ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អូស្ត្រាលី​និង​នូវែលសេឡង់​បង្កើត​កិច្ច​ប្រឹងប្រែង​ដើម្បី​ផ្តល់​ជំនួយ​ដល់​កោះ Tonga ដែល​រង​ផល​ប៉ះពាល់​ដោយ​រលក​យក្ស​ស៊ូណាមិ


រូបថត​ដែល​ត្រូវ​បាន​ថត​ដោយ​ផ្កាយរណប​របស់​ជប៉ុន Himawari-8 នេះ បង្ហាញ​ពី​បន្ទុះភ្នំភ្លើង​នៅ​បាតសមុទ្រ នៅ​កោះ Tonga ថ្ងៃទី១៥ ខែមករា ឆ្នាំ២០២២។ (Japan Meteorology Agency via AP)

ប្រទេស​អូស្ត្រាលី​និង​នូវែលសេឡង់​បាន​បញ្ជូន​យន្តហោះ​ស៊ើបការណ៍​នៅ​ថ្ងៃ​ចន្ទ​នេះ​ទៅ​វាយតម្លៃ​ការខូចខាត​នៅ​កោះTonga ដែល​បណ្តាល​មកពី​ការផ្ទុះ​ភ្នំភ្លើង​នៅ​ក្រោម​បាត​សមុទ្រ​និង​ដែល​បាន​បណ្តាល​ឲ្យ​មាន​រលក​យក្ស​ស៊ូណាមិ និង​បាន​ធ្វើឲ្យ​កោះ​ក្នុង​មហា​សមុទ្រ​ប៉ាស៊ីហ្វិក​នេះ​គ្រប​ដណ្តប់​ដោយ​ផេះ​ភ្នំភ្លើង។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។

នាយក​រដ្ឋមន្ត្រី​អូស្ត្រាលី​លោក Scott Morrison បាន​សន្យា​ផ្តល់​ជំនួយ​ដល់​កោះ Tonga ឲ្យ​បាន​ឆាប់​រហ័ស​ទៅតាម​លទ្ធភាព​ដែល​អាច​ធ្វើ​បាន ក៏ប៉ុន្តែ បាន​និយាយ​ថា ផេះ​ពី​បន្ទុះ​ភ្នំភ្លើង​នោះ បាន​ធ្វើ​ឲ្យ​រំខាន​ដល់​ការប្រឹងប្រែង​ផ្តល់​ជំនួយ​សង្គ្រោះ។

លោក​នាយករដ្ឋមន្ត្រី Morrison បាន​ប្រាប់​ស្ថានីយ៍​វិទ្យុ 2GB នៅ​ថ្ងៃ​ចន្ទ​នេះ​ថា «មាន​បញ្ហា​ប្រឈម​ជា​ច្រើន​នៅ​ទី​នោះ ដោយ​មាន​ផេះ​និង​ការរំខាន​ដល់​ការទាក់ទង ​ហើយ​យើង​កំពុង​ធ្វើការ​ជាមួយ​គ្នា​ដើម្បី​ទទួល​ជំនួយ​ឲ្យ​បាន​ច្រើន​ដល់​កោះ Tonga ដែល​យើង​អាចធ្វើ​ទៅ​បាន»។

ការិយាល័យ​ឧតុនិយម​របស់​អូស្ត្រាលី​បាន​ប្រាប់​ទីភ្នាក់ងារ​ព័ត៌មាន Reuters នៅ​ក្នុង​សេចក្តីថ្លែងការណ៍​តាម​អ៊ីមែល​នៅថ្ងៃ​ចន្ទ​នេះ​ថា «មិន​មាន​សកម្មភាព​ភ្នំ​ភ្លើង​នៅ​ពេល​បច្ចុប្បន្ន​នេះ​ទេ ហើយថា​ភ្នំភ្លើង​លែង​បញ្ចេញ​ផេះ​ទៀតហើយ»។ សេចក្តីថ្លែងការណ៍​នោះ បាន​បញ្ជាក់​ទៀត​ថា ផេះ​ភ្នំភ្លើង​ដែល​បាន​ទៅដល់​រដ្ឋ Queensland នៃ​ប្រទេស​អូស្ត្រាលី ជា​ផេះ​ដែល​នៅ​សេសសល់​ពី​ការ​ផ្ទុះ​លើក​មុន​ទេ។

រដ្ឋមន្ត្រី​ទទួល​បន្ទុក​មហា​សមុទ្រ​ប៉ាស៊ីហ្វិក​នៃ​ប្រទេស​អូស្ត្រាលី​លោក Zed Seselja បាន​និយាយ​ថា របាយការណ៍​មុន​ដំបូង​បាន​ប្រាប់​ឲ្យ​ដឹង​ថា មិន​មាន​ការខូចខាត​ធំដុំ​ទេ​ហើយ​ថា ចំណត​យន្តហោះ Tonga ទំនង​ជា​នៅ​មាន​ស្ថានភាព​ល្អ​ទេ ប៉ុន្តែ​មាន​ការខូចខាត​ច្រើន​ដល់​ផ្លូវ​ថ្នល់​និង​ស្ពាន។

លោក Seselja បាន​និយាយ​ទៀត​ថា អូស្រ្តាលី កំពុង​ទាក់ទង​ជាមួយ​សហរដ្ឋ​អាមេរិក នូវែលសេឡង់ បារាំង​ និង​ប្រទេស​ផ្សេង​ៗ​ទៀត​ដើម្បី​សម្រប​សម្រួល​ការឆ្លើយតប​នេះ៕

XS
SM
MD
LG