ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មន្ត្រី​បក្ស​សង្គ្រោះ​ជាតិ​រំឭក​តាម​ហ្វេសប៊ុក​នូវ​ខួប១​ឆ្នាំ​នៃ​ការ​រំលាយ​បក្ស​ខ្លួន​ដោយ​បង្ហាញ​ឆន្ទៈ​ស្មោះស្ម័គ្រ


រូបឯកសារ៖ បុរស​ម្នាក់​អង្គុយ​ចាំ​ដំណឹង នៅមុខ​ទីស្នាក់ការ​កណ្ដាល​គណបក្ស​សង្គ្រោះ​ជាតិ ស្របពេល​ដែល​សមត្ថកិច្ច​បាន​ព្យាយាម​តាម​ស្កាត់​ឡាន​របស់​លោក កឹម សុខា អនុប្រធាន​គណបក្ស​នេះ កាលពីថ្ងៃព្រហស្បតិ៍ ទី២៦ ខែឧសភា ឆ្នាំ២០១៦។ (អូន ឆេងប៉រ/VOA)

នៅ​ថ្ងៃ​សុក្រ​នេះ​ ​គឺ​មាន​រយៈពេល​មួយ​ឆ្នាំ​គត់​ ​ដែល​គណបក្ស​សង្គ្រោះ​ជាតិ​ត្រូវ​បាន​តុលាការ​កំពូល​រំលាយ​ក្រោម​បទ​ចោទ​ថា​ បាន​ឃុបឃិតជាមួយ​បរទេស​​រៀបចំ​គម្រោង​ផ្តួល​រំលំ​រដ្ឋាភិបាល។

ក្រុម​មន្រ្តី​បក្ស​ជំទាស់​សង្គ្រោះ​ជាតិ​មួយ​ចំនួន​ទាំង​ក្នុង​និង​ក្រៅ​ប្រទេស​ ​បាន​រំឭក​ពី​ពេល​វេលា​មួយ​ឆ្នាំ​នៃ​ការ​រំលាយ​គណបក្ស​សង្គ្រោះ​ជាតិ​តាម​បណ្តាញ​សង្គម​ហ្វេសប៊ុក​ ​ដោយ​ភ្ជាប់​នឹង​សារលើក​ឡើង​ថា​ ​«គណបក្ស​សង្គ្រោះ​ជាតិ​ត្រូវ​បាន​រំលាយ​តែ​រាង​កាយ​ ​ប៉ុន្តែ​ព្រលឹង​នៅ​តែ​រស់រាន​ជានិច្ច»​ ក្នុង​ចិត្ត​អ្នកគាំទ្រ។

គណបក្ស​សង្គ្រោះ​ជាតិ​ ជា​គូ​ប្រជែង​ដ៏​ធំ​ ​របស់​បក្ស​គ្រប់គ្រង​ប្រទេស​របស់​លោក​ ហ៊ុន សែន​ ​ដែល​មាន​អ្នកគាំទ្រ​ជាង​៤០​ភាគរយ​នៅ​ទូទាំង​ប្រទេស​ ​ត្រូវ​បាន​តុលាការ​កំពូល​រំលាយ​កាលពី​ថ្ងៃទី១៦​ ​ខែ​វិច្ឆិកា​ ​ឆ្នាំ២០១៧​ ​ទៅ​តាម​បណ្តឹង​របស់​ក្រសួង​មហាផ្ទៃ។​ គណបក្ស​ជំទាស់នេះ​បាន​រង​ការ​ចោទ​ថា ឃុបឃិត​ជាមួយ​បរទេស​ ​រៀបចំ​គម្រោង​ផ្តួល​រំលំ​រដ្ឋាភិបាល​ដែល​ដឹកនាំ​ដោយ​លោក​នាយក​រដ្ឋមន្រ្តី​ ហ៊ុន​ សែន។​ ក្នុង​ថ្ងៃ​ជាមួយ​គ្នា​នោះ​ ​តុលាការ​កំពូល​ក៏​បាន​ព្យួរ​សិទ្ធិ​របស់​មន្រ្តី​គណបក្ស​ប្រឆាំង​ចំនួន​១១៨​នាក់​ ​ទាំង​អ្នក​ដែល​កំពុង​ស្ថិតនៅ​ក្នុង​ ​និង​ក្រៅ​ប្រទេស​ ​មិន​ឲ្យ​ធ្វើ​នយោបាយ​ម្នាក់ៗ​ចំនួន​៥ឆ្នាំ។

