មេដឹកនាំចិនលោក Xi Jinping អំពាវនាវឱ្យមានការអត់ធ្មត់នៅក្នុងសុន្ទរកថាមួយដែលត្រូវបានចេញផ្សាយ នៅពេលគណបក្សកម្មុយនិស្តគ្រប់គ្រងប្រទេស ប្រឹងប្រែងបង្វែរទិសការចុះថយសេដ្ឋកិច្ចខ្លាំង ហើយលោកបាននិយាយថា ពួកប្រទេសលោកខាងលិចកំពុងមាន «បញ្ហាខ្លាំងជាងមុន»ដោយសារសម្ភារៈនិយមនិង «ភាពក្រីក្រខាងស្មារតី» របស់ពួកគេ។
សុន្ទរកថានេះរបស់លោក Xi ត្រូវបានបោះពុម្ពផ្សាយដោយកាសែត Qiushi ដែលជាសារព័ត៌មានខាងទ្រឹស្តីរបស់គណបក្ស តែប៉ុន្មានម៉ោងក្រោយទិន្នន័យកាលពីថ្ងៃអង្គារបង្ហាញថា សកម្មភាពរបស់ក្រុមអ្នកប្រើប្រាស់គ្រឿងឧបភោគបរិភោគនិងសកម្មភាពរោងចក្របានចុះខ្សាយថែមទៀតក្នុងខែកក្កដា ទោះជាមានការសន្យាជាផ្លូវការអំពីការគាំទ្រដល់សហគ្រាសមានបញ្ហា។ រដ្ឋាភិបាលមិនផ្តល់បច្ចុប្បន្នភាពអំពីកំណើនយុវជនគ្មានការងារធ្វើដែលជាបញ្ហាមួយរសើបខាងនយោបាយ។
លោក Xi ដែលជាមេដឹកនាំមានអំណាចខ្លាំងបំផុតរបស់ប្រទេសចិនក្នុងពេលច្រើនទសវត្សរ៍នេះ បានអំពាវនាវឱ្យប្រទេសចិន «កសាងមនោគមវិជ្ជាសង្គមនិយមមួយដោយឯកភាពខ្លាំង» និងផ្តោតលើគោលដៅរយៈពេលយូរ ដោយកែលម្អការសិក្សាអប់រំ ការថែទាំសុខភាពនិងការផ្គត់ផ្គង់ស្បៀងអាហារសម្រាប់ប្រជារាស្ត្រចិន ១,៤ពាន់លាននាក់ ជាជាងស្វះស្វែងរកធនធានខាងសម្ភារៈក្នុងរយៈពេលខ្លី។
លោក Xi បាននិយាយនៅក្នុងសុន្ទរកថានេះថា៖ «យើងត្រូវមានការអត់ធន់ជាប្រវត្តិសាស្ត្រ»។ ហើយលោកថ្លែងទទូចឱ្យធ្វើឱ្យមាន«ការជឿនលឿនជាលំដាប់ មួយជំហានម្តងៗ»។ កាសែត Qiushi បាននិយាយថា លោក Xi បានថ្លែងសុន្ទរកថានេះកាលពីខែកុម្ភៈនៅក្នុងក្រុង Chongqing នាប៉ែកនិរតីប្រទេស។ ជាធម្មតា សារព័ត៌មាន Qiushi តែងតែផ្សាយសុន្ទរកថានានានៅពេលច្រើនខែក្រោយត្រូវបានថ្លែង។
ការលូតលាស់សេដ្ឋកិច្ចបានចុះថយមកនៅត្រឹមតែ ០,៨% ក្នុងពេលបីខែបញ្ចប់ នៅខែមិថុនា ប្រៀបធៀបជាមួយខែមុន ដោយចុះថយពី ២,២% ពីខែមករាដល់ខែមីនា។ នេះស្មើនឹងអត្រាប្រចាំឆ្នាំ៣,២% ដែលអាចស្ថិតក្នុងចំណោមកម្សោយសេដ្ឋកិច្ចខ្លាំងបំផុតនៃប្រទេសចិនក្នុងពេលច្រើនទសវត្សរ៍មកហើយនេះ៕
