កាលពីខែកុម្ភៈ វេជ្ជបណ្ឌិតបារាំងឈ្មោះ Didier Raoult អ្នកជំនាញខាងការសិក្សាអំពីប្រព័ន្ធខាងការពាររាងកាយនិងការបង្កើតភាពស៊ាំមិនមានគណនី Twitter ទេ។ នៅពេលនេះលោកមានអ្នកគាំទ្រជាង២សែន៥ម៉ឺននាក់ ហើយនឹងមានច្រើនថែមទៀត។
វេជ្ជបណ្ឌិតបារាំងអាយុ៦៨ឆ្នាំរូបនេះបានក្លាយជាមនុស្សល្បីដែលមានគេផ្សព្វផ្សាយច្រើន ហើយក៏នាំឱ្យមានការខ្វែងគំនិតគ្នាច្រើនផងដែរនៅពេលមានវិបត្តិមេរោគកូរ៉ូណាចាប់តាំងពីលោកបានអះអាងថា ការសិក្សាស្រាវជ្រាវរបស់លោកបង្ហាញថា ឱសថប្រឆាំងនឹងជំងឺគ្រុនចាញ់អាចជួយប្រយុទ្ធប្រឆាំងនឹងជំងឺ COVID-19។
នៅខាងក្រៅមន្ទីរពេទ្យនៃសាកលវិទ្យាល័យក្រុង Marseille ជា កន្លែងដែលលោកធ្វើការនោះ មនុស្សឈឺនិងភ័យខ្លាចឈរជាជួរយ៉ាងវែងរង់ចាំធ្វើតេស្តជារៀងរាល់ថ្ងៃរកមេរោគ COVID-19។
អ្នកជំងឺទាំងនេះទទួលការព្យាបាលពិសោធន៍គឺ ការប្រើផ្សំគ្នានូវថ្នាំ hydroxychloroquine ដែលប្រឆាំងនឹងជំងឺគ្រុនចាញ់និងថ្នាំអង់ទីប៊ីយោទិក ឈ្មោះ azithromycin ដែលបានត្រូវប្រើប្រាស់នៅក្នុងការសិក្សាស្រាវជ្រាវកម្រិតតូចដ៏ប្រញ៉ាប់ពីរដែលលោក Raoult បានដឹកនាំ ហើយដែលបានត្រូវបោះពុម្ពផ្សាយក្នុងខែមីនា។
លោក Raoult និងក្រុមអ្នកស្រាវជ្រាវរបស់លោកអះអាងថាការសិក្សាស្រាវជ្រាវបង្ហាញពី ប្រសិទ្ធភាពរបស់ថ្នាំប្រឆាំងនឹងជំងឺគ្រុនចាញ់នេះ ក្នុងការប្រឆាំងនឹងមេរោគកូរ៉ូណាហើយការផ្សំគ្នារវាងឱសថទាំងពីរនេះក៏បានផលល្អដោយបន្ថែមជាមួយការប្រើថ្នាំអង់ទីប៊ីយោទិក។
លោក Renault Muselier ជាប្រធាននៃតំបន់ Provence-Alpes-Cote d’Azur និងជាមិត្តភក្តិរបស់លោក Raoult។ លោកបាននិយាយប្រាប់កាសែត Le Journal du Dimanche ថា៖
«លោកRaoult ជាអ្នកមានទស្សនៈវិស័យ។ហើយនេះជាអ្វីដែលធ្វើឱ្យលោកមានកម្លាំងនៅពេលសព្វថ្ងៃនេះ»។
ក៏ប៉ុន្តែពួកអ្នករិះគន់លោកនិយាយថា ក្រុមអ្នកសិក្សាស្រាវជ្រាវរបស់លោក Raoult មិនបានធ្វើតាមទម្រង់ការយ៉ាងហ្មត់ចត់ទេ គឺគ្មានក្រុមអ្នកត្រួតពិនិត្យហើយទាញលទ្ធផលដោយផ្អែកលើលទ្ធផលសិក្សាអំពីចំនួនមនុស្សតិចតួច និងមានចន្លោះប្រហោងឯទៀតៗ។
លោក Gilles Pialoux ជាប្រធានផ្នែកជំងឺឆ្លងនៃមន្ទីរពេទ្យ Tenon នៅក្នុងក្រុងប៉ារីស។លោកបាននិយាយប្រាប់ទូរទស្សន៍ BFMTV ថា«វិធីសិក្សាស្រាវជ្រាវនេះមិនច្បាស់លាស់ទេ។ លទ្ធផលនៃការស្រាវជ្រាវមិនគួរជាអ្វីដែលធ្វើឱ្យប្រជារាស្ត្រមានសេចក្តីសង្ឃឹមដោយផ្អែកលើការសាកល្បងស្មានៗនោះទេ»។