​នៅ​ថ្ងៃ​ទី១៦​ ​ខែ​វិច្ឆិកា​ ​ឆ្នាំ២០១៨​ ​គេ​ឃើញ​មន្រ្តី​គណបក្ស​សង្គ្រោះ​ជាតិ​មួយ​ចំនួន​ ​បាន​បង្ហោះ​សារ​លើ​បណ្តាញ​សង្គម​ ​ដោយ​បង្ហាញ​ពី​ការ​រំឭក​ខួប​មួយ​ឆ្នាំ​នៃ​ការ​រំលាយ​គណបក្ស​នេះ។

​លោក​ មុត ចន្ថា​ មន្រ្តី​គណបក្ស​ប្រឆាំង​ ​និង​ជា​មនុស្ស​ស្និទ្ធ​នឹង​លោក​ កឹម​ សុខា​ ដែល​កំពុង​ស្ថិត​ក្នុង​ប្រទេស​កម្ពុជា​ ​បាន​បង្ហោះ​សារ​លើ​ទំព័រ​ហ្វេសប៊ុក​របស់​លោក​នា​ព្រឹក​ថ្ងៃ​សុក្រ​នេះ​ ​ដោយ​បាន​រំឭក​ខួប​មួយ​ឆ្នាំ​នៃ​ការ​រំលាយ​គណបក្ស​សង្គ្រោះ​ជាតិ​ថា​ ​គណបក្ស​សង្រ្គោះ​ជាតិ​ ​ត្រូវ​បាន​រំលាយ​ត្រឹមតែ​ឈ្មោះ​ ​ប៉ុន្តែ​ព្រលឹង​ ​និង​ឧត្តមគតិ​របស់​គណបក្ស​សង្រ្គោះ​ជាតិ​ ​ព្រមទាំង​ឆន្ទៈ​របស់​ប្រជាពលរដ្ឋ​ខ្មែរ​ជាង​៣​លាន​ ​ដែល​បាន​បោះឆ្នោត​ឲ្យ​គណបក្ស​នេះ​ ​មិន​អាច​ត្រូវ​បាន​រំលាយ​ឡើយ។

​លោក​សរសេរ​ក្នុង​ន័យ​ដើម​ថា៖​

​«១៦​ ​វិច្ឆិកា​ ​២០១៧-១៦​ ​វិច្ឆិកា​ ​២០១៨​ ​ខួប​មួយ​ឆ្នាំ​ ​នៃ​ការ​រំលាយ​គណបក្ស​សង្រ្គោះ​ជាតិ។​ មូលហេតុ​ធំ​តែ​មួយ​នៃ​ការ​រំលាយ​គណបក្ស​សង្រ្គោះ​ជាតិ​ ​គឺ​គណបក្ស​នេះ​ត្រូវ​បាន​គេ​ដឹង​យ៉ាង​ច្បាស់​ថា​ នឹង​ទទួល​ជ័យជម្នះ​នៅ​ក្នុង​ការបោះឆ្នោត​ជាតិ​ ​នា​ខែ​កក្កដា​ ​ឆ្នាំ​២០១៨​ ​ដើម្បី​ឆ្ពោះ​ទៅ​សម្រេច​បាន​នូវ​គោល​ដៅ​របស់​ខ្លួន​នាំមក​នៅ​ការ​ផ្លាស់​ប្តូរ​ជា​វិជ្ជមាន»។

​ចំណែក​លោក ​អេង ឆៃអ៊ាង​ អតីត​អ្នក​តំណាងរាស្រ្ត​ ​និង​ជា​អនុប្រធាន​គណបក្ស​សង្រ្គោះ​ជាតិ​ ​ដែល​ស្និទ្ធ​នឹង​លោក​ សម​ ​រង្ស៊ី​ ​ក៏បាន​បង្ហោះ​សារ​លើ​ទំព័រ​ហ្វេសប៊ុក​របស់​លោក​ដោយ​រំឭក​ពី​ខួប​មួយ​ឆ្នាំ​នៃ​ការ​រំលាយ​គណបក្ស​សង្គ្រោះ​ជាតិ​ផង​ដែរ។

