មន្រ្តីអាហ្វហ្គានីស្ថាននិយាយថា ការវាយប្រហារអត្តឃាតទៅលើវិហារឥស្លាមនិកាយស៊ីអ៊ីដក្នុងរដ្ឋធានីកាប៊ុល បានសម្លាប់មនុស្សយ៉ាងហោចណាស់ក៏២០នាក់ រួមទាំងមន្រ្តីប៉ូលិស២នាក់ ហើយនិងធ្វើឲ្យមនុស្សជាង៤០នាក់រងរបួសក្នុងអំឡុងនៃការសូត្រធម៌កាលពីថ្ងៃសុក្រ។
លោក Najib Danish អ្នកនាំពាក្យក្រសួងមហាផ្ទៃអាហ្វហ្គានីស្ថានបានបញ្ជាក់ថា អ្នកវាយប្រហារយ៉ាងហោចណាស់ក៏ម្នាក់ដែរបានបំផ្ទុះខ្លួនឯងនៅច្រកចេញចូលនៃរបស់វិហារឥស្លាម Imam Zaman ខណៈដែលអ្នកវាយប្រហារផ្សេងទៀតវាយសង្គ្រប់ចូលខាងក្នុងវិហារនោះ។
ក្រុមរដ្ឋឥស្លាមបានអះអាងទទួលខុសត្រូវចំពោះការវាយប្រហារនោះ។
ប៉ូលិសបានបិទតំបន់នោះភ្លាមៗបន្ទាប់ពីការវាយប្រហារ។ ពួកអ្នកស្រុកនៅតំបន់នោះ បានរាយការណ៍ថា ពួកគេបានឮស្នូរកាំភ្លើងមកពីខាងក្នុងវិហារឥស្លាមនោះ។
អ្នកឃើញហេតុការណ៍ផ្ទាល់ភ្នែកម្នាក់និយាយថា លោកបានឃើញស្រ្តីយ៉ាងហោចណាស់ក៏៣នាក់ដែរហើយនិងកូនក្មេងរាប់សិបនាក់ទៀតបានត្រូវរបួសហើយដេកនៅលើកម្រាលវិហារក្នុងអំឡុងនៃឧបទ្ទវហេតុនោះ។ ពួកសមាជិកក្រុមគ្រួសាររបស់អ្នកដែលស្ថិតនៅខាងក្នុងវិហារនោះបានប្រមូលផ្តុំគ្នានៅខាងក្រៅវិហារ។
វិហារឥស្លាម Imam Zaman ជាវិហារឥស្លាមនិកាយស៊ីអ៊ីដដ៏សំខាន់មួយនៅក្នុងតំបន់នោះហើយមនុស្សជាច្រើនបានចូលរួមវិហារឥស្លាមនោះនៅថ្ងៃសុក្រ ដែលជាថ្ងៃពិសិដ្ឋរបស់ឥស្លាម។
បញ្ហានោះបានកើតមានឡើងប៉ុន្មានថ្ងៃបន្ទាប់ពីប្រធានាធិបតីសហរដ្ឋអាមេរិកដូណាល់ ត្រាំ បានប្រកាសគោលនយោបាយថ្មីរបស់លោកសម្រាប់អាហ្វហ្គានី ស្ថានដែលក្នុងនោះលោកប្រធានាធិបតីផ្តល់អំណាចដល់មេបញ្ជាការនៅសមរភូមិធ្វើការសម្រេចចិត្តខ្លួនឯង៕