សម្តេច ដាឡៃ ឡាម៉ា មេដឹកនាំសាសនានិរទេសខ្លួនដែនដីទីបេ បានចាកចេញពីមន្ទីរពេទ្យញូវដែលី កាលពីថ្ងៃសុក្របន្ទាប់ពីការព្យាបាលជំងឺឈឺទ្រូងអស់រយៈពេល៣ថ្ងៃ។
ជ័យលាភីណូបែលសន្តិភាព បានមានប្រសាសន៍នៅក្នុងវីដេអូដែលថតដោយ VOA ផ្សាយជាភាសាទីបេនៅពេលដែលព្រះអង្គចាកចេញពីមន្ទីរពេទ្យថា៖ «ខ្ញុំបានទទួលការព្យាបាលចាំបាច់មួយហើយឥឡូវនេះ មានសភាពធម្មតាវិញ»។
ព្រះសង្ឃព្រះពុទ្ធសាសនាដែលមានព្រះជន្ម៨៣ព្រះវស្សាអង្គនេះត្រូវគេរំពឹងថានឹងវិលត្រឡប់ទៅកាន់ទីក្រុង Dharmsala ភាគខាងជើងនៃប្រទេសឥណ្ឌានៅសប្តាហ៍នេះ ដែលនៅទីនោះ ជាអាស្រមរបស់ព្រះអង្គចាប់តាំងពីព្រះអង្គបានរត់គេចខ្លួនចេញពីដែនដីទីបេនៅឆ្នាំ១៩៥៩ បន្ទាប់ពីការងើបបះបោរមិនបានជោគជ័យប្រឆាំងនឹងរដ្ឋាភិបាលចិន។ ព្រះអង្គបានបង្កើតរដ្ឋាភិបាលទីបេនិរទេសខ្លួននៅទីនោះ ហើយបានខិតខំប្រឹងប្រែងទាមទារយកទីបេមកវិញ ដែលនៅទីបញ្ចប់បានវិវត្តន៍ទៅជាការស្វែងរកស្វ័យភាពកាន់តែខ្លាំងឡើង។
ចិនបានបដិសេធពុំព្រមទទួលស្គាល់រដ្ឋាភិបាលនិរទេសខ្លួនហើយមិនធ្វើការចរចាជាមួយសម្តេច ដាឡៃ ឡាម៉ា ឬតំណាងរបស់ព្រះអង្គចាប់តាំងពីឆ្នាំ ២០១០មក។ដោយហៅព្រះអង្គថាជា «ព្រះសង្ឃកញ្ជ្រោងពាក់ស្បង់» ចិនបានពោលអះអាងថា ព្រះអង្គកំពុងព្យាយាមផ្តាច់ដែនដីទីបេចេញពីចិន។ សម្តេចដា ឡៃ ឡាម៉ា បានបដិសេធការចោទប្រកាន់នោះ ដោយមានប្រាសាសន៍ថា ព្រះអង្គកំពុងគាំទ្រតំបន់ស្វ័យភាពមួយហើយការការពារវប្បធម៌អ្នកកាន់ព្រះពុទ្ធសាសនារបស់តំបន់នោះ។
កិត្យានុភាពរបស់សម្តេច ដាឡៃ ឡាម៉ា បានត្រូវគេប្រៀបធៀបទៅនឹងលោក Mahatma Gandhi និងបណ្ឌិត Martin Luther King Jr. មេដឹកនាំសិទ្ធិស៊ីវិលរបស់សហរដ្ឋអាមេរិក៕