លោក Lodi Gyaltsen Gyari ដែលមានឈ្មោះល្បីមួយទៀតថា Gyari Rinpoche ជាបេសកជនពិសេសរបស់សម្តេច Dalai Lama មេដឹកនាំសាសនាដែនដីទីបេប្រចាំនៅរដ្ឋធានីវ៉ាស៊ីនតោន បានទាក់ទាញពួកមេដឹកនាំពិភពលោក ឥស្សរៈជននិងមនុស្សពិតប្រាកដដើម្បីដល់បុព្វហេតុដែនដីទីបេ។ លោកក៏ជាអ្នកគាំទ្រទីបេដែលលះបង់ការតស៊ូប្រដាប់អាវុធដើម្បីអហិង្សាដែរមុនពេលមរណៈភាពរបស់លោកក្នុងវ័យ៦៩ឆ្នាំ។ ប៉ុន្មានឆ្នាំក្រោយពីលោក Lodi Gyaltsen បានរត់គេចខ្លួនពីដែនដីទីបេទៅកាន់ប្រទេសឥណ្ឌាជាមួយឪពុកម្តាយរបស់លោកមក លោកបានដឹងថា ចិនបានសម្លាប់ជីដូនជីតានិងបងប្រុសម្នាក់របស់លោកដែលបានស្ថិតនៅក្នុងដែនដីទីបេ ដោយការធ្វើទារុណកម្មនិងការចាក់សម្លាប់។
ជាមនុស្សពេញវ័យម្នាក់ លោកជាសហអ្នកបង្កើតអង្គការសិទ្ធិមនុស្សទីបេដ៏មានឥទ្ធិពលមួយ និងបានបោះបង់ចោលការតស៊ូប្រដាប់អាវុធដើម្បីប្រកាន់យកការដោះស្រាយជម្លោះដោយអហិង្សា ហើយបានក្លាយជាបេសកជនពិសេសរបស់សម្តេចសង្ឃ Dalai Lama នៅក្នុងរដ្ឋធានីវ៉ាស៊ីនតោន។
ដោយត្រូវបានទទួលស្គាល់ជាការចាប់ជាតិរបស់លោក Khenchen Jampal Dewe Nyima នៃវត្តLumorap នៅទីក្រុង Nyarong នៃភាគខាងកើតដែនដីទីបេ លោកLodi បានទទួលមរណៈភាពកាលពីថ្ងៃច័ន្ទសប្តាហ៍មុននៅក្នុងទីក្រុង San Francisco សហរដ្ឋអាមេរិកដែលនៅទីនោះលោកបានព្យាបាលជំងឺមហារីកថ្លើម។
ដោយល្បីល្បាញថាជា Gyari Rinpoche លោកបានទទួលការចាប់អារម្មណ៍ពីពួកមេដឹកនាំពិភពលោកហើយបានស្តាប់ពួកអ្នកបោសសម្អាតដែលបោសសម្អាតនៅជុំវិញលោកនៅពេលដែលលោកបានប្រុងប្រៀបបង្ហាញខ្លួននៅខាងមុខសភាសហរដ្ឋអាមេរិក។
ដោយត្រូវបានពណ៌នាថាជាអ្នកគាំទ្រយ៉ាងខ្លាំងក្លាដល់ពលរដ្ឋដែនដីទីបេ សិទ្ធិមនុស្សសាកលនិងការធ្វើកំណែទម្រង់តាមបែបលទ្ធិប្រជាធិបតេយ្យសាកលដោយយុទ្ធនាការអន្តរជាតិសម្រាប់ដែនដីទីបេឬ(ICT) រដ្ឋាភិបាលនិរទេសទីបេ បានធ្វើការសូត្រធម៌ពិសេសសម្រាប់លោកGyari Rinpocheនៅឯទីស្នាក់ការធំរបស់រដ្ឋាភិបាលនិរទេសខ្លួនក្នុងក្រុងDharamsalaនៃប្រទេសឥណ្ឌា កាលពីថ្ងៃទី៣០ ខែតុលា មួយថ្ងៃបន្ទាប់ពីលោកបានទទួលមរណៈភាព។ជំនួបមួយត្រូវបានគេគ្រោងធ្វើឡើងនៅក្នុងទីក្រុង San Francisco មុនពេលសពរបស់លោកបានត្រូវដឹកតាមយន្តហោះទៅកាន់ទីក្រុងDharamsalaដើម្បីធ្វើពិធីបុណ្យសព។នេះបើតាមមនុស្សដែលជិតស្និទ្ធទៅនឹងក្រុមគ្រួសារបានប្រាប់VOA ផ្សាយជាភាសាទីបេ។