​មន្រ្តី​ជាន់ខ្ពស់​បក្ស​ប្រឆាំង​ដែល​កំពុង​ស្ថិត​នៅ​ក្រៅ​ប្រទេស​រូប​នេះ​បាន​សរសេរ​ក្នុង​ន័យ​ដើម​ថា៖

«របប​លោក​ ហ៊ុន​ សែន​ បាន​សម្លាប់​តែ​រាងកាយ​គណបក្ស​សង្គ្រោះ​ជាតិ​ទេ​ តែ​ព្រលឹង​គណបក្ស​សង្គ្រោះ​ជាតិ​នៅ​រស់រាន​ជានិច្ច​ក្នុង​ឧត្តមគតិ​កូន​ខ្មែរ​ជាង​កន្លះ​នគរ​ ​រង់ចាំ​តែ​ឱកាស​មក​ដល់​ប៉ុណ្ណោះ»។

​ក្នុង​ការ​បោះឆ្នោត​ជ្រើសរើស​ក្រុមប្រឹក្សា​ឃុំ​សង្កាត់​ ខែ​មិថុនា​ ​ឆ្នាំ​២០១៧​ ​គណបក្ស​សង្គ្រោះ​ជាតិ​មាន​អ្នក​បោះឆ្នោត​គាំទ្រ​ជាង​៤០​ភាគរយ​នៃ​អ្នក​ទៅ​បោះឆ្នោត​សរុប​ ​ដោយ​ទទួល​បាន​ ​សមាជិក​ក្រុមប្រឹក្សា​ឃុំ-សង្កាត់​ ​ចំនួន​ជាង​៥.០០០​ ​នៅ​ទូទាំង​ប្រទេស។

​ការ​រំលាយ​គណបក្ស​សង្គ្រោះ​ជាតិ​ ​និង​ការ​ព្យួរ​សិទ្ធិ​នយោបាយ​របស់​មន្រ្តី​ជាង​ជាង១០០នាក់​នោះ​ ​ធ្វើ​ឡើង​ដោយ​លោក​ ឌិត​ មុន្ទី​ ប្រធាន​តុលាការ​កំពូល​ ​អម​ដោយ​សមាជិក​ក្រុមប្រឹក្សា​៨​រូប​ទៀត​ ​នៃ​សភា​ពេញ​អង្គ​តុលាការ​កំពូល​ ​ក្រោយ​ទទួល​បាន​ពាក្យ​បណ្តឹង​ពី​មេធាវី​របស់ក្រ​សួង​មហាផ្ទៃ​ ​ដែល​ចុះ​ថ្ងៃទី៦​ ​ខែ​តុលា​ ​ឆ្នាំ​២០១៧​ ​របស់​ក្រសួង​មហាផ្ទៃ។

​នៅ​ថ្ងៃ​សុក្រ​នេះ​ដែរ​ ​គណបក្ស​សង្គ្រោះ​ជាតិ​ ​ដែល​ជា​គណបក្ស​ប្រឆាំង​ត្រូវ​បាន​តុលាការ​កំពូល​រំលាយ​អស់​រយៈពេល​ជាង​១​ឆ្នាំ​មក​ហើយ​នោះ​ ​ក៏​បាន​ចេញ​សេចក្តី​ថ្លែង​ការណ៍​មួយដោយ​បញ្ជាក់​ថា៖

«ថ្ងៃ​ទី​១៦​ ​ខែ​វិច្ឆិកា​ ​ឆ្នាំ​២០១៨​នេះ​ ​គឺ​ជា​ខួប​មួយ​ឆ្នាំ​ ​នៃ​ការ​សម្លាប់​លទ្ធិ​ប្រជាធិបតេយ្យ​នៅ​កម្ពុជា​ ​និង​ជា​ថ្ងៃ​ដែល​ប្រទេស​កម្ពុជា​បាន​ធ្លាក់​ចូល​ក្នុង​កណ្ដាប់ដៃ​នៃ​ជន​ផ្តាច់​ការ​ទាំងស្រុង»។

