នៅព្រឹកថ្ងៃសុក្រនេះ លោកនាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា សង់ត្រាល់ និងជាអតីតសមាជិកមួយរូបនៃគណៈកម្មការរៀបចំបុណ្យសពលោកបណ្ឌិត កែម ឡី អ្នកវិភាគនយោបាយនោះ បានចូលទៅបំភ្លឺនៅមុខចៅក្រមសាលាដំបូងរាជធានីភ្នំពេញ ចំពោះបទចោទដែលថា លោកបានកិបកេងលុយបច្ច័យបុណ្យសពលោក កែម ឡី ដែលត្រូវបានខ្មាន់កាំភ្លើងបាញ់ស្លាប់ទាំងកណ្តាលថ្ងៃក្នុងរាជធានីភ្នំពេញកាលពីខែកក្កដា ឆ្នាំ២០១៦។
បន្ទាប់ពីលោកត្រូវបានសាកសួរដោយលោក អ៊ី ឋាវរៈ ចៅក្រមស៊ើបសួរអស់រយៈពេលជាងមួយម៉ោង លោក មឿន តុលា បានចាកចេញពីតុលាការ ដោយសុំមិនផ្តល់ការអធិប្បាយទៅលើរឿងក្តីរបស់លោក។
ប៉ុន្តែលោក ឃុន ថារ៉ូ ដែលជាសហការីរបស់លោក មឿន តុលា និងជាមន្ត្រីសម្របសម្រួលការងារនៃអង្គការសង់ត្រាល់ បានប្រាប់ VOA តាមទូរស័ព្ទថា ចៅក្រមបានបន្តសួរសំណួរស្រដៀងគ្នានឹងដំណាក់កាលសាកសួររបស់តំណាងអយ្យការ ដែលបានសួរលោកអំពីទំនាក់ទំនងរបស់លោកជាមួយលោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងព្រះតេជព្រះគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ ពាក់ព័ន្ធនឹងបណ្តឹងរបស់អ្នកនយោបាយមួយរូប ដែលបានប្តឹងលោក មឿន តុលា និងអ្នកពាក់ព័ន្ធពីរនាក់ផ្សេងទៀតនោះថា បានធ្វើឲ្យបាត់បច្ច័យបុណ្យសពលោក កែម ឡី នោះ។
ដោយហេតុចៅក្រមស៊ើបសួរបានអនុញ្ញាតឲ្យលោក មឿន តុលា បន្តមានសេរីភាព បន្ទាប់ពីការសាកសួរនោះ លោក ឃុន ថារ៉ូ យល់ថា មានសញ្ញាណវិជ្ជមានច្រើនសម្រាប់លោក មឿន តុលា ដើម្បីបានរួចផុតពីការចោទប្រកាន់ដែលផ្តើមចេញពីបណ្តឹងរបស់ប្រធានគណបក្សនយោបាយថ្មីថ្មោងមួយ។
លោកមានប្រសាសន៍ថា៖
«ជាលក្ខណៈវិជ្ជមាន យើងឃើញថា គាត់បានអនុញ្ញាតឲ្យចេញមកក្រៅតុលាការហ្នឹង ពីបន្ទប់តុលាការហ្នឹង ហើយវាជាសញ្ញាមួយល្អដែរ ដែលចៅក្រមស៊ើបហ្នឹង លោកអាចមានដំណោះស្រាយមួយនៅក្នុងការធ្វើសេចក្តីបញ្ចប់នៅក្នុងដីកាដំណោះស្រាយណាមួយ។ ប៉ុន្តែមកដល់ពេលនេះ យើងអត់ទាន់មានការធានាថា លោក តុលា ហ្នឹង គាត់ត្រូវបាន ទម្លាក់ចោលនូវការចោទប្រកាន់ ឬក៏ទម្លាក់ចោលករណីរបស់គាត់នៅឡើយទេ»។
កាលពីថ្ងៃទី២២ ខែកញ្ញា ព្រះរាជអាជ្ញារងអមសាលាដំបូងរាជធានីភ្នំពេញគឺលោក គុជ ឡេង បានចេញដីកាកោះហៅអតីតសមាជិកគណៈកម្មការចំនួន៣រូប ដែលរៀបចំបុណ្យសពរបស់លោក កែម ឡី ឲ្យចូលបំភ្លឺ ដើម្បីសាកសួរពាក់ព័ន្ធនឹងបទរំលោភលើសេចក្ដីទុកចិត្ត ទៅតាមបណ្ដឹងរបស់លោក ពេជ្រ ស្រស់ ប្រធានគណបក្សយុវជនកម្ពុជា។ ក្នុងនោះមានលោក មឿន តុលា ផងដែរ។
លោក អំ សំអាត ប្រធានការិយាល័យបច្ចេកទេសស៊ើបអង្កេតរបស់អង្គការឃ្លាំមើលសិទ្ធិមនុស្សលីកាដូ ដែលបានតាមអង្កេតមើលរឿងក្តីរបស់លោក មឿន តុលា បានថ្លែងថា សំណុំរឿងរបស់សកម្មជនក្នុងវិស័យការងារនេះអាចមានភាពធូរស្រាល ដោយសារក្រសួងការងារបានចេញលិខិតបញ្ជាក់ពីបំណងរបស់ក្រសួងថា នឹងស្វែងរកលទ្ធភាពដើម្បីជួយទម្លាក់បទចោទប្រកាន់លើលោក មឿន តុលា តាមនីតិវិធីនៃប្រព័ន្ធយុត្តិធម៌កម្ពុជា។ លោកថា សម្ពាធពីអ្នកបញ្ជាទិញផលិតផលកាត់ដេររបស់កម្ពុជាក៏អាចរួមចំណែកធ្វើឲ្យរឿងក្តីលោក មឿន តុលា នេះជួបផលវិជ្ជមានច្រើនផងដែរ។