លោកLobsang Sangay ជាប្រធានរដ្ឋបាលទីបេកណ្តាលដែលជារដ្ឋាភិបាលនិរទេសដែនដីទីបេបានហៅលោកGyari Rinpoche ជាអ្នកស្នេហាជាតិទីបេពិតប្រាកដ»ដែលបានបូជាអាយុជីវិតទាំងមូលរបស់លោកដើម្បីបម្រើដែនដីទីបេនិងប្រជាពលរដ្ឋទីបេ។លោកជាអ្នកត្រួសត្រាយផ្លូវមុនគេបង្អស់ហើយបានបន្សល់ទុកកេរ្តិ៍ដំណែលការងារសាធារណៈដែលមានជារៀងរហូត។
លោក Richard Gereប្រធានគណៈកម្មាធិការនាយក ICTនិងជាតារាភាពយន្តបានចេញសេចក្តីថ្លែងការណ៍មួយចុះផ្សាយនៅលើប្រព័ន្ធ Website របស់អង្គការនោះថា «លោក Lodi ជាមិត្តភ័ក្រ្តនិងដៃគូនិងជាអ្នកប្រៀនប្រដៅដ៏ជាទីស្រលាញ់ម្នាក់របស់ខ្ញុំអស់រយៈពេលជាង៣០ឆ្នាំមកហើយ។លោកបានធ្វើឲ្យជីវិតមានន័យយ៉ាងខ្លាំងហើយការលះបង់នេះនឹងធ្វើឲ្យល្បីខ្ទខ្ទារសម្រាប់មនុស្សជាច្រើនជំនាន់ទូទាំងពិភពលោកសម្រាប់ជនជាតិទីបេនិងមិនមែនជនជាតិទីបេ។លោកជាមនុស្សដ៏អស្ចារ្យម្នាក់។
លោកស្រី Nancy Pelosi ជាមេដឹកនាំសំឡេងភាគតិចរបស់សភាតំណាងរាស្រ្តសហរដ្ឋអាមេរិកខាងគណបក្សប្រជាធិបតេយ្យនៅក្រុង San Franciscoបានចេញសេចក្តីថ្លែងការណ៍មួយភ្លាមៗបន្ទាប់ពីមរណៈភាពរបស់លោក Gyari Rinpocheដោយបានកោតសរសើរលោកពីការស្ថាបនាការគាំទ្រយ៉ាងខ្លាំងសម្រាប់បុព្វហេតុទីបេនៅទូទាំងសហរដ្ឋអាមេរិកនិងជុំវិញពិភពលោក។ពួកសមាជិកសភាទាំង២គណបក្សរបស់សហរដ្ឋអាមេរិកបានទទួលអត្ថប្រយោជន៍ពីយល់ដឹងនិងគតិបណ្ឌិតរបស់លោកLodi។
សម្តេចDalai Lamaបានតែងតាំងលោក Gyari Rinpoche ជាបេសកជនពិសេសប្រចាំនៅរដ្ឋធានីវ៉ាស៊ីនតោននៅឆ្នាំ១៩៩០។ហើយលោកក៏បានធ្វើជាប្រធានអង្គការ ICT នៅពេលជាមួយគ្នានោះដែរ។
