ភ្ជាប់​ទៅ​គេហទំព័រ​ទាក់ទង

ចំនួន​មនុស្ស​ស្លាប់ពី​ការ​រញ្ជួយ​ដី​នៅ​នេប៉ាល់​​បាន​កើន​លើស​​​​៦.៦០០​​នាក់


Krishna Devi Khadka ត្រូវ​បាន​ដាក់​លើ​​គ្រែ​ស្នែង​​មួយ បន្ទាប់​ពី​ត្រូវ​បាន​​រំដោះ​ចេញ​ពី​អគារដែល​ដួល​រលំ​នៅ​ក្នុង ការ​រញ្ជួយ​ដី​​កាល​ពី​ថ្ងៃសៅរ៍ ​នៅក្រុងKathmandu ប្រទេសនេប៉ាល់ កាលពីថ្ងៃ ទី៣០ ខែមេសា ឆ្នាំ ២០១៥ ។ចំនួន​មនុស្ស​ស្លាប់ពី​ការ​រញ្ជួយ​ដី​នៅ​នេប៉ាល់​​បាន​កើន​លើស​​​​៦៦០០​​នាក់។

មួយ​សប្តាហ៍​ក្រោយ​ពី​ប្រទេស​នេប៉ាល់​បាន​រងគ្រោះ​ដោយសារ​ការ​រញ្ជួយ​ផែនដី​មាន​កម្លាំង៧,៨មក​ ពួក​មន្ត្រី​បាន​និយាយ​ថាមាន​មនុស្ស​រាប់ពាន់​នាក់​នៅ​តែ​បាត់ខ្លួន​នៅ​ទ្បើយដោយ​មានរួមបញ្ចូល​ទាំង​ជន​ជាតិអឺរ៉ុប​ប្រមាណ១ពាន់​នាក់​ផងដែរ។​

ពួកមន្ត្រី​បាន​និយាយ​នៅ​ថ្ងៃ​សៅរ៍នេះ​ថា​ចំនួន​មនុស្ស​ស្លាប់​បាន​កើន​លើស​៦.៦០០​នាក់​ហើយ ដោយ​មនុស្ស​ភាគ​ច្រើន​បាន​បាត់បង់ជីវិត​នៅ​ក្នុង​និង​នៅ​ជុំវិញ​រដ្ឋធានី​ Kathmandu។

អាជ្ញាធរ​បាន​និយាយ​ថាមាន​សេចក្តី​សង្ឃឹម​តិចតួច​ថា​ នឹង​អាចរក​ឃើញ​អ្នកនៅ​រស់​នៅ​ក្នុង​កម្ទិចកម្ទី​ធំធេង​ទាំង​នោះ។

ពួក​អ្នក​នៅ​រស់បានសុំ​ដល់​រដ្ឋាភិបាល ​និង​ពួក​ផ្តល់ជំនួយ​ឲ្យ​ចាត់​វិធាន​ការ​លឿន​ជាង​មុន​ដើម្បីអាចផ្តល់ម្ហូបអាហារ ទឹក​និងជំនួយ​ឯទៀតៗដល់​មនុស្សច្រើននាក់ដែល​រស់​នៅ​កណ្តាលវាល​ក្រោយ​ពី​បាន​បាត់បង់ផ្ទះ​សម្បែង​ពួក​គេ។

នៅ​ក្នុង​ក្រុង Kathmandu មានសញ្ញា​ខ្លះ​នៃភាពធម្មតា​ប្រក្រតីវិញ​ហើយ​នៅ​ពេល​ដែល​ពួក​អ្នក​ជំនួញ​រក​ស៊ីតាមធម្មតា​វិញ​ ហើយ​ពួក​អ្នកស្រុកខ្លះ​បានរើតង់​ហើយ​ចូល​ទៅ​នៅ​ក្នុង​អាគារវិញ។​ក៏​ប៉ុន្តែ​ក្លិន​សាកសពដែល​រលួយ​ស្អុយ​ខ្លាំង​បាន​ក្លាយ​ទៅ​ជា​ហេតុផលធំមួយ​ដែល​អ្នកស្រុក​ច្រើន​នាក់មិន​វិល​ត្រទ្បប់ទៅ​ផ្ទះពួក​គេវិញ។​

លោកស្រី​ Valerie Amos ប្រធាន​ផ្នែក​កិច្ចការមនុស្សធ៌មរបស់​អ.ស.ប.បានទៅ​ទស្សនា​កន្លែង​មាន​មហន្តរាយ​ក្នុងប្រទេស​ Nepal កាល​ពី​ថ្ងៃ​សុក្រ​ជា​ផ្នែក​មួយ​នៃទស្សនកិច្ចបីថ្ងៃ​របស់​លោក​ស្រី​ដើម្បី​ស្ទង់ប៉ាន់​មើល​អំពី​កិច្ចប្រតិបត្តិការ​ជួយ​សង្គ្រោះ។ លោក​ស្រី​បាន​និយាយ​ប្រាប់ពួក​អ្នកកាសែត​ថា​ ការ​ផ្តល់ប្រាក់គ្រា​មាន​អាសន្ន​សម្រាប់​កិច្ច​ខិត​ខំប្រឹងប្រែងជួយ​សង្គ្រោះ​បានហូរ​ចូល​ក្នុងប្រទេសនេប៉ាល់ ហើយលោកស្រីបានសុំ​ដល់​សហគមន៍​អន្តរជាតិ​ឲ្យ​បង្កើន​ជំនួយថែមទៀត។

រដ្ឋាភិបាល​នៃ​ប្រទេសនេប៉ាល់​ផ្តល់ប្រាក់១ពាន់ដុល្លារឲ្យ​គ្រួសារជន​បាត់បង់ជីវិត​ និង​៤រយ​ដុល្លារ​សម្រាប់​សោហ៊ុយ​បញ្ចុះ​សព៕

XS
SM
MD
LG