អូស្ត្រាលីនិយាយថា ការឡើងកម្តៅផែនដីជា«ការគំរាមកំហែងទី១»ដល់សន្តិសុខនិងសុខុមាលភាពនៃតំបន់មហាសមុទ្រប៉ាស៊ីហ្វិក។
ចាប់ពីពាក់កណ្តាលឆ្នាំ២០២៥ទៅ ពាក់កណ្តាលនៃការវិនិយោគជំនួយអូស្ត្រាលីថ្មីទាំងអស់មានតម្លៃជាង២លានដុល្លារឡើងទៅនឹងត្រូវពិចារណាការប្រែប្រួលអាកាសធាតុ ដោយបានបង្កើនដល់៨០ភាគរយនៅក្រោមគោលនយោបាយថ្មី។ ពួកមន្ត្រីនិយាយថា ឧទាហរណ៍ ផ្លូវថ្នល់នឹងត្រូវស្ថាបនាឡើងដើម្បីដោះស្រាយការការកើនឡើងនៃកម្រិតទឹកសមុទ្រ ហើយសាលារៀននឹងមានដំបូលដែលអាចការពារព្យុះស៊ីក្លូន។
គម្រោងអភិវឌ្ឍន៍អន្តរជាតិថ្មីទាំងអស់មានតម្លៃជាង២លានឡើងទៅក៏នឹងត្រូវរួមបញ្ចូលទាំងគោលបំណងនៃសមភាពយេនឌ័រផងដែរ។
ពួកមន្ត្រីនិយាយថា ការណ៍នេះ រួមទាំងការផ្តល់លំនៅដ្ឋានដែលមានសុវត្ថិភាពសម្រាប់ស្ត្រីម្ចាស់តូបតាមផ្សារដើម្បីការពារពួកគេនិងទំនិញរបស់ពួកគេ។
ពួកអ្នកវិភាគនិយាយថា ការផ្លាស់ប្តូរគោលនយោបាយអន្តរជាតិរបស់អូស្ត្រាលីជាការឆ្លើយតបដល់មហិច្ឆតាសន្តិសុខរបស់ចិននៅក្នុងតំបន់។ វាជាការផ្លាស់ប្តូរដ៏សំខាន់លើកទី១ដល់កម្មវិធីជំនួយបរទេសរបស់រដ្ឋាភិបាលក្រុងកង់បេរ៉ានៅក្នុងរយៈពេលជាង១ទសវត្សរ៍នេះ។ នេះបើតាមលោក Pat Conroy រដ្ឋមន្ត្រីសម្រាប់ការអភិវឌ្ឍអន្តរជាតិនិងតំបន់មហាសមុទ្រប៉ាស៊ីហ្វិករបស់អូស្ត្រាលី។ លោកបានប្រាប់បណ្តាញទូរទស្សន៍អូស្ត្រាលី ABC កាលពីថ្ងៃអង្គារថា រដ្ឋាភិបាលក្រុងកង់បេរ៉ាកំពុងស្វះស្វែងបញ្ជាក់ឡើងវិញរបស់ខ្លួននៅក្នុងកិច្ចការនៅក្នុងតំបន់។ លោកបានថ្លែងថា៖
«មានការប្រកួតប្រជែងយុទ្ធសាស្ត្រភូមិសាស្ត្រនៅក្នុងតំបន់។ រដ្ឋាភិបាលមុននៅក្នុងរដ្ឋធានីកង់បេរ៉ាបានកាត់បន្ថយជំនួយចំនួន ៧,៧៥ លានដុល្លារ ហើយការណ៍នេះបានបន្សល់ចន្លោះប្រហោងដែលប្រទេសផ្សេងទៀតបានបំពេញ។ ដូច្នេះ ជាការពិត យើងត្រូវជ្រើសរើសដៃគូមួយសម្រាប់តំបន់របស់យើង ក៏ប៉ុន្តែ ការណ៍នេះធ្វើឱ្យមនុស្សងើបចេញពីភាពក្រីក្រដែរ។ ប្រទេសជិតខាងចំនួន២២នៃប្រទេសជិតខាងចំនួន២៦របស់យើងជាប្រទេសកំពុងអភិវឌ្ឍន៍។ វាជាអត្ថប្រយោជន៍របស់យើងដើម្បីធ្វើឱ្យប្រទេសទាំងនោះមានស្ថិរភាពនិងរុងរឿងនិងរីកចម្រើន»។
ថវិកាជំនួយបរទេសប្រចាំឆ្នាំរបស់រដ្ឋាភិបាលក្រុងកង់បេរ៉ាគឺប្រហែល៣ពាន់លានដុល្លារ។
យុទ្ធសាស្ត្រថ្មីមិនមានប្រាក់បន្ថែមទេ ក៏ប៉ុន្តែ ខ្លួនសង្ឃឹមថា ផ្នែកឯកជននឹងជួយគម្រោងនានាដែលទាក់ទិនថវិកាអាកាសធាតុ។ រដ្ឋមន្ត្រីការបរទេសអូស្ត្រាលីលោកស្រី Penny Wong បាននិយាយកាលពីថ្ងៃចន្ទថា «ការអភិវឌ្ឍនិងវិបុលភាពពង្រឹងសន្តិភាពនិងស្ថិរភាព»។
រហូតមកទល់ពេលនេះ មិនទាន់មានការឆ្លើយតបមកពីប្រទេសចិនទេ។
រដ្ឋាភិបាលក្រុងប៉េកាំងមានជម្លោះជាមួយរដ្ឋាភិបាលក្រុងកង់បេរ៉ាក្នុងប៉ុន្មានឆ្នាំថ្មីៗនេះ លើបញ្ហាពាណិជ្ជកម្មនិងនយោបាយ រួមទាំងមហិច្ឆតាវាតទឹកដីរបស់ចិននៅក្នុងតំបន់ឥណ្ឌូប៉ាស៊ីហ្វិក។
ថ្វីបើចំណងទាក់ទងទ្វេភាគីមានភាពប្រសើរឡើងចាប់តាំងពីការបោះឆ្នោតខែឧសភា ឆ្នាំ២០២២ដែលរដ្ឋាភិបាលប្រកាន់ឆ្វេងនិយមនៅរដ្ឋធានីកង់បេរ៉ាបានព្យាយាមធ្វើឱ្យមានទំនាក់ទំនងស្ថិរភាពជាមួយដៃគូពាណិជ្ជកម្មដ៏ធំបង្អស់របស់ខ្លួន ខណៈដែលទទួលស្គាល់ថាមានការខ្វែងគំនិត និងការប្រកួតប្រជែងគ្នានៅក្នុងវិស័យមួយចំនួន៕
ប្រែសម្រួលដោយលោក ជឹង ប៉ូជីន
