វិបត្តិកើនឡើងនៅក្នុងវិស័យ «ធនាគារស្រមោល» របស់ប្រទេសចិនកំពុងគំរាមបង្កឱ្យមានការខូចខាតបន្ថែមទៀតដល់ភាពរង្គោះរង្គើផ្នែកសេដ្ឋកិច្ចដែលបណ្ដាលមកពីបញ្ហាជាច្រើន បើទោះបីជារបាយការណ៍ថ្មីមួយបានចោទសួរអំពីលទ្ធភាពរបស់រដ្ឋាភិបាលចិននៅក្នុងការជួយសង្គ្រោះសេដ្ឋកិច្ចតាមរយៈការលើកទឹកចិត្តផ្នែកហិរញ្ញវត្ថុក៏ដោយ។
កាលពីថ្ងៃពុធ កាសែត Bloomberg News របស់សហរដ្ឋអាមេរិក បានរាយការណ៍ថា អាជ្ញាធរចិនបានស្នើឱ្យក្រុមហ៊ុន Citic Trust Co. ដែលជាសាខារបស់ធនាគារសំណង់ចិនរបស់រដ្ឋឱ្យវាយតម្លៃអំពីស្ថានភាពរបស់ក្រុមហ៊ុន Zhongrong International Trust Co.។ នៅពេលដែលក្រុមហ៊ុន Citic ត្រូវបានស្នើឱ្យធ្វើការវាយតម្លៃស្រដៀងគ្នានេះលើក្រុមហ៊ុនគ្រប់គ្រងទ្រព្យសម្បត្តិដ៏ធំមួយនៅឆ្នាំ ២០២១ វាគឺជាស្ថានការណ៍ផ្ដើមដំបូងមុនពេលឈានដល់ការផ្ដល់នូវកញ្ចប់ជំនួយសង្គ្រោះហិរញ្ញវត្ថុដ៏ធំមួយដែលមានបំណងបង្ការកុំឱ្យមានការដួលរលំរបស់ក្រុមហ៊ុន។
ក្រុមហ៊ុន Zhongrong ដែលជាអ្នកដើរតួចម្បងនៅក្នុងឧស្សាហកម្មវិនិយោគហិរញ្ញវត្ថុ (trust fund) ដែលមានទឹកប្រាក់ ២,៩ លានលានដុល្លារ គឺជាក្រុមហ៊ុនបុត្តសម្ព័ន្ធរបស់ក្រុមហ៊ុន Zhongzhi Enterprise Group។ ក្រុមហ៊ុន Zhongrong មានទ្រព្យរបស់វិនិយោគិនជិត ៩០ ពាន់លានដុល្លារ ហើយកាលពីដើមខែនេះ ក្រុមហ៊ុននេះបានបរាជ័យនៅក្នុងការបង់ប្រាក់លើទ្រព្យវិនិយោគវិជ្ជមានជាច្រើន ដោយបង្កឱ្យមានក្ដីបារម្ភអំពីលទ្ធភាពសងបំណងរបស់ខ្លួន។
ក្ដីបារម្ភអំពីស្ថានភាពហិរញ្ញវត្ថុរបស់វិស័យភាគហ៊ុននៅក្នុងប្រទេសចិនបានកើតឡើងនៅចំពេលដែលរដ្ឋាភិបាលចិនកំពុងប្រឹងប្រែងយ៉ាងលំបាកនៅក្នុងការរក្សាការរីកចម្រើនសេដ្ឋកិច្ច។ ដោយសេដ្ឋវិទូសង្ស័យថាកញ្ចប់ថវិកាលើកទឹកចិត្តប្រហែលជាចាំបាច់ ការវិភាគថ្មីមួយរបស់ក្រុមហ៊ុនស្រាវជ្រាវ Rhodium Group នៅសហរដ្ឋអាមេរិកដែលមានជំនាញខាងសេដ្ឋកិច្ចចិន បានលើកឡើងថា លទ្ធភាពរបស់រដ្ឋាភិបាលថ្នាក់ជាតិរបស់ចិននៅក្នុងការដោះស្រាយវិបត្តិនេះប្រហែលជាមានកម្រិតច្រើនជាងការយល់ឃើញរបស់មនុស្សជាច្រើន៕
