អង្គការសង្គមស៊ីវិលជាង៣០ អំពាវនាវឲ្យមានការទម្លាក់បទចោទលើមន្ត្រីអង្គការសង្គមស៊ីវិលសំខាន់៣រូបដែលរងការចោទប្រកាន់ថា បានកិបកេងលុយពីបុណ្យសពលោក បណ្ឌិត កែម ឡី និងថា ការចោទប្រកាន់របស់តុលាការ បានបង្ហាញពីការគំរាមកំហែងដើម្បីបំបិទសំឡេងសង្គមស៊ីវិល និងអ្នកការពារសិទ្ធិមនុស្សនៅកម្ពុជា។
អតីតគណៈកម្មការបុណ្យសពលោក កែម ឡី ទាំង៣រូបដែលរងបណ្តឹងរបស់អ្នកនយោបាយ ពេជ ស្រស់ ថាបានកិបកេងប្រាក់ពីបុណ្យសពលោក កែម ឡី រួមមាន លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងលោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្សព្រមទាំងព្រះតេជព្រះគុណ ប៊ុត ប៊ុនតេញ ស្ថាបនិកបណ្តាញព្រះសង្ឃឯករាជ្យ។ អ្នកទាំងបីត្រូវបានព្រះរាជអាជ្ញារងអមតុលាការភ្នំពេញចោទប្រកាន់កាលពីពីរសប្តាហ៍មុនពីបទ «រំលោភលើទំនុកចិត្ត» ដែលបទល្មើសនេះអាចប្រឈមនឹងការជាប់ពន្ធនាគារពី៦ខែ ទៅ៣ឆ្នាំ។
សេចក្តីថ្លែងការណ៍រួមចេញនៅថ្ងៃទី៣០ ខែមករានេះ ឲ្យដឹងថា អង្គការ សហគមន៍ចំនួន៣៥ ដែលធ្វើការពាក់ព័ន្ធនឹងសិទ្ធិ និងការអភិវឌ្ឍ បានអំពាវនាវឲ្យទម្លាក់ចោលបទចោទចំពោះថ្នាក់ដឹកនាំអង្គការមិនមែនរដ្ឋាភិបាល និងបញ្ឈប់ការយាយីដែលបន្តកើតមានលើសង្គមស៊ីវិល។ សេចក្តីថ្លែងការណ៍នោះបន្តថា ការចោទប្រកាន់របស់តុលាការគឺជាការចោទប្រកាន់ដែលគ្មានមូលដ្ឋាន និងផ្អែកតែទៅលើភស្តុតាងក្នុងបណ្តឹងរបស់លោក ពេជ ស្រស់ ដែលជាប្រធានគណបក្សយុវជនកម្ពុជាតែប៉ុណ្ណោះ។
ក្រុមអង្គការទាំងនោះបានបន្ថែមក្នុងសេចក្តីថ្លែងការណ៍រួមក្នុងន័យដើមថា៖ «យើងខ្ញុំអំពាវនាវដល់អាជ្ញាធរកម្ពុជាឲ្យបញ្ឈប់ជាបន្ទាន់នូវការធ្វើទុក្ខបុកម្នេញមកលើអង្គការសង្គមស៊ីវិល អ្នកការពារសិទ្ធិមនុស្ស និងសកម្មជនដែលកំពុងធ្វើការដោយស្របច្បាប់ និងការងារដែលផ្តល់អត្ថប្រយោជន៍យ៉ាងសំខាន់ដល់ការអភិវឌ្ឍប្រកបដោយចីរភាពរបស់កម្ពុជា។ យើងខ្ញុំស្នើឲ្យរដ្ឋាភិបាលកម្ពុជាគោរពរដ្ឋធម្មនុញ្ញកម្ពុជានិងច្បាប់សិទ្ធិមនុស្សអន្តរជាតិនិងដើម្បីឲ្យសង្គមស៊ីវិលអាចដំណើរការទៅមុខដោយគ្មានការរឹតត្បិតនិងយាយី»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ប្រាប់ VOA ថា ការចេញសេចក្តីថ្លែងការណ៍រួមរបស់អង្គការសង្គមស៊ីវិលនៅព្រឹកនេះ គឺចង់បង្ហាញឲ្យប្រជាពលរដ្ឋបានដឹងពីការមិនពេញចិត្តរបស់សង្គមស៊ីវិល ពាក់ព័ន្ធនឹងការចោទប្រកាន់របស់តុលាការទាំងមិនសមហេតុផលទៅលើមេដឹកនាំសង្គមស៊ីវិលដែលធ្វើកិច្ចការមនុស្សធម៌។ លោកបន្ថែមដោយរំពឹងថា រដ្ឋាភិបាលនឹងពិនិត្យលើការអនុវត្តរបស់តុលាការ ដើម្បីស្តារប្រព័ន្ធយុត្តិធម៌នៅកម្ពុជា។
