កាលពីខែឧសភាកន្លងទៅនេះ ដើម្បីបន្ថយការគិតអវិជ្ជមានមកលើខ្លួន កងកម្លាំងប្រដាប់អាវុធរបស់ចិន បានផ្តល់ជំនួយផ្នែកវេជ្ជសាស្ត្រដើម្បីទប់ស្កាត់នឹងជំងឺកូវីដ១៩ នៅក្នុងប្រទេសចំនួន៤ ដែលមានជម្លោះរឿងការកាន់កាប់របស់យោធានៃរដ្ឋាភិបាលទីក្រុងប៉េកាំងទៅលើដែនសមុទ្រដែលសម្បូរទៅដោយធនធាន។
បណ្តាញទូរទស្សន៍សាកលចិន China Global Television Network ដែលគ្រប់គ្រងដោយរដ្ឋ បានរាយការណ៍ថា កងទ័ពរំដោះប្រជាជនចិន បានបញ្ជូនសម្ភារៈដើម្បីទប់ស្កាត់ការរាតត្បាតនៃជំងឺកូវីដ១៩ ទៅកាន់ប្រទេសចំនួន១២ តាមរយៈយន្តហោះទ័ពអាកាស។ ក្នុងចំណោមនោះ ក៏មានប្រទេស ដែលប្រជែងទាមទារយកសមុទ្រចិនខាងត្បូងផងដែរ ដូចជាប្រទេសព្រុយណេ ឥណ្ឌូណេស៊ី ម៉ាឡេស៊ី និងហ្វីលីពីន។ បណ្តាញទូរទស្សន៍ខាងលើរាយការណ៍ទៀតថា កងកម្លាំងប្រដាប់អាវុធមកពីប្រទេសទាំង១២ បានស្នើសុំជំនួយនេះ។
ប្រទេសព្រុយណេ ម៉ាឡេស៊ី និងហ្វីលីពីន មានជម្លោះលើចំណែកនៅក្នុងសមុទ្រចិនខាងត្បូងដែលមានទំហំ៣លាន ៥ សែន គ.ម.ការ៉េ ជាមួយនឹងរដ្ឋាភិបាលក្រុងប៉េកាំង។ ប្រទេសឥណ្ឌូណេស៊ីមិនមានជម្លោះដែនដីនោះទេ ប៉ុន្តែបានបញ្ឈប់កប៉ាល់ចិន ដែលចូលទៅក្បែរកោះមួយនៃប្រជុំកោះដាច់ស្រយាលរបស់ខ្លួន។ ប្រទេសតូចជាងចិនទាំងនេះ ជាធម្មតាគិតថា ខ្លួនស្មើនឹងយោធានៅក្នុងប្រទេសចិន ដែលជាប្រទេសមានយោធាខ្លាំងបំផុតទី៣ក្នុងពិភពលោក ដោយមានកប៉ាល់ ឃ្លាំងផ្ទុកយន្តហោះ និងផ្លូវរត់ហោះហើរសម្រាប់យន្តហោះចម្បាំង ដែលប្រើប្រាស់ដើម្បីទាមទារការគ្រប់គ្រងនៅក្នុងផ្ទៃទឹកដែលមានជម្លោះ។
អ្នកវិភាគនិយាយថា ជំនួយសម្រាប់ទប់ស្កាត់ការរាតត្បាតនៃជំងឺកូវីដ១៩នេះ នឹងបន្ថយការគិតអវិជ្ជមានមកលើចិន។
លោក Huang Kwei-bo ព្រឹទ្ធបុរសរងនៃមហាវិទ្យាល័យកិច្ចការអន្តរជាតិនៅសាកលវិទ្យាល័យជាតិ Chengchi នៅក្នុងក្រុងតៃប៉ិ និយាយក្នុងសម្តីដើមថា៖
«វាជាឥទ្ធិពលសាធារណៈដ៏វិជ្ជមានខ្លាំងមួយ។ ជាឧទាហរណ៍ ឥទ្ធិពលនៃជំនួយនេះ អាចនឹងខ្លាំងជាងការបញ្ជូននាវាចម្បាំងទៅកាន់កំពង់ផែនៃប្រទេសមួយផ្សេងទៀតផង ដោយសារវាពាក់ព័ន្ធផ្ទាល់ទៅនឹងបញ្ហាសុខភាពមនុស្ស»។
