស្ស៊ី រីឯប្រទេសឡាវ ថៃ និងវៀតណាមបានបោះឆ្នោតអនុបវាទនៅក្នុងការបោះឆ្នោតរបស់អង្គការសហប្រជាជាតិកាលពីខែតុលាស្តីពីការថ្កោលទោសលើការទាមទាររបស់រុស្ស៊ីយកតំបន់មួយចំនួនរបស់ប្រទេសអ៊ុយក្រែន។
សេចក្តីថ្លែងការណ៍នៃកិច្ចប្រជុំកំពូលនេះក៏បានសង្កត់ធ្ងន់លើសារៈសំខាន់នៃសន្តិភាពនៅតំបន់សមុទ្រចិនខាងត្បូង ហើយបានបង្ហាញការព្រួយបារម្ភយ៉ាងខ្លាំងអំពីរដ្ឋប្រហារយោធាកាលពីខែកុម្ភៈ ឆ្នាំ ២០២១ នៅក្នុងប្រទេសមីយ៉ាន់ម៉ា និង «ការព្រួយបារម្ភយ៉ាងខ្លាំង» អំពីអស្ថិរភាពនៅឧបទ្វីបកូរ៉េ៕
