ប្រទេសចិនដែលជាប្រភពនៃមេរោគវីរុសកូរ៉ូណាដែលរាលដាលនៅទូទាំងពិភពលោកបានបញ្ជាក់ថា មានការឆ្លងថ្មីៗ៩៩ហើយថា យ៉ាងតិចណាស់មានអ្នកស្លាប់២៥នាក់ចាប់តាំងពីថ្ងៃសុក្រមក។
ការគំរាមកំហែងដោយមេរោគនេះហាក់ដូចជាចុះថមថយនៅក្នុងប្រទេសចិនដែលជាប្រភពនៃការឆ្លងមេរោគនេះកាលពីខែធ្នូ។
អង្គការសុខភាពពិភពលោកបាននិយាយកាលពីដើមសប្តាហ៍នេះថា មានករណីថ្មីៗនៃមេរោគ COVID-19 ជិត១៧ដងនៅខាងក្រៅប្រទេសចិនច្រើនជាងនៅខាងក្នុងព្រំដែនចិន។
ការរាលដាលនៃជំងឺនេះបានបង្ខំអ.ស.ប.ឱ្យសុំដល់ប្រទេស៩ពន្យារពេលការដាក់វេននៃពួកទាហានថែរក្សាសន្តិភាពរបស់ពួកគេចំនួនបីខែ។
លោក Nick Birnback អ្នកនាំពាក្យផ្នែកថែរក្សាសន្តិភាពរបស់អ.ស.ប.បាននិយាយថា ការពន្យារពេលនេះបានត្រូវសុំដើម្បីរក្សាកម្លាំងនៃកិច្ចប្រតិបត្តិការ និងបំពេញកាតព្វកិច្ចតាមអាណត្តិរបស់ពួកគេ។
ប្រទេសដែលពន្យារពេលការដាក់វេននៃកងកម្លាំងពួកគេនៅក្នុងបេសកកម្មនេះរបស់អ.ស.ប.មានរួមបញ្ចូលប្រទេសកម្ពុជា, ចិន, បារាំង, អាល្លឺម៉ង់, ឥណ្ឌា, អ៊ីតាលី, ណេប៉ាល់, កូរ៉េខាងត្បូងនិងប្រទេសថៃ។
កាលពីថ្ងៃសុក្រ លោកប្រធានាធិបតីស.រ.អ. ដូណាល់ ត្រាំ បានចុះហត្ថលេខាលើសចក្តីព្រាងច្បាប់មួយសម្រាប់បញ្ចេញប្រាក់៨ពាន់៣រយលានដុល្លារដើម្បីចំណាយគ្រាមានអាសន្នប្រយុទ្ធប្រឆាំងនឹងការរាលដាលមេរោគវីរុសកូរ៉ូណា។
វិធានការនេះផ្តល់ប្រាក់កាសសម្រាប់លទ្ធភាពនៃការព្យាបាលនិងការអភិវឌ្ឍថ្នាំវ៉ាក់សាំងដើម្បីជួយរដ្ឋាភិបាលរដ្ឋនិងរដ្ឋាភិបាលមូលដ្ឋានឆ្លើយតបនឹងការគំរាមកំហែងនេះ។
រដ្ឋាភិបាលមូលដ្ឋានមួយបែបនេះគឺស្រុក Montgomery រដ្ឋ Maryland ដែលជាតំបន់ជាយក្រុងមួយនៅខាងក្រៅរដ្ឋធានីវ៉ាស៊ីនតោន ដែលបានបញ្ជាក់អំពីករណីអ្នកមានជំងឺនេះដំបូងរបស់ផងខ្លួនក្នុងសប្តាហ៍នេះ។
ទឹកប្រាក់នេះមានរួមបញ្ចូល៣ពាន់លានដុល្លារសម្រាប់ការអភិវឌ្ឍថ្នាំវ៉ាក់សាំង,ប្រដាប់ធ្វើតេស្ត និងការព្យាបាល, ៨០០លានដុល្លារសម្រាប់ការស្រាវជ្រាវរកវិធីព្យាបាល, ២,២០០លានដុល្លារសម្រាប់ការបញ្ចៀសកុំឱ្យមានជំងឺនេះនិងការឆ្លើយតប,១,២៥០លានដុល្លារសម្រាប់វិធានការទប់មិនឱ្យរាលដាលសាកលនិង១ពាន់លានដុល្លារសម្រាប់គាំទ្រដល់ទីភ្នាក់ងារសុខាភិបាលរដ្ឋនិងមូលដ្ឋាន៕