​ក្នុង​សេចក្តី​ថ្លែងការណ៍​នោះ​ ​គណបក្ស​សង្គ្រោះ​ជាតិ​ក៏បាន​បញ្ជាក់​ជំហរ​របស់​ខ្លួន​ថា​ ​រដ្ឋាភិបាល​កម្ពុជា​ត្រូវ​ទម្លាក់​ចោល​ការ​ចោទប្រកាន់​លើ​លោក​ កឹម​ សុខា​ ប្រធាន​គណបក្ស​ប្រឆាំង​ ​និង​អ្នក​ទោស​មនសិការ​ផ្សេង​ទៀត​ ​គណបក្ស​សង្គ្រោះ​ជាតិ​ទាមទារ​ដាច់ខាត​ឲ្យ​មាន​ការ​រៀបចំ​ការ​បោះឆ្នោត​ឡើង​វិញ​ ​ដោយ​សេរី​ ​ត្រឹមត្រូវ​ ​និង​យុត្តិធម៌។

​សេចក្តី​ថ្លែងការណ៍​នោះ​បញ្ជាក់​ក្នុង​ន័យ​ដើម​ថា៖

​«គណបក្ស​សង្គ្រោះ​ជាតិ​មិន​ទទួល​ស្គាល់​ដាច់ខាត​ ​និង​ថ្កោលទោស​យ៉ាង​ដាច់អហង្ការ​ចំពោះ​ការ​ប្រើប្រាស់​ប្រព័ន្ធ​តុលាការ​ជា​ឧបករណ៍​ដោយ​គណបក្ស​ប្រជាជន​កម្ពុជា​ ​ដែល​មាន​លោក​ ហ៊ុន​ សែន​ ជា​មេ​ខ្លោង​ ​ដើម្បី​រំលាយ​គណបក្ស​សង្គ្រោះ​ជាតិ»។

​មុន​បន្តិច​នៃ​ការ​រំលាយ​គណបក្ស​ប្រឆាំង​ ​ដែល​ជា​គណបក្ស​ទទួល​បានការ​គាំទ្រ​ជាង​៤០​ភាគ​រយ​នៅ​ទូទាំង​ប្រទេស​ ​ក្នុង​ការ​បោះឆ្នោត​ក្រុមប្រឹក្សា​ឃុំ-សង្កាត់​ឆ្នាំ​កន្លង​ទៅ​ ​លោក​ កឹម​ សុខា​ ប្រធាន​គណបក្ស​នេះ​ ​ក៏​ត្រូវ​បាន​សមត្ថកិច្ច​ចាប់​ខ្លួន​ ​និង​ចោទ​ប្រកាន់​ពាក់ព័ន្ធ​នឹង​បទ​ក្បត់​ជាតិ​ដូចគ្នា។​ បច្ចុប្បន្ន​ លោក កឹម​ សុខា​ កំពុង​ស្ថិត​ក្នុង​ការ​ដាក់​ឲ្យ​ឃុំខ្លួន​ក្នុង​ផ្ទះ​ ​ដោយ​មាន​ការ​ឃ្លាំ​មើល​ពី​តុលាការ​ ​ក្រោយ​លោក​ត្រូវ​បាន​ឃុំខ្លួន​ក្នុង​ពន្ធនាគារ​អស់​រយៈ​ពេល​ជាង​១​ឆ្នាំ។​ ការ​រំលាយ​និង​ផាត់​បក្ស​ជំទាស់​ដ៏​ធំ​របស់​ប្រទេស​កម្ពុជា​ចេញ​ពី​ការ​បោះឆ្នោត​ខែ​កក្កដា​ ​បាន​ធ្វើ​ឱ្យ​គណបក្ស​ប្រជាជន​កម្ពុជា​របស់​លោក​ ហ៊ុន សែន​ ​ទទួល​ជ័យជម្នះ​ភ្លូក​ទឹក​ភ្លូក​ដី​ក្នុង​ការ​បោះឆ្នោត​កន្លង​មក​ ​និង​គ្រប់គ្រង​ប្រទេស​ដោយ​ឯកបក្ស។