ទីភ្នាក់ងារព័ត៌មានផ្លូវការចិន Xinhua បានរាយការណ៍ថា យន្តហោះដឹកទំនិញរបស់ចិនបាននាំយកម៉ាសសម្រាប់បុគ្គលិកពេទ្យ វ៉ែនតាការពារ សម្លៀកបំពាក់ការពារ និងឧបករណ៍ការពារមិនជ្រាបទឹកទៅឱ្យប្រទេសព្រុយណេ កាលពីថ្ងៃទី១២ ខែឧសភា។ ទីភ្នាក់ងារព័ត៌មានXinhua បានរាយការណ៍ថា កងទ័ពរំដោះប្រជាជនចិន បានធ្វើសន្និសីទតាមវីដេអូមួយជាមួយនឹងសមភាគីរបស់ខ្លួននៅក្នុងប្រទេសឥណ្ឌូណេស៊ី និងម៉ាឡេស៊ីនៅក្នុងខែឧសភាកន្លងនេះ ដើម្បីចែករំលែកបទពិសោធន៍ក្នុងការប្រយុទ្ធប្រឆាំងនឹងជំងឺកូវីដ១៩។
លោក Derek Grossman ដែលជាអ្នកវិភាគជាន់ខ្ពស់ផ្នែកការពារនៅវិទ្យាស្ថានស្រាវជ្រាវឈ្មោះ RAND Corp. បាននិយាយថា ប្រទេសអាស៊ីអាគ្នេយ៍ទាំងនេះ នឹងទទួលយកជំនួយរបស់យោធាចិន និងមើលឃើញថា វាជាយុទ្ធនាការរបស់ចិនដើម្បីឱ្យខ្លួនមើលទៅមានភាពមនុស្សធម៌ជាងគូប្រជែងផ្នែកភូមិសាស្ត្រនយោបាយដ៏យូរយារណាស់មកហើយរបស់ខ្លួន គឺសហរដ្ឋអាមេរិក។ លោកបាននិយាយថា រដ្ឋាភិបាលក្រុងប៉េកាំងសង្ឃឹមថា នឹងយកឈ្នះរដ្ឋាភិបាលក្រុងវ៉ាស៊ីនតោន ដោយសារចំនួនជំនួយ និងល្បឿននៃការបញ្ជូនជំនួយរបស់ខ្លួន។
ក្រសួងការបរទេសសហរដ្ឋអាមេរិក បានសរសេរនៅលើគេហទំព័ររបស់ខ្លួនថា រដ្ឋាភិបាលសហរដ្ឋអាមេរិក បានចំណាយទឹកប្រាក់ប្រមាណ១៨លាន ៣សែនដុល្លារ សម្រាប់ជំនួយមនុស្សធម៌ និងផ្នែកសុខភាពបន្ទាន់ ទៅឱ្យប្រទេសអាស៊ីអាគ្នេយ៍ គិតត្រឹមថ្ងៃទី៣១ ខែមីនា ដើម្បីជួយប្រយុទ្ធប្រឆាំងនឹងជំងឺកូវីដ១៩។
ជំនួយសប្បុរសដែលមិនមែនពីយោធានៅក្នុងប្រទេសចិន បានបញ្ជូនទៅកាន់ប្រទេសអាស៊ីអាគ្នេយ៍ភាគច្រើន ចាប់តាំងពីដើមខែមីនាមកម្ល៉េះ។
ប្រទេសព្រុយណេក្នុងនាមជាអ្នកទទួលការវិនិយោគចិនរយៈពេលយូរមកហើយនោះ កម្ររិះគន់ប្រទេសចិនចំពោះបញ្ហាសមុទ្រណាស់។ ប៉ុន្តែ ប្រទេសម៉ាឡេស៊ីបានតតាំងជាមួយចិន ដោយដាក់ឯកសារកាលពីខែធ្នូទៅកាន់គណៈកម្មការរបស់អង្គការសហប្រជាជាតិអំពីផែនការក្នុងការពង្រីកសិទ្ធិដែនសមុទ្រឱ្យហួសពីចម្ងាយ៣៧០គ.ម.ចេញពីបណ្តោយឆ្នេររបស់ខ្លួន។ កាលពីថ្ងៃទី៣០ ខែមេសា ប្រទេសហ្វីលីពីនបានច្រានចោលនូវ «ការចាត់តាំងដោយខុសច្បាប់» របស់ចិនចំពោះកោះ Fiery Cross Reef ថា ជាមជ្ឈមណ្ឌលរដ្ឋបាលមួយ។
លោក Grossman បាននិយាយថា ប្រទេសទាំងនេះនឹងនិយាយប្រឆាំងម្តងទៀត ទោះជាមានជំនួយផ្នែកវេជ្ជសាស្ត្រក៏ដោយ ហើយនឹងមានការប្រុងប្រយ័ត្នចំពោះការផ្តាច់ចំណងទាក់ទងប្រសិនបើនិយាយប្រឆាំងខ្លាំងពេក។ លោក Grossman បាននិយាយបន្ថែមក្នុងសម្តីដើមថា៖
«ពួកគេអាចធ្វើការបែងចែកបានយ៉ាងល្អ។ ពួកគេអាចទទួលយកជំនួយ ប៉ុន្តែនៅតែរិះគន់»៕