សេចក្តីថ្លែងការណ៍ដោយអង្គការរបស់ប្រទេសនិងជនជាតិដែលគ្មានតំណាងដែលលោកGyari Rinpoche ជាសហប្រធានបានថ្លែងថា លោកGyari Rinpoche បានប្រើប្រាស់តួនាទីទាំង២ដើម្បីធ្វើឲ្យមានការយកចិត្តទុកដាក់ដល់បុព្វហេតុដែនដីទីបេ។នៅក្នុងសហរដ្ឋអាមេរិក «ដោយសារលទ្ធផលនៃការតស៊ូមតិរបស់លោក នៅឆ្នាំ២០០២ ច្បាប់គោលនយោបាយដែនដីទីបេដើម្បីធ្វើឲ្យក្លាយជាប្រព័ន្ធស្ថាប័នដើម្បីគាំទ្រសម្តេចសង្ឃ Dalai Lamaហើយនឹងសិទ្ធិនៃការសម្រេចជោគវាសនាដោយខ្លួនឯងរបស់ប្រជាពលរដ្ឋទីបេ។មួយផ្នែកនៃការគាំទ្រនេះបានបង្កើតមូលនិធិជាង១៨៥លានដុល្លារសម្រាប់ជនជាតិទីបេនិងរដ្ឋាភិបាលនិរទេសខ្លួនទីបេ ដែលជាប្រាក់ទុកដោយឡែកនៅចន្លោះឆ្នាំ១៩៩១និង២០១១»។
លោកបានមើលខុសត្រូវការរីកលូតលាស់របស់អង្គការICT ដែលមានសមាជិកតាំងពីតិចជាង១ពាន់នាក់ទៅដល់ជាង៧ម៉ឺន៥ពាន់នាក់ដោយមានថវិការាប់លានដុល្លារ។បន្ទាប់ពីការកាន់កាប់មុខដំណែងរបស់លោកជាប្រធានអង្គការICT បានបញ្ចប់ លោកបានក្លាយជាប្រធានប្រតិបត្តិរបស់គណៈកម្មាធិការនាយកICT ជាតួនាទីមួយដែលលោកបានកាន់កាប់រហូតដល់ឆ្នាំ២០១៤។
នៅពេលដែលលោក Gyari Rinpocheបានចូលនិវត្តន៍ពីតួនាទីជាបេសកជនពិសេសក្នុងឆ្នាំ២០១២ ព្រឹទ្ធសភាសហរដ្ឋអាមេរិក បានអនុម័តសេចក្តីសម្រេចមួយដែលសរសើរ «ស្នាដៃរបស់លោក Lodi Gyaltsen Gyari នៅក្នុងការស្ថាបនាក្រុមចម្រុះអន្តរជាតិមួយដើម្បីគាំទ្រដែនដីទីបេដែលទទួលស្គាល់ដូចតទៅ៖ ក/ ភាពចាំបាច់ដើម្បីការពារវប្បធម៌និងប្រពៃណីសាសនារបស់ទីបេ ខ/ ជនជាតិទីបេមានសិទ្ធិនៅក្រោមច្បាប់អន្តរជាតិដើម្បីថែរក្សាអត្តសញ្ញាណនិងសេចក្តីថ្លៃថ្នូរនិងស្វ័យភាពដ៏ពិតប្រាកដមួយនៅក្នុងសាធារណរដ្ឋប្រជាមានិតចិនដែលការពារសិទ្ធិនិងសេចក្តីថ្លៃថ្នូររបស់ពលរដ្ឋទីបេ»។
លោក Gyari Rinpoche បានកើតនៅក្នុងឆ្នាំ១៩៤៩នៅក្នុងគ្រួសារដ៏មានឥទ្ធិពលមួយនៅក្នុងទីក្រុង Nyarong ភាគខាងកើតដែនដីទីបេ។នៅពេលដែលចិនបានឈ្លានពានហើយនឹងត្រួតត្រាដែនដីទីបេបន្ទាប់ពីការងើបបះបោរនៅឆ្នាំ១៩៥៩លោកបានរត់គេចខ្លួនទៅកាន់ប្រទេសឥណ្ឌាជាមួយក្រុមគ្រួសាររបស់លោក ដោយបានធ្វើដំណើរដោយថ្មើជើងជាមួយជនភៀសខ្លួនទីបេរាប់ពាន់នាក់ផ្សេងទៀត។
ប្រែសម្រួលដោយ ជឹង ប៉ូជីន
