ស្ថានភាពមនុស្សធម៌និងអាហារូបត្ថម្ភនៃប្រជារាស្ត្រកូរ៉េខាងជើងរាប់លាននាក់មានភាពអាប់អួរ នៅមុនការរាតត្បាតជាសាកលនៃជំងឺកូវីដ១៩។ អង្គការកម្មវិធីស្បៀងអាហារពិភពលោក World Food Program ហៅកាត់ថា WFP និយាយថា មនុស្សជាង ១០ លាននាក់ ឬជិត ៤០ភាគរយ នៃចំនួនប្រជារាស្ត្រកូរ៉េខាងជើង ត្រូវការជំនួយមនុស្សធម៌។
អ្នកស្រី Elisabeth Byrs ជាអ្នកនាំពាក្យនៃអង្គការកម្មវិធីស្បៀងអាហារពិភពលោក។ អ្នកស្រីនិយាយថា មនុស្សកាន់តែច្រើនឡើងមិនបានទទួលសេវាខាងសុខភាព ទឹកស្អាត និងអនាម័យទេ។
អ្នកស្រី Byrs និយាយថា៖ «មានកុមារ ១ លាន ៧ សែននាក់ អាយុតិចជាង ៥ ឆ្នាំ រស់នៅក្រោមការគំរាមកំហែងនៃមហន្តរាយធម្មជាតិ ហើយនៅពេលនេះ មានការគំរាមកំហែងនៃការរាតត្បាតជាសាកលនៃជំងឺកូវីដ១៩ ថែមទៀត។ ការទទួលបានអាហារមិនគ្រប់គ្រាន់មានជាប្រចាំ ហើយវាបានរាលដាលដែលក្នុងរយៈពេលយូរ វានាំឱ្យមានការខូចខាតដល់សុខភាព និងការលូតលាស់របស់ក្រុមកុមារ ព្រមទាំងស្រ្តីមានផ្ទៃពោះ និងស្រ្តីមានទារកផងដែរ»។
អ្នកស្រី Byrs ថ្លែងថា កុមារម្នាក់ក្នុងបណ្តាកុមារ ១០ នាក់ អាយុតិចជាង ៥ ឆ្នាំ មានទម្ងន់ស្រាលក្រោមកម្រិតលូតលាស់ធម្មតា ហើយកុមារម្នាក់ក្នុងបណ្តាក្មេង ៥ នាក់ក្រិន។ អ្នកស្រីកត់សម្គាល់ថា ការខ្វះអាហារូបត្ថម្ភកម្រិតនេះ នឹងនាំឱ្យមានការខូចខាតសុខភាពកុមាររាប់សែននាក់ មិនអាចកែខៃបាន។
អង្គការកម្មវិធីស្បៀងអាហារពិភពលោកព្រមានថា វិធានការបញ្ចៀសមិនឱ្យមានជំងឺ ដូចជាការដាក់មនុស្សឱ្យនៅដាច់ពីគេជាដើម អាចធ្វើឱ្យក្រុមមនុស្សដែលងាយរងគ្រោះ មានការពិបាកក្នុងការទទួលបានការថែទាំសុខភាព និងអាហារូបត្ថម្ភ ដែលពួកគេត្រូវការដើម្បីឱ្យមានសុខភាពល្អ។
រដ្ឋាភិបាលកូរ៉េខាងជើងរបស់លោក គីម ជុងអ៊ុន មិនបានបញ្ជាក់ជាផ្លូវការអំពីចំនួនករណីអ្នកជំងឺកូវីដ១៩ទេ។ ក៏ប៉ុន្តែ កាលពីចុងខែមករា កូរ៉េខាងជើងបានបិទព្រំដែនខ្លួនជាមួយប្រទេសចិន ហើយបានបញ្ឈប់ពាណិជ្ជកម្មរវាងប្រទេសទាំងពីរ។
លោក Tomas Ojea Quintana ជាអ្នករាយការណ៍ពិសេស អ.ស.ប. អំពីស្ថានភាពសិទ្ធិមនុស្សនៅក្នុងប្រទេសកូរ៉េខាងជើង។ លោកនិយាយថា សកម្មភាពនេះបានបង្កើនវិបត្តិម្ហូបអាហារ ហើយបង្កើនការពិបាកខាងសេដ្ឋកិច្ច ដែលប្រជារាស្ត្រកូរ៉េខាងជើងកំពុងប្រឈម។
លោក Quintana និយាយថា មានគ្រួសារច្រើនឡើងៗបរិភោគអាហារតែពីរដងក្នុងមួយថ្ងៃ ហើយគ្រួសារខ្លះគ្មានអាហារបរិភោគទេ។ លោកថ្លែងថា គេរាយការណ៍ថា ពួកទាហានក៏រងគ្រោះដោយសារការខ្វះម្ហូបអាហារដែរ។
ក៏ប៉ុន្តែលោកបានសម្តែងកង្វល់ជាពិសេសចំពោះមនុស្សរាប់ម៉ឺននាក់ ដែលជាប់ឃុំឃាំងនៅក្នុងជំរំគុកនយោបាយសម្ងាត់។ លោកថ្លែងថា គេរាយការណ៍ថា អ្នកជាប់ឃុំឃាំងនៅក្នុងជំរំគុកទាំងនេះជាច្រើនបានស្លាប់ ដោយសារការធ្វើការធ្ងន់ និងការខ្វះម្ហូបអាហារ ជំងឺឆ្លង និងមានមនុស្សណែនក្តន់នៅក្នុងកន្លែងទាំងនោះ។
អ្នកស៊ើបអង្កេតរបស់ អ.ស.ប. រូបនេះអំពាវនាវឱ្យមានការដោះលែងជាបន្ទាន់នូវអ្នកទោស ដែលមានស្ថានភាពប្រកបដោយហានិភ័យ ជាពិសេសដោយសារការឆ្លងជំងឺ និងការស្លាប់ដោយជំងឺកូវីដ១៩។
លោក Quintana ក៏បានអំពាវនាវឲ្យក្រុមប្រឹក្សាសន្តិសុខ អ.ស.ប. ពិចារណាលុបចោលការដាក់ទណ្ឌកម្មទាក់ទងនឹងកម្មវិធីនុយក្លេអ៊ែរ និងកម្មវិធីកាំជ្រួចមីស៊ីលរបស់រដ្ឋាភិបាលក្រុងព្យុងយ៉ាង។ លោកនិយាយថា ការដាក់ទណ្ឌកម្មទាំងនេះមានផលប៉ះពាល់ធ្ងន់ធ្ងរដល់ជីវភាពប្រជារាស្ត្រកូរ៉េខាងជើង និងសមត្ថភាពរបស់រដ្ឋាភិបាល ក្នុងការឆ្លើយតបនឹងតម្រូវការរបស់ប្រជារាស្ត្រថែមទៀតផង៕
ប្រែសម្រួលដោយ លោកឈឹម សុមេធ