​លោក​ ផៃ ស៊ីផាន​ អ្នក​នាំពាក្យ​គណៈរដ្ឋមន្ត្រី​ ប្រាប់​ VOA​ នា​ល្ងាច​ថ្ងៃ​សុក្រ​នេះ​ថា​ ​លោក​សុំ​មិន​ធ្វើ​ការ​បកស្រាយ​ ​ឬ​ពិចារណា​ចំពោះ​អង្គការ​នយោបាយ​ដែល​លោក​ចាត់​ទុក​ថា​ ជា​អង្គការ​នយោបាយ​ក្រៅ​ច្បាប់​ ​ដែល​ត្រូវ​រំលាយ​ដោយ​តុលាការ​កំពូល​កម្ពុជា​ណាមួយ​នោះ​ទេ។​ លោក​បន្ថែម​ថា​ ​សម្រាប់​ការ​សរសេរ​សារ​បង្ហោះ​របស់​បុគ្គល​ណា​ម្នាក់​ ​ឬ​ក្រុម​ណាមួយ​ ​គឺ​ជា​សិទ្ធិ​សេរីភាព​របស់​បុគ្គល​នោះ​ ​ប៉ុន្តែ​លោក​ថា​ ពួក​គេ​ត្រូវ​គោរព​តាមច្បាប់​នៅ​កម្ពុជា។

​លោក​បញ្ជាក់​ថា៖​

​«បើ​សិន​ជា​គាត់​តាំង​ខ្លួន​ជា​មន្រ្តី​គណបក្ស​ ​អាហ្នឹង​គាត់​ប្រាសចាក​កាតព្វកិច្ច​របស់​តុលាការ​កំពូល​ដែលគេ​រំលាយ។​ បើ​គាត់​គ្រាន់តែ​ជា​អតីតអាហ្នឹង​ជា​រឿង​ធម្មតា។​ ដូច្នេះ​បើ​យើង​ឃើញ​សកម្មភាព​ណា​ដែល​យល់ឃើញ​ថា​ជា​ការ​ប្រមាថ​ ​ឬ​វាយប្រហារ​ទៅ​លើ​សាលដីកា​ ​នោះ​ប្រាកដ​ជា​មាន​ទោស​ពៃរ៍​ក្នុង​រឿង​ហ្នឹងឯង។​ ប៉ុន្តែ​បើ​គ្រាន់​ជា​ការ​បញ្ចេញ​មតិ​ អាហ្នឹង​ជា​រឿង​ធម្មតា»។

​ក្រោយ​ការ​បោះឆ្នោត​ថ្នាក់​ជាតិ​ដោយ​មិន​មាន​គណបក្ស​សង្គ្រោះ​ជាតិ​ ​ស្ថានភាព​នយោបាយ​នៅ​កម្ពុជា​ហាក់​កំពុង​ស្ថិត​ក្នុង​ភាព​ចម្រូងចម្រាស​ ​ខណៈ​ក្រុម​អ្នកគាំទ្រ​រដ្ឋាភិបាល​របស់​លោក​ ហ៊ុន​ សែន​ កំពុង​អបអរ​ការ​ដឹកនាំ​ប្រទេស​ដោយ​ឯកបក្ស​ ​ចំណែក​អ្នកគាំទ្រ​គណបក្ស​ប្រឆាំង​និង​ក្រុម​ប្រទេស​កាន់​លទ្ធិ​ប្រជាធិបតេយ្យ​ធំៗ​មួយ​ចំនួន​ចាត់​ទុក​ថា​ ​រដ្ឋាភិបាល​កម្ពុជា​កំពុង​ធ្វើ​ឲ្យ​ខូច​ខាត​លទ្ធិ​ប្រជាធិបតេយ្យ។

​សហរដ្ឋ​អាមេរិក​ប្រកាស​មិន​ទទួលស្គាល់​លទ្ធផល​បោះឆ្នោត​ ​កាលពី​ថ្ងៃ​ទី​២៩​ ​ខែ​កក្កដា​ ​និង​ព្រមាន​ចាត់វិធានការ​បន្ថែម​លើ​ការ​បង្កក​ទ្រព្យសម្បត្តិ​ ​និង​ដាក់​ទណ្ឌកម្ម​ទិដ្ឋាការ​ដល់​មន្ត្រី​កម្ពុជា​មួយ​ចំនួន​ ​ពាក់ព័ន្ធ​នឹង​ការ​រំលោភ​សិទ្ធិមនុស្ស។​ ចំណែក​សហភាព​អឺរ៉ុប​ ​ក៏បាន​ព្រមាន​ដក​ប្រព័ន្ធ​អនុគ្រោះ​ពន្ធ​ពី​កម្ពុជា​ ​ដោយ​ទុក​ពេល​១២​ខែ​ ​ដើម្បី​ឲ្យ​រដ្ឋាភិបាល​កម្ពុជា​ស្តារ​ស្ថានភាព​ប្រជាធិបតេយ្យ​ឡើងវិញ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG