សាលាដំបូងរាជធានីភ្នំពេញបានសម្រេចលើកលែងការចោទប្រកាន់លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្សហៅកាត់ថា សង់ត្រាល់ ពីបទរំលោភលើទំនុកចិត្ត ក្នុងតួនាទីលោកជាអតីតសមាជិកមួយរូបនៃគណៈកម្មការរៀបចំបុណ្យសពលោក កែម ឡី ដែលជាអ្នកវិភាគនយោបាយ។ នេះបើយោងតាមដីកាលើកលែងការចោទប្រកាន់ដែល VOA បានទទួលនិងតាមការបញ្ជាក់របស់មន្ត្រីអង្គការសង់ត្រាល់។
ដីកាលើកលែងបទចោទនេះកើតមានឡើង នៅក្រោយពេលលោក មឿន តុលាបានចូលទៅបំភ្លឺនៅសាលាដំបូងរាជធានីភ្នំពេញកាលពីខែមិថុនា អំពីទំនាក់ទំនងរបស់លោកជាមួយលោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងព្រះតេជព្រះគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ។ ការបំភ្លឺនោះពាក់ព័ន្ធនឹងបណ្តឹងរបស់អ្នកនយោបាយមួយរូប ដែលបានប្តឹងថា លោក មឿន តុលា និងអ្នកពាក់ព័ន្ធពីរនាក់ផ្សេងទៀតបានធ្វើឲ្យបាត់បច្ច័យបុណ្យសពលោក កែម ឡី។
ដីកាលើកលែងការចោទប្រកាន់របស់លោក អ៊ី ឋាវរៈ ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់ពីដំណើររឿងនៃការប្តឹងផ្តល់របស់លោក ពេជ្រ ស្រស់ ប្រធានគណបក្សយុវជនកម្ពុជា ដែលចោទថា គណៈកម្មការរៀបចំបុណ្យសពលោក កែម ឡី បានធ្វើឲ្យបាត់បច្ច័យបុណ្យចំនួនប្រហែល៣០ម៉ឺនដុល្លារ។ បច្ច័យបុណ្យនេះគឺបានមកទាំងពីក្នុងស្រុកនិងក្រៅប្រទេស។ លោកចៅក្រម អ៊ី ឋាវរៈ បានលើកឡើងពីសំអាងហេតុក្នុងដីកាលើកលែងបទចោទប្រកាន់របស់លោក ពាក់ព័ន្ធនឹងការផ្តល់ចម្លើយដែលមានភាពស៊ីសង្វាក់គ្នារវាងលោក មឿន តុលា និងលោក កែម រិទិ្ធសិត ដែលបានឆ្លើយថា៖
«ផ្អែកតាមលិខិតប្រគល់សិទ្ធិតំណាងដោយអាណត្តិ ចុះថ្ងៃទី២៦ ខែសីហា ឆ្នាំ២០១៦ ឃើញថា ព្រះតេជគុណ ប៊ុត ប៊ុនតិញ លោក ប៉ា ងួនទៀត និងលោក មឿន តុលា ជាគណៈកម្មការក្នុងការរៀបចំបុណ្យ១០០ថ្ងៃ ប៉ុន្តែពេលបុណ្យ នៅខេត្តតាកែវ ខ្លួនបានឃើញតែពីរនាក់ទេ គឺព្រះតេជគុណ ប៊ុត ប៊ុនតិញ និងលោកប៉ា ងួនទៀង ចំណែកលោក មឿន តុលា ខ្លួនអត់បានឃើញទេ គឺអាចឲ្យតុលាការជឿបានថា ជនត្រូវចោទឈ្មោះ មឿន តុលា ពិតជាមិនបានប្រព្រឹត្តអំពើរំលោភលើទំនុកចិត្ត ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៦ ប្រាកដមែន»។
ជាសេចក្តីសន្និដ្ឋាន ដីកាលើកលែងការចោទប្រកាន់របស់លោក អ៊ី ឋាវរៈ បានសរសេរក្នុងន័យដើមថា៖
«ហេតុដូច្នេះសម្រេច លើកលែងចោទប្រកាន់លើឈ្មោះ មឿន តុលា ភេទប្រុស អាយុ៤៣ឆ្នាំ ពីបទរំលោភលើទំនុកចិត្តប្រព្រឹត្តនៅ រាជធានីភ្នំពេញ កាលពីអំឡុងឆ្នាំ ២០១៦ តាមបញ្ញត្តិមាត្រា៣៩១ និងមាត្រា៣៩២នៃក្រមព្រហ្មទណ្ឌ»។
នៅមុនពេលមានការលើកលែងការចោទប្រកាន់លើលោក មឿន តុលានេះ មានអង្គការសង្គមស៊ីវិលជាតិជាង៣០បានអំពាវនាវឲ្យមានការទម្លាក់បទចោទលើលោក មឿន តុលា និងអតីតគណៈកម្មាការរៀបចំបុណ្យសពលោក កែម ឡី ពីររូបទៀត ដោយក្រុមអង្គការទាំងនោះលើកឡើងថា ការចោទប្រកាន់របស់តុលាការបានបង្ហាញពីការគំរាមកំហែងដើម្បីបំបិទសំឡេងសង្គមស៊ីវិលនិងអ្នកការពារសិទ្ធិមនុស្សនៅកម្ពុជា។
ចំណែកក្រុមហ៊ុនសមាគមឧស្សាហកម្មកាត់ដេរសម្លៀកបំពាក់ស្បែកជើង និងសមាគមផ្សេងទៀតរបស់សហរដ្ឋអាមេរិកនិងអង់គ្លេស ព្រមទាំងសហភាពអឺរ៉ុបបានទទូចឲ្យលោកនាយករដ្ឋមន្ត្រី ហ៊ុន សែន ចាត់វិធានការកែទម្រង់ស្ថានភាពសិទ្ធិមនុស្សនិងពលកម្ម។
លោក ឃុន ថារ៉ូ ដែលជាសហការីរបស់លោក មឿន តុលា និងជាមន្ត្រីសម្របសម្រួលការងារនៃអង្គការសង់ត្រាល់ បានប្រាប់ VOA នៅថ្ងៃពុធនេះថា ការទម្លាក់បទចោទប្រកាន់នេះនឹងបើកផ្លូវឲ្យលោក មឿន តុលា អាចបំពេញការងារ ដោយមិនមានការយាយីខាងច្បាប់។
«យើងស្វាគមន៍ទៅនឹងការទម្លាក់ការចោទប្រកាន់របស់តុលាការ ពីព្រោះថា វាអាចធ្វើឲ្យគាត់ បន្តនៅក្នុងការអនុវត្តនូវផែនការការងារ និងទស្សនវិស័យរបស់ស្ថាប័ន របស់អង្គការសង់ត្រាល់ទៅបន្តទៀត»។
មន្ត្រីខាងការងាររូបនេះថ្លែងបន្ថែមថា សេចក្តីសម្រេចរបស់តុលាការនេះបានធ្វើឡើងក្នុងពេលមានការធ្វើបេសកកម្មរបស់ក្រុមមន្ត្រីទទួលបន្ទុកពាណិជ្ជកម្មសហភាពអឺរ៉ុប ដែលកំពុងស្វែងរកការណ៍ពិតទាក់ទិនការរំលោភសិទ្ធិមនុស្សនៅកម្ពុជា នៅក្រោមក្របខណ្ឌ «អ្វីៗទាំងអស់វៀរលែងតែអាវុធ» ឬ Everything But Arms ហៅកាត់ថា EBA។ ក្របខណ្ឌ EBA នេះគឺជាគម្រោង អនុគ្រោះពន្ធដល់ទំនិញរបស់កម្ពុជា ដែលនាំចូលទៅទីផ្សារសហភាពអឺរ៉ុប។
លោក ឃុន ថារ៉ូ បន្ថែមថា សាលាដំបូងរាជធានីភ្នំពេញគួរពិចារណាទម្លាក់ចោលបទចោទប្រឆាំងនឹងបុគ្គលពីរនាក់ទៀត ក្នុងសំណុំរឿងដដែលនេះ ដោយពួកគេក៏មិនបានប្រព្រឹត្តកំហុសនោះដែរ ក្នុងការចាត់ចែងពិធីបុណ្យសពលោកកែម ឡីនោះ។
យ៉ាងណាក្តី លោក លី សុផាណា អ្នកនាំពាក្យសាលាដំបូងរាជធានីភ្នំពេញ បញ្ជាក់តាមសារឆ្លើយឆ្លងទូរស័ព្ទចល័តថា ចៅក្រមស៊ើបសួរបានសម្រេចលើកលែងចោទប្រកាន់លើលោកមឿន តុលា ហើយបំបែកសំណុំរឿងដើម្បីស៊ើបសួរបន្តលើជនត្រូវចោទដទៃទៀត។
លោកបានសរសេរតាមន័យដើមថា៖ «ការសម្រេចនេះជាសិទ្ធិអំណាច និងឯករាជ្យភាពរបស់តុលាការ ក្រោយពីបានស៊ើបសួរយ៉ាងត្រឹមត្រូវ តាមនីតិវិធីទៅលើបុគ្គលពាក់ព័ន្ធ និងការពិនិត្យលើភស្តុតាងនានានៅក្នុងសំណុំរឿង»។
រឿងក្តីរបស់លោក មឿន តុលា ក៏ទទួលបានកិច្ចអន្តរាគមន៍ពីក្រសួងការងារ ដែលកាលពីខែមេសា ឆ្នាំ២០១៨ បានបញ្ជាក់ពីចេតនាចង់បញ្ចប់រឿងលោក មឿន តុលាតាមនីតិវិធីរបស់តុលាការ។ ក្រសួងការងារអះអាងថា ការធ្វើដូចនេះនឹងធានាបានសិទ្ធិសេរីភាពអង្គការវិជ្ជាជីវៈនៅក្នុងប្រទេសកម្ពុជា។
លោក មឿន តុលា មានប្រសាសន៍ថា នេះជាយុត្តិធម៌មួយសម្រាប់រូបលោក នៅពេលដែលតុលាការសម្រេចទម្លាក់បទចោទប្រកាន់នេះ ហើយថា លោកក៏មានក្តីរីករាយនឹងសេចក្តីសម្រេចរបស់តុលាការយ៉ាងដូច្នេះផងដែរ។
លោកបានបន្ថែមថា លោកនឹងមិនធ្វើការតបតណាមួយជាមួយនឹងបណ្តឹងរបស់លោក ពេជ្រ ស្រស់ នោះឡើយ ដោយលោកមិនចង់ឃើញការបែកបាក់គ្នារវាងខ្មែរនិងខ្មែរ។
«ទោះយ៉ាងណាក៏ដោយ ទោះបីយើងមាននិន្នាការខុសគ្នា លោក ពេជ្រ ស្រស់គាត់មាន និន្នាការនយោបាយខាងណា ខាងណី គាត់ជាមេគណបក្សអីក៏ដោយ ក៏ប៉ុន្តែទីបំផុត យើងនៅតែខ្មែរដូចគ្នា។ ហើយខ្ញុំគិតថា ធ្វើជាគំរូមួយសម្រាប់សង្គមខ្មែរ ឲ្យចេះស្រឡាញ់គ្នា ឲ្យចេះរួបរួមសាមគ្គីគ្នា ដើម្បីជាតិយើង។ កុំគិតតែពីឈ្លោះគ្នា។ យើងអត់ អត់ចប់ទេ ហើយប្រទេសជិតខាងគេរីកចម្រើន តាំងពីក្រោមយើងរហូតដល់ហួសយើង ហើយយើងនៅតែឈ្លោះគ្នាអីចឹង។ ថ្ងៃណាបានយើងចប់ឈ្លោះគ្នា ហើយយើងចាប់ដៃគ្នាកសាងប្រទេស?»
លោក អំ សំអាត ប្រធានការិយាល័យបច្ចេកទេសស៊ើបអង្កេតរបស់អង្គការឃ្លាំមើលសិទ្ធិមនុស្សលីកាដូ ដែលឃ្លាំមើលរឿងក្តីរបស់លោក មឿន តុលា បានថ្លែងកាលពីពេលកន្លងមកថា សម្ពាធពីអ្នកបញ្ជាទិញផលិតផលកាត់ដេររបស់កម្ពុជាក៏អាចរួមចំណែកធ្វើឲ្យរឿងក្តីប្រធានអង្គការធ្វើការក្នុងការលើកស្ទួយសិទ្ធិកម្មករនេះ អស់ភាពស្មុគស្មាញ និងអាចរកដំណោះស្រាយបានឆាប់ផងដែរ៕