លោកបញ្ជាក់ថា៖ «បើសិនជាប្រមុខរដ្ឋាភិបាលលោកចង់ស្តារនូវប្រព័ន្ធយុត្តិធម៌សង្គមកម្ពុជាយើង ហើយចង់ឲ្យពលរដ្ឋ ក៏ដូចជាអង្គការសង្គមស៊ីវិល និងសាធារណៈជនមានជំនឿទៅលើប្រព័ន្ធតុលាការនេះ គួរតែរដ្ឋាភិបាលពិនិត្យ និងធ្វើការអន្តរាគមន៍ទៅតាមនីតិវិធីទៅស្ថាប័នពាក់ព័ន្ធដែលអាចជួយស្តារនូវជំនឿនេះ ពីព្រោះយើងដឹងទាំងអស់គ្នាហើយថា ជំនឿលើប្រព័ន្ធយុត្តិធម៌នៅកម្ពុជានេះ ត្រូវបានគេមើលឃើញហើយថា វាបាត់ទំនុកចិត្តពីសាធារណៈជនមែនទែនចំពោះការអនុវត្តនៅពេលកន្លងមកហ្នឹង»។
អតីតគណៈកម្មការបុណ្យសពលោកបណ្ឌិត កែម ឡី ទាំងបីរូប ដែលកំពុងស្ថិតនៅក្រៅប្រទេស បានច្រានចោលការចោទប្រកាន់របស់តុលាការដោយអះអាងថា ពួកគេគ្រាន់តែជួយរៀបចំកម្មវិធីបុណ្យ មិនមានពាក់ព័ន្ធនឹងបច្ច័យបុណ្យនោះទេ។ ពួកគេបន្ថែមថា មូលនិធិដែលជាបច្ច័យបុណ្យសពទាំងនោះត្រូវបានគ្រប់គ្រងដោយសាច់ញាតិរបស់លោក កែម ឡី។
លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យដែលកំពុងស្ថិតនៅសហរដ្ឋអាមេរិក ប្រាប់ VOA តាមរយៈសារក្នុងបណ្តាញសង្គម Facebook នារសៀលថ្ងៃអង្គារនេះថា ការចោទប្រកាន់របស់តុលាការមានចរិកនយោបាយ និងថាជាការចោទដើម្បីបង្រ្កាបសកម្មជនសិទ្ធិមនុស្សនិងជាការសងសឹកចំពោះសកម្មភាពរបស់អតីតគណៈកម្មការបុណ្យដែលសកម្មក្នុងការធ្វើបុណ្យលោកបណ្ឌិត កែម ឡី។
VOA មិនអាចទាក់ទងសុំការអធិប្បាយពីលោក លី សុផាណា អ្នកនាំពាក្យសាលាដំបូងរាជធានីភ្នំពេញបានទេ រហូតដល់ល្ងាចថ្ងៃអង្គារនេះ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីថ្លែងថា ការលើកឡើងរបស់អង្គការសង្គមស៊ីវិលទាំងនោះ គឺជាការតស៊ូមតិដែលមិនស្របតាមនីតិរដ្ឋ និងថា រដ្ឋាភិបាលមិនមានសិទ្ធិណាមួយដើម្បីលូកដៃលើការសម្រេចរបស់តុលាការនោះទេ។
លោកមានប្រសាសន៍ថា៖ «យើងដឹងថាការងារនេះជាការងាររបស់តុលាការ មិនមានការតស៊ូមតិណាមួយដែលអាចមានឥទ្ធិពលជះទៅលើដំណើរការរបស់តុលាការនោះទេ។ ហើយយើងដឹងថាស្រុកយើងកំពុងពង្រឹងនីតិរដ្ឋ ហើយអង្គការទាំងនោះគួរកុំប្រើពាក្យរឿងនយោបាយ។ បើមានការចោទប្រកាន់យើងគួរស្វែករកមេធាវីល្អដើម្បីទៅតតាំងតាមអង្គហេតុ និងអង្គច្បាប់ ជាជាងយកករណីនេះជាករណីវិភាគនយោបាយ»។
លោក កែម ឡី អ្នកវិភាគសង្គមដ៏ល្បីល្បាញត្រូវបានខ្មាន់កាំភ្លើងបាញ់សម្លាប់ទាំងកណ្តាលថ្ងៃ នៅកណ្តាលរាជធានីភ្នំពេញ កាលពីខែកក្កដាឆ្នាំ២០១៦។ មុនការដង្ហែសពលោក កែម ឡីទៅកាន់ផ្ទះកំណើតរបស់លោកក្នុងខេត្តតាកែវ គណៈកម្មការរៀបចំបុណ្យសពត្រូវបានបង្កើតឡើង ដើម្បីរៀបចំបុណ្យសពរបស់លោក កែម ឡី ឲ្យបានអធិកអធមក្នុងវត្តមួយនៅត្រើយម្ខាងរាជធានីភ្នំពេញ។ ប៉ុន្មានខែក្រោយមក គ្រួសាររបស់លោក កែម ឡី បានប្រារព្ធខួបបុណ្យសពនៃការស្លាប់របស់លោកនៅឯស្រុកកំណើតក្នុងខេត្តតាកែវ និងមានព័ត៌មានថា មានការបាត់បច្ច័យបុណ្យដែលរៀបចំដោយអតីតគណៈកម្មការបុណ្យ។
លោកស្រី ប៊ូ រចនា ភរិយារបស់លោកបណ្ឌិត កែម ឡី បានបញ្ជាក់តាមប្រព័ន្ធផ្សព្វផ្សាយក្នុងពេលកន្លងមកថា ពុំមានការបាត់លុយបច្ច័យបុណ្យដូចការចោទប្រកាន់នោះទេ៕
