នៅក្នុងរយៈពេលមួយសប្តាហ៍កន្លងទៅ ក្រុមសកម្មប្រយុទ្ធ Boko Haram បានសម្លាប់បុរសនៅតាមភូមិនានា និងបានបំផ្ទុះគ្រាប់បែកទៅលើវិហារគ្រិស្តសាសនា និងវិហារឥស្លាមនៅពាសពេញតំបន់ភាគខាងជើងនៃប្រទេសនីហ្សេរីយ៉ា ទោះបីជាមានការសន្យាពីសំណាក់ប្រធានាធិបតីថ្មីថានឹងកម្ទេចចោលមូលដ្ឋានគ្រឹះរបស់ក្រុមបះបោរនេះ ដែលមានអាយុកាលប្រាំមួយឆ្នាំមកហើយក្តី។
កាលពីនៅជាបេក្ខភាពប្រធានាធិបតី លោក Muhammadu Buhari បានធ្វើយុទ្ធនាការឃោសនាលើការបញ្ចប់ការលុកលុយដោយក្រុម Boko Haram។ ក៏ប៉ុន្តែ នៅក្នុងរយៈពេលមួយខែចាប់តាំងពីពេលលោកចូលកាន់តំណែង អំពើហិង្សារបស់ក្រុមសកម្មប្រយុទ្ធនោះមិនបានបង្ហាញសញ្ញាថមថយនៅឡើយ។ នៅក្នុងអំពើហិង្សាកាលពីសប្តាហ៍មុន គេបានឃើញក្រុមសកម្មប្រយុទ្ធនោះធ្វើការហ៊ុំព័ទ្ធ ភូមិមួយនៅខាងក្រៅក្រុង Maiduguri រដ្ឋ Borno ដោយបានសម្លាប់មនុស្សជាង១៤៥នាក់ នៅតាមភូមិនានានៅក្នុងរដ្ឋនោះ ហើយបានដាក់បំផ្ទុះគ្រាប់បែកទៅលើក្រុមអ្នកបួងសួងនៅឯវិហារគ្រិស្តមួយនៅក្រុង Potiskum រដ្ឋ Yobe ដែលនៅជិតខាង។
លោក Bashir Abdullahi គឺជាប្រជាជនមួយរូបរស់នៅក្រុង Jos នៅភាគកណ្តាលឈៀងខាងជើងនៃប្រទេសនេះ ជាទីដែលពួក Boko Haram ជាប់សង្ស័យថាជាអ្នកបំផ្ទុះគ្រាប់បែក បានចាត់ទីដៅវាយប្រហារទៅលើវិហារអ៊ីស្លាម និងភោជនីយដ្ឋានមួយកាលពីថ្ងៃអាទិត្យ ដោយបានសម្លាប់មនុស្សយ៉ាងហោចណាស់៤៤នាក់។ លោក Abdullahi បាននិយាយថា លោកមានការពេញចិត្តទៅលើវិធានការរបស់លោកប្រធានាធិបតី Buhari ប្រឆាំងនឹងក្រុមសកម្មប្រយុទ្ធនោះ។
«ខ្ញុំពិតជាមានជំនឿថា លោក (Buhari) មានសមត្ថភាពនៅក្នុងការបំពេញកាតព្វកិច្ចនេះ ហើយលោកអាចដោះស្រាយជាមួយនឹងពួកនោះបាន»។
លោក Buhari បានកំណត់ការរំពឹងទុកខ្ពស់ពីបែបផែនដែលលោកនឹងដោះស្រាយចំពោះក្រុមសកម្មប្រយុទ្ធនេះ។ នៅមុនការបោះឆ្នោតជ្រើសរើសប្រធានាធិបតីនៅកាលពីខែមីនា គណបក្ស «សមាជចម្រើនទៅមុខ» (Progressives Congress) របស់លោក បានដាក់នូវផ្ទាំងបដានៅជុំវិញប្រទេសដែលអានថា «យើងនឹងយកជ័យជម្នះលើក្រុម Boko Haram»។ លោក Abubakar Kari សាស្រ្តាចារ្យមហាវិទ្យាល័យ Abuja បាននិយាយថា ប្រសិនបើលោកប្រធានាធិបតី Buhari មិនបានជម្នះក្រុម Boko Haram នោះទេ លោកអាចប្រឈមមុខនឹងការបាត់បង់ជំនឿទុកចិត្តពីសំណាក់ប្រជាជននីហ្សេរីយ៉ា។
«ប្រជាជននីហ្សេរីយ៉ាភាគច្រើន បានរំពឹងទុកថា នឹងឃើញមានអ្វីមួយដែលមានមូលដ្ឋានខ្លាំងក្លា ភា្លមៗ និងជាក់លាក់។ ពួកគេមិនបានរំពឹងពីការដាក់បំផ្ទុះគ្រាប់បែកជាខ្សែស្រឡាយពាសពេញប្រទេសបែបនេះទេ។ ពួកគេយល់ថា មកទល់នឹងពេលនេះ ក្រុម Boko Haram គួរតែជារឿងដែលកើតមានពីអតីតកាលតែប៉ុណ្ណោះ។ ពួកគេហាក់ដូចជាមិនស្ងើចសរសើរចំពោះការដោះស្រាយស្ថានភាពនេះឡើយ រហូតមកដល់ពេលនេះ»។
អ្នកស្រី Femi Adesina អ្នកនាំពាក្យរបស់ប្រធានាធិបតី Buhari និយាយថា លោកប្រធានាធិបតីកំពុងតែធ្វើការលើគម្រោងមួយដែលនឹងមានការរួមបញ្ចូលកងទ័ពពីប្រទេសជិតខាង ដើម្បីដោះស្រាយបញ្ហាក្រុម Boko Haram។
«រចនាសម្ព័ន្ធគម្រោង និងយន្តការត្រូវបានកំណត់ឡើងជាលំដាប់សម្រាប់កម្ទេចឲ្យដល់ទីបញ្ចប់មួយប្រឆាំងនឹងក្រុម Boko Haram ហើយរឿងនេះនឹងកើតមានឡើង»។
លោកប្រធានាធិបតី Buhari បានអំពាវនាវសុំជំនួយពីក្រៅប្រទេស ហើយលោកប្រហែលជាអាចនឹងទទួលបានជំនួយនោះ។ លោកប្រធានាធិបតីនឹងធ្វើទស្សនកិច្ចទៅកាន់សេតវិមាននាចុងខែនេះ ហើយដូចគ្នានេះដែរ លោក Antony Blinken អនុរដ្ឋមន្រ្តីការបរទេសអាមេរិកកំពុងធ្វើទស្សនកិច្ចនៅប្រទេសនីហ្សេរីយ៉ា និងនីហ្សេ នៅសប្តាហ៍នេះ។ គេរំពឹងថា ក្រុម Boko Haram នឹងស្ថិតនៅលើរបៀបវារៈនៅក្នុងដំណើរទស្សនកិច្ចទាំងពីរនេះ៕
ប្រែសម្រួលដោយ ណឹម សុភ័ក្រ្តបញ្ញា