«ខ្ញុំគិតថា បញ្ហាទាំងអស់នេះប្រហែលជា វាអាចនឹងធូរស្រាល ដោយសារតែទាក់ទងនឹងបញ្ហានៃការអនុគ្រោះពន្ធក្នុងការនាំសម្លៀកបំពាក់ វាយនភណ្ឌចេញ។ ហើយទាំងអស់នេះយើងឃើញថា ម្ចាស់បញ្ជាទិញ ហើយនិងអ្នកទិញក៏គេសុទ្ធតែមានលក្ខខណ្ឌ ហើយក៏មានការទាមទារដូចគ្នាដែរ»។
មន្ត្រីសិទ្ធិមនុស្សរូបនេះបានថ្លែងបន្តថា ការចោទដែលថា លោក មឿន តុលា បានបន្លំលួចយកលុយបុណ្យសពលោក កែម ឡី នោះក៏ត្រូវបានក្រុមគ្រួសារលោក កែម ឡីបដិសេធចោលផងដែរ។ យ៉ាងណាក៏ដោយ លោកបានបន្ថែមថា មានតែរង់ចាំមើលការសម្រេចរបស់តុលាការតែប៉ុណ្ណោះ។
សេចក្តីប្រកាសរបស់ក្រសួងការងារ ដែលបានបង្ហោះនៅលើទំព័រហ្វេសប៊ុករបស់ក្រសួងកាលពីខែមេសា ឆ្នាំ២០១៨ បានបញ្ជាក់ពីចេតនាចង់បញ្ចប់រឿងលោក មឿន តុលាតាមនីតិវិធីរបស់តុលាការ ដែលនឹងធានាអំពីសិទ្ធិសេរីភាពអង្គការវិជ្ជាជីវៈនៅក្នុងប្រទេសកម្ពុជា។
សេចក្តីប្រកាសនោះត្រូវបានសរសេរតាមអត្ថន័យក្នុងន័យដើមថា៖
«ដើម្បីធានាសិទ្ធិសេរីភាពអង្គការវិជ្ជាជីវៈ រាជរដ្ឋាភិបាលបានចាត់វិធានការតាមនីតិវិធីតុលាការក្នុងការលើកលែងការចោទប្រកាន់លើលោក មឿន តុលា ដែលត្រូវបានតុលាការធ្វើការចោទប្រកាន់លើសំណុំរឿងព្រហ្មទណ្ឌលេខ៥៧៥០ ចុះថ្ងៃទី៥ ខែកញ្ញា ឆ្នាំ២០១៧ ពីបទរំលោភលើទំនុកចិត្ត ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៦»។
លោក ឃុន ថារ៉ូ ដែលជាសហការីរបស់លោក មឿន តុលា បានរំពឹងថា តុលាការនឹងធ្វើសុភវិនិច្ឆ័យផ្តល់យុត្តិធម៌ដល់លោក មឿន តុលា ដើម្បីបើកផ្លូវឲ្យលោកបានបំពេញការងារវិជ្ជាជីវៈឯករាជ្យរបស់លោក ដោយមិនមានការបៀតបៀនតាមផ្លូវតុលាការ។
«យើងសង្ឃឹមថា តុលាការនឹងពិចារណានៅក្នុងការទម្លាក់ចោលនូវការចោទប្រកាន់ចំពោះលោកតុលាហ្នឹងហើយ ពីព្រោះថា វាជារឿងមួយដែលសំខាន់ ពីព្រោះថា បើសិនជា...តុលាការមិនទម្លាក់ចោលការចោទប្រកាន់ចំពោះគាត់ទេ វាអាចជាបញ្ហាមួយសម្រាប់ស្ថាប័នដែរ ដោយសារគាត់ជានាយកប្រតិបត្តិ នៅកន្លែងនេះ ហើយអីចឹង វាអាចប៉ះពាល់ទៅនឹងដំណើរការនៃការអនុវត្តការងារ ប្រចាំថ្ងៃរបស់ស្ថាប័ន»។
VOA មិនទាន់អាចទាក់ទងលោក អ៊ី ឋាវរៈ ចៅក្រមស៊ើបសួរសាលាដំបូងរាជធានីភ្នំពេញ បាននៅឡើយទេ មកដល់ល្ងាចថ្ងៃសុក្រនេះ។
ក្រោយមានការចោទប្រកាន់មន្ត្រីអង្គការសង្គមស៊ីវិលសំខាន់ៗ៣រូបនេះ គេសង្កេតឃើញថា អង្គការសង្គមស៊ីវិលជាតិជាង៣០ បានអំពាវនាវឲ្យមានការទម្លាក់បទចោទលើអ្នកទាំង៣ ដោយលើកឡើងថា ការចោទប្រកាន់របស់តុលាការបានបង្ហាញពីការគំរាមកំហែងដើម្បីបំបិទសំឡេងសង្គមស៊ីវិល និងអ្នកការពារសិទ្ធិមនុស្សនៅកម្ពុជា។
ចំណែកក្រុមហ៊ុន សមាគមឧស្សាហកម្មកាត់ដេរសំលៀកបំពាក់ ស្បែកជើង និងសមាគមផ្សេងទៀតរបស់សហរដ្ឋអាមេរិក និងអង់គ្លេស ព្រមទាំងសហភាពអឺរ៉ុប បានទទូចឲ្យលោកនាយករដ្ឋមន្ត្រី ហ៊ុន សែន ចាត់វិធានការកែទម្រង់ស្ថានភាពសិទ្ធិមនុស្ស និងពលកម្ម៕
