ដំណើរទស្សនកិច្ចផ្លូវរដ្ឋដោយប្រធានាធិបតីចិន លោក ស៊ី ជីងពីង ទៅកាន់ប្រទេសហ្វីលីពីននៅខែនេះបញ្ជាក់ឲ្យដឹងជាមុនពីជំនួយអភិវឌ្ឍន៍សេដ្ឋកិច្ចនិងការជឿនលឿនកាន់តែខ្លាំងថែមទៀតលើការរុករកប្រេងឥន្ធនៈនៅក្រោមបាតសមុទ្រនៅក្នុងប្រទេសហ្វីលីពីន នៅខណៈដែលប្រទេសម្ចាស់ផ្ទះមានសេដ្ឋកិច្ចប្រែប្រួល។
ប្រធានាធិបតីចិន នឹងបំពេញទស្សនកិច្ចជាលើកទី១ចាប់តាំងពីជាប់បោះឆ្នោតរបស់លោក Rodrigo Duterte ជាប្រធានាធិបតីដែលបានធ្វើឲ្យមានការភ្ញាក់ផ្អើលប្រទេសលោកខាងលិចនិងប្រជាពលរដ្ឋភាគច្រើនរបស់លោក បន្ទាប់ពីការកាន់ដំណែងនៅឆ្នាំ២០១៦ ដោយបានធ្វើឲ្យប្រសើរឡើងនូវចំណងទាក់ទងជាមួយប្រទេសចិន។រដ្ឋាភិបាលក្រុងប៉េកាំងនិងម៉ានីលបានប្រកួតប្រជែងប្រកបដោយភាពល្វីងជូរចត់ដល់ អធិបតេយ្យភាពនៅផ្នែកនានានៃសមុទ្រចិនខាងត្បូងកាលពីពេលមុន។
ពួកអ្នកវិភាគនិយាយថា នៅពេលដែលភាគីទាំង២បញ្ចៀសការពិភាក្សាពីជម្លោះដែនសមុទ្រនៅពេលនេះ ពួកមេដឹកនាំទាំង២ត្រូវគេរំពឹងនឹងផ្តោតលើការជួយហ្វីលីពីនស្ថាបនាផ្លូវរទេះភ្លើង ស្ពានហើយនិងហេដ្ឋារចនាសម្ព័ន្ធផ្សេងៗទៀត។ គម្រោងទាំងនោះស្ថិតនៅក្រោមគោលនយោបាយ៥ឆ្នាំរបស់ប្រធានាធិបតី Duterte ដែលមានទឹកប្រាក់១៦៩ពាន់លានដុល្លារដែលមានឈ្មោះថា «ស្ថាបនា ស្ថាបនា ស្ថាបនា»។
លោកស្រី Maria Ela Atienza ជាសាស្រ្តាចារ្យវិទ្យាសាស្រ្តនយោបាយនៅសាកលវិទ្យា ល័យ Philippines Diliman និយាយថា៖ «រដ្ឋាភិបាលទាំង២ នឹងចុះហត្ថលេខាលើកិច្ចព្រមព្រៀងជាច្រើន ជាពិសេសហេដ្ឋារចនាសម្ព័ន្ធដើម្បីទ្រទ្រង់គោលនយោបាយ «ស្ថាបនា ស្ថាបនា»របស់រដ្ឋាភិបាលហ្វីលីពីនហើយបន្ទាប់មកកិច្ចព្រមព្រៀងផ្សេងៗទៀតដូចជាការរុករករួមគ្នា»៕
