ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រមណីយដ្ឋាន​ Disneyland​ ​បើក​ឡើង​វិញ​និង​បង្ហាញ​ពី​ការ​ត្រឡប់​ទៅ​រក​ជីវិត​​ប្រក្រតី​វិញ​នៅ​រដ្ឋ​ California


រូបឯកសារ៖ អ្នកទេសចរពីរនាក់ចូលក្នុងរមណីយដ្ឋាន Disneyland នៅទីក្រុង Anaheim រដ្ឋកាលីហ្វ័រញ៉ា កាលពីថ្ងៃទី ៩ ខែមីនា ឆ្នាំ ២០២១។

រមណីយដ្ឋាន​ Disneyland​ កំពុង​បើក​ដំណើរការ​ឡើង​វិញ​ បន្ទាប់​ពី​បិទ​អស់​រយៈ​ពេល​ ១៣ ​ខែ។​ សួន​កម្សាន្ត​នៅ​ភាគ​ខាង​ត្បូង​រដ្ឋ​ California ​នេះ​ ដែល​ត្រូវ​បាន​បិទ​តាម​ច្បាប់​តឹងរ៉ឹង​ទប់ស្កាត់​វីរុស​កូរ៉ូណា នឹង​បើក​ទ្វារ​នៅ​ថ្ងៃ​សុក្រ ​តែ​មាន​ការ​កំណត់​ចំនួន​មនុស្ស​ ហើយ​មាន​តែ​ភ្ញៀវ​ទេសចរ​នៅ​ក្នុង​រដ្ឋ​ California ប៉ុណ្ណោះ ដែលត្រូវ​បាន​អនុញ្ញាត​ឱ្យ​ចូល។ ​ហើយ​ហាម​ឱប​និង​ចាប់​ដៃ​ជាមួយ​តុក្កតា​ Mickey Mouse។​

អ្នក​ជំនាញ​វិស័យ​ទេសចរណ៍​និយាយ​ថា​ ការ​បើកឡើង​វិញ​នេះ​អាច​ជំរុញ​ឱ្យ​ប្រជាជន​រដ្ឋ​ California កាន់​តែ​ច្រើន​ធ្វើ​ដំណើរ ​បន្ទាប់​ពី​ការ​បិទ​ដ៏​យូរ​នៅ​ក្នុង​រដ្ឋ​នេះ។​ ឥឡូវ​នេះ​រដ្ឋ​នេះ​កំពុង​មាន​សកម្មភាព​សង្គម​ឡើង​វិញ បន្ទាប់​ពី​ការ​ផ្ទុះរាតត្បាត​វីរុស​នៅ​រដូវ​រងារ​ដ៏​គ្រោះថ្នាក់។​

កាល​ពី ​៤ ​ខែ​មុន ​រដ្ឋ​ដែល​មាន​ប្រជាជន​ច្រើន​ជាង​គេ​បំផុត​នៅ​អាមេរិក​នេះ​ បាន​តស៊ូ​ប្រយុទ្ធ​ប្រឆាំង​នឹង​កំណើន​អ្នក​ជំងឺ​ចូល​មន្ទីរ​ពេទ្យ ​ដែលអ្នក​ជំងឺ​ត្រូវ​នៅក្នុង​តង់​ចង្អៀត​ខាង​ក្រៅ​អគារ​ ហើយ​មាន​មនុស្ស​ស្លាប់រាប់​រយនាក់​ក្នុង​មួយ​ថ្ងៃៗ។​

ឥឡូវ​នេះ​រដ្ឋ​ California ​មាន​អត្រា​ឆ្លង​វីរុស​ថ្មី​ទាប​បំផុត​ក្នុងសហរដ្ឋ​អាមេរិក​ ហើយ​ជាង​ពាក់​កណ្តាល​នៃ​ប្រជាជន​ដែល​មាន​សិទ្ធិ​ទទួល​ថ្នាំ​បង្ការ បាន​ចាក់​វ៉ាក់សាំងកូវីដ​មួយ​ដូស​រួច​ហើយ។ ​

លោក Gavin Newsom អភិបាល​រដ្ឋ​បាន​មាន​ប្រសាសន៍​ថា​ លោក​សង្ឃឹម​ថា​ រដ្ឋ​នេះ​នឹង​បើក​ដំណើរការ​ទូលំទូលាយ​វិញ នៅត្រឹម​ពាក់​កណ្តាល​ខែ​មិថុនា៕

XS
SM
MD
LG