យោធាសហរដ្ឋអាមេរិកនឹងបន្តបើកនាវាឆ្លងកាត់តំបន់នៅជិតកោះដែលមានជម្លោះនៅសមុទ្រចិនខាងត្បូង បើទោះបីជារដ្ឋាភិបាលក្រុងប៉េងកាំងប្រឆាំងកាន់តែខ្លាំងឡើងអំពីប្រតិបត្តិនេះយ៉ាងណាក៏ដោយ។ នេះបើយោងតាមលោករដ្ឋមន្រ្តីការពារប្រទេសសហរដ្ឋអាមេរិក Jim Mattis បានប្រកាសកាលពីថ្ងៃអង្គារ។
លោក Mattis បានថ្លែងខណៈកំពុងធ្វើដំណើរទៅកាន់កោះ Hawaiiថា «តំបន់ទាំងនោះគឺជាផ្លូវនាវាចរណ៍សម្រាប់ប្រតិបតិ្តនានាដោយសេរី។ ហើយអ្នកនឹងសម្គាល់ឃើញថាមានប្រទេសតែមួយប៉ុណ្ណោះដែលហាក់ដូចជាប្រឆាំងទៅនឹងប្រតិបត្តិការនេះ»។
បញ្ហាសមុទ្រចិនខាងត្បូងត្រូវបានគេរំពឹងថា នឹងក្លាយជាប្រធានដែលត្រូវផ្តោតមួយយ៉ាងសំខាន់នៅក្នុងសប្តាហ៍នេះ នៅពេលដែលលោក Mattis ធ្វើដំណើរទៅកាន់ប្រទេសសិង្ហបុរី ដើម្បីចូលរួមកិច្ចសន្ទនារដែលនឹងធ្វើឡើងនៅសណ្ឋាគារ Shangri-La ដែលជាការជួបជុំប្រចាំឆ្នាំរវាងមន្រ្តីការពារប្រទេសនៅតំបន់អាស៊ី និងមេដឹកនាំនានាមកពីប្រទេសផ្សេងៗ។
កាលពីថ្ងៃអាទិត្យនាវាចម្បាំងរបស់កងទ័ពជើងទឹកសហរដ្ឋអាមេរិកពីរគ្រឿងបានធ្វើដំណើរទៅជិតកោះនានានៃប្រជុំកោះប៉ារ៉ាសែលដែលគ្រប់គ្រងដោយប្រទេសចិនតាមបណ្តោយឆ្នេរសមុទ្រវៀតណាម។ ប្រទេសចិនបានបញ្ជូននាវាចម្បាំងរបស់ខ្លួនពីរគ្រឿងទៅតំបន់នោះដើម្បីព្រមានឲ្យនាវាសហរដ្ឋអាមេរិកចាកចេញពីតំបន់នោះ។ នេះបើយោងតាមរដ្ឋាភិបាលក្រុងប៉េកាំង។
ក្រុមមន្រ្តីសហរដ្ឋអាមេរិកនិយាយថា សេរីភាពនៃការធ្វើនាវាចរណ៍ឬហៅកាត់ថា FONOP ជាធម្មតាត្រូវអាចធ្វើឡើងតាមការកំណត់ពេលវេលា និងកើតឡើងនៅទូទាំងសកលលោក។
ក៏ប៉ុន្តែសេរីភាពនៃការធ្វើនាវាចរណ៍ចុងក្រោយបង្អស់នេះកើតឡើងនៅចំពេលមានតានតឹងនៃទំនាក់ទំនងរវាងសហរដ្ឋអាមេរិកនិងប្រទេសចិន។
កាលពីសប្តាហ៍មុន ទីបញ្ជាការប៉ង់តាហ្គូនបានដកប្រទេសចិនចេញពីការធ្វើសមយុទ្ធយោធាអន្តរជាតិដែលនឹងត្រូវធ្វើឡើងនៅចុងឆ្នាំនេះ ដោយសារតែសកម្មភាពយោធារបស់រដ្ឋាភិបាលក្រុងប៉េកាំងនៅលើកោះនានាក្នុងសមុទ្រចិនខាងត្បូង។
យោងតាមសេចក្តីរាយការណ៍ថ្មីៗនេះបានរាយការណ៍ថាប្រទេសចិនបានរើប្រព័ន្ធការពារអាកាសទៅដាក់នៅតាមប្រជុំកោះ Spratly៕