មិនមែនជារឿងចម្លែកទេដែលលោក Raoult ប្រធានផ្នែកទប់ទល់នឹងជំងឺឆ្លងនៅឯមន្ទីរពេទ្យ La Timone នៅក្នុងក្រុងMarseille មានរឿងចម្រូងចម្រាសឬមានគេសរសើរនោះ។ លោកបានកើតនៅក្នុងក្រុង Dakar ប្រទេស សេណេហ្កាល់ ក្នុងទ្វីប អាហ្វ្រិក។ លោកមិនបានរៀនចប់វិទ្យាល័យទេនៅពេលលោកមានវ័យក្មេងហើយលោកបានបម្រើការក្នុងនាវាជំនួញបារាំងពីរបីឆ្នាំនៅមុនលោកទៅរៀននៅឯមហាវិទ្យាល័យវេជ្ជសាស្ត្រ។
កាលពីពីរបីឆ្នាំកន្លងទៅនេះ លោកបានទុកសក់ពណ៌សក់ពោតយ៉ាងវែងបានទុកពុកមាត់និងពុកចង្កាហើយគេបានរាយការណ៍ថា លោកបាននិយាយថា លោកធ្វើដូច្នេះដើម្បីធ្វើឱ្យអ្នកកាន់អំណាចមួរម៉ៅ។
ការស្រាវជ្រាវរបស់លោកដែលធ្វើឱ្យលោកបានទទួលបានរង្វាន់ រួមមានការរកឃើញមេរោគធំៗនិងបាក់តេរីថ្មីៗ។ លោកបានបោះពុម្ពផ្សាយអត្ថបទស្រាវជ្រាវជាច្រើន ទោះណាជាការស្រាវជ្រាវទាំងនេះបាននាំឱ្យមានការរិះគន់ថា មិនមានភាពហ្មត់ចត់ក៏ដោយ។
លោក Raoult ក៏បានសាកសួរអំពីការប្រែប្រួលធាតុអាកាសដែរ។ កាលពីខែមករា លោកបានបដិសេធការរាលដាលដំបូងនៃមេរោគកូរ៉ូណានៅក្នុងក្រុង Wuhan ប្រទេសចោនដោយនិយាយថា វាជាការបំផ្លើសហួសការណ៍ពិត ហើយនៅពេលដែលលោកបានត្រូវបញ្ចូលក្នុងក្រុមរបស់រដ្ឋាភិបាលនៃពួកអ្នកជំនាញខាងសុខាភិបាលប្រឆាំងនឹងមេរោគកូរ៉ូណា គេរាយការណ៍ថា លោកឋិតនៅឆ្ងាយពីក្រុមនេះដោយមិនបានចូលរួមក្នុងការប្រជុំរបស់ក្រុមនេះទេកាលពីពេលថ្មីៗនេះ។
លោក Raoult បាននិយាយប្រាប់សារព័ត៌មាន La Provence ថា៖
«ខ្ញុំមិនរវល់នឹងអ្នកឯទៀតនិយាយអំពីខ្ញុំទេ។ ខ្ញុំមិនមែនជាអ្នកខាងក្រៅទេ។ ខ្ញុំជាមនុស្សម្នាក់ដែលមានការជឿនលឿនជាងគេ»។
ក្រោយការរកឃើញដំបូងៗរបស់លោក Raoult បានត្រូវបោះពុម្ធផ្សាយនៅក្នុងទស្សនាវដ្តីInternational Journal of Antimicrobial Agent កាលពីពាក់កណ្តាលខែមីនា លោក Trump បាននិយាយតាម tweet ថា ការប្រើផ្សំគ្នានៃឱសថទាំងពីរដែលលោក Raoult បានសាកល្បងអាចក្លាយជា«ទម្រង់ការធំបំផុតក្នុងការប្តូររបៀបព្យាបាល»ក្នុងប្រវត្តិវេជ្ជសាស្ត្រ។
