នាយករដ្ឋមន្រ្តីនៃប្រទេសអេត្យូពីលោក Abiy Ahmed Ali បានឈះពានរង្វាន់ណូប៊ែលសន្តិភាពសម្រាប់ស្នាដៃនៃកិច្ចប្រឹងប្រែងរបស់លោកក្នុងការបង្កើតសន្តិភាពជាមួយនឹងប្រទេសអេរីទ្រេដែលនៅជិតខាង។
លោកស្រី Berit Reiss-Andersen ប្រធានគណកម្មាធិការពានរង្វាន់ណូប៊ែលសន្តិភាពដែលមានសមាជិក៥រូបជាជនជាតិន័រវេសបានថ្លែងថា លោក Abiy ត្រូវបានគណៈកម្មាធិការសម្រេចផ្តល់ពានរង្វាន់នេះជូន ដោយសារគំនិតផ្តួចផ្តើមរបស់លោកក្នុងការបញ្ចប់ជម្លោះរវាងប្រទេសរបស់លោកជាមួយនឹងប្រទេសអេរីទ្រេក្នុងរយៈពេលប៉ុន្មានខែនៃការចូលកាន់តំណែងរបស់លោកកាលពីឆ្នាំ២០១៨។
គណៈកម្មាធិការពានរង្វាន់ណូប៊ែលបានគូសបញ្ជាក់ថា លោក Abiy បានប្រើពេល១០០ថ្ងៃដំបូងរបស់លោក ក្នុងនាមជានាយករដ្ឋមន្រ្តីដកស្ថានភាពអាសន្នចេញពីប្រទេស លើកលែងទោសដល់អ្នកទោសនយោបាយរាប់ពាន់នាក់ បញ្ឈប់ការត្រួតពិនិត្យលើបណ្តាញផ្សព្វផ្សាយ ធ្វើឲ្យក្រុមប្រឆាំងដែលនៅក្រៅច្បាប់ក្លាយជាក្រុមស្របច្បាប់ បណ្តេញមេដឹកនាំយោធា និងមេដឹកនាំស៊ីវិលណាដែលត្រូវបានសង្ស័យថាមានជាប់ពាក់ព័ន្ធនឹងអំពើពុករលួយ និងបង្កើនឥទ្ធិពលស្រ្តីនៅក្នុងការងារនយោបាយនិងនៅតាមសហគមន៍ក្នុងប្រទេសអេត្យូពី។
គណៈកម្មាធិការបានទទួលស្គាល់ថា ស្នាដៃដ៏ច្រើនសន្ធឹកសន្ធាប់របស់លោកទាំងនេះនៅតែជួយដល់ការពង្រឹងលទ្ធិប្រជាធិបតេយ្យក្នុងប្រទេសអេត្យូពី ក៏ដូចជាមានក្តីសង្ឃឹមថា កិច្ចព្រមព្រៀងសន្តិភាពជាមួយប្រទេសអេរីទ្រេនឹងធ្វើឲ្យមានការផ្លាស់ប្តូរជាវិជ្ជមានសម្រាប់ប្រទេសទាំងពីរ។
គណៈកម្មាធិការណូប៊ែលសន្តិភាពក៏បានទទួលស្គាល់ចំពោះកិច្ចប្រឹងប្រែងរបស់លោក Abiy នៅក្នុងដំណើរការសន្តិភាពនិងការសម្របសម្រួលនៅតំបន់អាហ្វ្រិកខាងកើតនិងតំបន់ភាគឦសាននៃទ្វីបអាហ្វ្រិកផងដែរ។
ពានរង្វាន់ណូប៊ែលផ្នែកវិទ្យាសាស្ត្រសេដ្ឋកិច្ចនឹងត្រូវប្រកាសនៅថ្ងៃចន្ទទី១៤ ខែតុលា ខាងមុខនេះ៕
