សិស្សនិស្សិត សកម្មជន និងអ្នកកាសែតរាប់សិបនាក់បាននាំគ្នាធ្វើបាតុកម្មនៅតាមដងផ្លូវនានាក្នុងទីក្រុងធំបំផុតនៃប្រទេស មីយ៉ាន់ម៉ា កាលពីថ្ងៃអាទិត្យ ដើម្បីតវ៉ានឹងការកាត់ទោសអ្នកកាសែតបណ្តាញសារព័ត៌មាន Reuters ពីរនាក់ ឲ្យជាប់ពន្ធនាគាររយៈពេល៧ឆ្នាំ។
លោក Wa Lone និងលោក Kyaw Soe Oo ដែលជាអ្នកកាសែតបណ្តាញសារព័ត៌មាន Reuters ត្រូវបានចាប់ខ្លួនកាលពីខែ ធ្នូ ឆ្នាំមុន បន្ទាប់ពីពួកគេទាំងពីរនាក់បានជួបជាមួយនឹងមន្ត្រីប៉ូលិសពីរនាក់នៅក្នុងភោជនីយដ្ឋានមួយក្នុងទីក្រុងរ៉ង់ហ្គូន និងត្រូវបានគេផ្តល់ឯកសារឲ្យមួយចំនួន។
ពួកគេទាំងពីរនាក់ត្រូវបានចាប់ខ្លួនពីបទល្មើសនឹងច្បាប់ការសម្ងាត់រដ្ឋ ដែលត្រូវបានចូលជាធរមានកាលពីឆ្នាំ១៩២៣ នៅពេលដែលប្រទេស មីយ៉ាន់ម៉ា ត្រូវបានគេស្គាល់ជាផ្លូវការថា ភូមា នៅឡើយ ហើយកំពុងស្ថិតក្រោមអាណានិគមអង់គ្លេស។ អ្នកកាសែតទាំងពីរនាក់បានបដិសេធថាមិនបានសុំឯកសារទាំងអស់នោះទេ។
ពួកគេទាំងពីរនាក់ត្រូវបានកាត់ទោសឲ្យជាប់ពន្ធនាគាររយៈពេល៧ឆ្នាំកាលពីពីរសប្តាហ៍មុននេះ។
បាតុករបាននាំគ្នាបង្ហោះប៉ោងប៉ោងពណ៌ខ្មៅ ដែលមានរូបភាពអ្នកកាសែតទាំងពីរនាក់នៅក្នុងទីក្រុងរ៉ង់ហ្គូន និងមានកាន់បដា និងស្រែកថា ថ្កោលទោសចំពោះសាលក្រមតុលាការដែលកាត់ទោសអ្នកកាសែតទាំងពីរនាក់។
អ្នកកាសែតទាំងនៅក្នុងនិងក្រៅប្រទេស មីយ៉ាន់ម៉ា បានថ្កោលទោសការសម្រេចរបស់តុលាការនេះ ថាជាការគាបសង្កត់សេរីភាពក្នុងការបញ្ចេញមតិនៅក្នុងប្រទេស៕