ចាប់តាំងពីពេលនោះមកស.រ.អា.និងប្រទេសបារាំងបានអនុញ្ញាតឱ្យមានការប្រើថ្នាំhydroxychloroquine និង chloroquine ដោយមានកម្រិតនិងនៅពេលមានអាសន្នក្នុងការព្យាបាលអ្នកជំងឺធ្ងន់ធ្ងរបំផុតនៃជំងឺ COVID-19។ កាលពីថ្ងៃចន្ទទី៣០ខែមីនា ទីភ្នាក់ងារម្ហូបអាហារបារាំងបានព្រមានអំពីផលអាក្រក់ប្រកបដោយគ្រោះថ្នាក់នៃការប្រើថ្នាំទាំងពីរនេះ។
ក៏ប៉ុន្តែពួកសាធារណជនបានបដិសេធការរឹតត្បិតបែបនេះ។ ឱសថដ្ឋាននានាបានរាយការណ៍អំពីការប្រញ៉ាប់ប្រញ៉ាល់ទិញថ្នាំ Plaquenil ដែលជាឈ្មោះម្យ៉ាងទៀតនៃថ្នាំ hydroxychloroquine ដែលធ្វើឱ្យអ្នកជំងឺឯទៀតៗដែលអាស្រ័យលើថ្នាំនេះយូរមកហើយនោះ មានការបារម្ភ។
ការសិក្សាស្រាវជ្រាវថ្មីៗនិងធំជាងមុនកំពុងមានធ្វើនៅក្នុងទ្វីបអឺរ៉ុបនិងនៅស.រ.អា.ដើម្បីឱ្យដឹងថាតើការរកឃើញរបស់លោកRaoult ក្នុងចំណោមការរកឃើញឯទៀតៗ អាចត្រូវបានបញ្ចូលក្នុងការស្រាវជ្រាវទ្រង់ទ្រាយធំទេ។
នៅពេលជាមួយគ្នានោះ លោកបានល្បីឈ្មោះដូចតារាតន្ត្រីរ៉ុកដែរ។ ពួកអ្នកគាំទ្រលោកច្រើននាក់រួមបញ្ចូលលោក Dieudonne អ្នកកំប្លែកបារាំងដ៏ចម្រូងចម្រាស ពួកអ្នកទ្រទ្រង់នយោបាយស្តាំជ្រុល លោក Eric Cantona អតីតជើងឯកកីឡាបាល់ទាត់និងអ្នកនយោបាយសំខាន់ៗមួយចំនួនដែលខ្លះបានទទួលការព្យាបាលសាកល្បងរបស់លោក Raoult នៅក្រោយមានជំងឺ COVID-19។
លោក Christian Estrosi ដែលជាអភិបាលក្រុង Nice បាននិយាយតាម tweet ថា៖
«សូមអបអរសាទរលោក Raoult Didier និងក្រុមរបស់លោក។ ខ្ញុំមានមោទនភាពដែលបានរួមប្រយុទ្ធជាមួយលោក»។
ក៏ប៉ុន្តែពួកអ្នកជំនាញខាងវេជ្ជសាស្ត្រមួយចំនួនដែលមិនសូវរំភើប ដោយបានសាកសួរអំពីភាពគួរឱ្យជឿទុកចិត្តនៃការសិក្សាស្រាវជ្រាវរបស់លោក Raoult ដែលលើដំបូងមានទាក់ទិននឹងអ្នកជំងឺតែ២០នាក់ប៉ុណ្ណោះ។
នៅក្នុងការឆ្លើយតបនឹងលទ្ធផលនៃការសិក្សាស្រាវជ្រាវលើកទីពីររបស់លោក Raoult ដែលមានទាក់ទិននឹងអ្នកជំងឺ៨០នាក់ លោក Francois Balloux នៃសាកលវិទ្យាល័យក្រុងឡុងដ៍ប្រទេសអង់គ្លេសបានសរសេរតាម tweet ថា៖
«ខ្ញុំបារម្ភថាការណ៍នេះមិនធំដុំទេ»។
ដោយត្រូវបានចេញផ្សាយកាលពីថ្ងៃសុក្រទី២៧ ខែមីនា ការសិក្សាស្រាវជ្រាវនេះបានអះអាងថា ភាគច្រើននៃពួកអ្នកជំងឺដែលបានទទួលការព្យាបាលដោយការប្រើផ្សំគ្នានៃឱសថទាំងនេះ បានទទួលលទ្ធផលល្អ។
ក៏ប៉ុន្តែលោក Balloux បានកត់សម្គាល់ថា ពួកអ្នកជំងឺដែលបានទទួលការព្យាបាលសាកល្បងនេះមានរោគសញ្ញាតិចតួចនៃមេរោគកូរ៉ូណា ហើយទំនងជានឹងធូរស្រាលឡើងវិញជាមិនខាន៕
ប្រែសម្រួលដោយពិន ស៊ីសុវណ្ណ
