ក្រុមអ្នកអភិរក្សនៅប្រទេសហ្ស៊ីមបាវ៉េបានព្រមានថា ការទន្រ្ទានយកតំបន់ដីសើមមកធ្វើការអភិវឌ្ឍហេដ្ឋារចនាសម្ព័ន្ធ និងការប្រើប្រាស់ច្រាំងទន្លេនៅក្នុងតំបន់នេះ គំរាមកំហែងដល់ការគ្រប់គ្រងប្រព័ន្ធទឹកក្រោមដី និងការប្រើប្រាស់ធនធានផ្សេងៗទៀត។ ពួកគេបាននិយាយថា មនុស្សបានធ្វើឲ្យបញ្ហានេះកាន់តែធ្ងន់ធ្ងរឡើងដោយសារការផ្លាស់ប្តូរទីលំនៅពីជនបទមកទីក្រុង។
ក្នុងចំណោមអ្នកផ្លាស់ប្តូរទីលំនៅទាំងនោះ មានលោក Zivai Muchichwe ដែលមានកូន៣នាក់ផងដែរ។ លោក Muchichwe និយាយថា លោកបានសាងសង់ផ្ទះរបស់លោកនៅលើតំបន់ដីសើមនេះបីឆ្នាំមកហើយ ខណៈដែលទីក្រុងHarareបានប្រយុទ្ធទប់ទល់នឹងលំហូរប្រជាពលរដ្ឋដែលធ្វើចំណាកស្រុកពីជនបទ។ លោកបានថ្លែងបន្តទៀតថា ផ្នែកខ្លះនៃផ្ទះរបស់លោកបានប្រេះ និងដួលរលំ។
លោក Muchichwe បានថ្លែងថា លោកកំពុងតែរង់ចាំអាជ្ញាធរប្រាប់លោកថា តើលោកនឹងត្រូវនៅទីនោះជាអចិន្រ្តៃយ៍ ឬ យ៉ាងណា ខណៈពេលដែលគម្រោងអាគារត្រូវស្តារឡើងវិញ។ លោកបន្តទៀតថា អគារនេះ ត្រូវបានសាងសង់ឡើងដោយប្រញាប់ប្រញាល់និងដោយប្រើប្រាស់សម្ភារៈថោកៗ ហើយនឹងដោយសារទីតាំងនេះមានទឹកនៅក្រោមដី។
លោក Muchichwe ពោលទៀតថា៖
«ពួកលោកគិតថា ពួកលោកនឹងនៅទីនេះតែ១ឆ្នាំប៉ុណ្ណោះ»។
អាជ្ញាធរទីក្រុង Harare ប្រកាសថាពួកគេ នឹងចាប់ផ្តើមកំណត់របបទឹកដោយសារតែកម្រិតទឹកទាប។ អ្នកស្រី Dorothy Wakeling សមាជិការបស់ក្រុមអភិរក្សតំបន់ដីសើម និយាយថា អ្នកស្រី មិនមានការភ្ញាក់ផ្អើលចំពោះសេចក្តីប្រកាសនោះទេ។ អ្នកស្រីថា មនុស្សកំពុងតែលុកលុយតំបន់ដីសើម ដែលតំបន់នោះជាផ្លូវបង្ហូរទឹកទៅក្នុងទន្លេ និងបឹងបួរ។
អ្នកស្រី Dorothy Wakeling ថ្លែងថា៖
«បើយើងមិនមានដីសើមនេះទេ ហើយយើងអនុវត្តឯកវប្បកម្មទៀត យើងនឹងជួបបញ្ហា។ ហើយយើង បានបាត់បង់ឱកាសដើម្បីឲ្យទឹកជ្រាបចូលទៅក្រោមដី ដែលនេះ គឺជាអ្វីដែលធម្មជាតិបានរៀបចំអោយ។ វាមិនមែនកើតឡើងដោយចៃដន្យនោះទេ។ ហើយឥឡូវយើងកំពុងតែបោះបង់វា ដោយទៅសាងសង់អាគារពីលើតំបន់ដីសើមនេះ ដែលតំបន់ដីសើមនេះ គឺជាប្រភពសម្រាប់ផ្តល់ទឹកដល់ពួកយើង។ ពួកយើងមិនអាចយកទឹកតាមវិធីផ្សេងទេ»។
កុ្រមអ្នកអភិរក្សសង្ឃឹមថា រដ្ឋាភិបាលរបស់លោកប្រធានាធិបតី Emmerson Mnangagwa មិនអនុញ្ញាតិឲ្យមានការសាងសង់នៅលើតំបន់ដីសើម Monavale ទេ ពីព្រោះតំបន់នេះ ផ្ទុកទឹកភាគច្រើននៃទឹកទាំងអស់របស់ក្រុងហារ៉ារ៉េ។
លោក Steady Kangata នៃទីភ្នាក់ងារបរិស្ថានរបស់ប្រទេសហ្ស៊ីមបាវ៉េបាននិយាយថា ទីភ្នាក់ងាររបស់លោក កំពុងតែធ្វើការដើម្បីធានាថា ការរំខានតំបន់ដីសើមនិងច្រាំងទន្លេ នឹងមានចំនួនតិចតួចបំផុត។
«ពួកយើងមិនត្រូវមានភាពអាត្មានិយមទេ នៅពេលដែលមានបញ្ហាទាក់ទងនឹងបរិស្ថាន។ ពួកយើង កំពុងតែជំរុញអ្នកទាំងឡាយណា ដែលមានបំណងចង់សាងសង់អគារឲ្យគិតឡើងវិញអំពីធម្មជាតិ និងសារៈសំខាន់នៃដី ដែលគេចង់ធ្វើការសាងសង់។ ពិភពលោកទាំងមូល គឺទាក់ទងទៅនឹងសេដ្ឋកិច្ចបៃតង សេដ្ឋកិច្ចដែលទាក់ទងនឹងបរិស្ថាន ពីព្រោះបរិស្ថាន គឺជាផ្នែកមួយដ៏សំខាន់បំផុតនៃសេដ្ឋកិច្ច ហើយយើងគួរតែបញ្រ្ជាបបញ្ហាបរិស្ថានទៅក្នុងកិច្ចការទាំងអស់ ដែលយើងធ្វើ»។
សម្រាប់ពេលនេះ គ្រួសារនិងអ្នកជិតខាងរបស់លោក Muchichwe នៅមានភាពស្រពិចស្រពិលនៅឡើយថា តើពួកគេនឹងមានកន្លែងរស់នៅដែរ ឬ ទេ? ដោយសារថា រដូវវស្សានឹងផុត គឺនៅចុងខែមីនា ដូច្នេះក្នុងពេលនេះ ពួកគេអាចនឹងដេកនៅលើកដីសើម៕
ប្រែសម្រួលដោយ លី វួចនា
