កាលពីថ្ងៃសុក្រ ទី២១ ខែមេសាកន្លងទៅ ចិនមិនបានឆ្លើយតបទៅនឹងការអំពាវ នាវរបស់លោកស្រី Janet Yellen រដ្ឋមន្ត្រីហិរញ្ញវត្ថុសហរដ្ឋអាមេរិកនោះទេ។ អ្នកស្រីបានអំពាវនាវឱ្យប្រទេសសេដ្ឋកិច្ចធំបំផុតទាំងពីរក្នុងពិភពលោកចាប់ផ្តើមទំនាក់ទំនងផ្លូវការឡើងវិញ។
នៅក្នុងសុន្ទរកថាមួយដែលបង្ហាញលម្អិតពីអាទិភាពសេដ្ឋកិច្ចរបស់រដ្ឋបាលលោក Biden ចំពោះប្រទេសចិនមួយថ្ងៃមុននេះ លោកស្រី Yellen បានថ្លែងថា សហរដ្ឋអាមេរិកចង់មានចំណងទាក់ទងសេដ្ឋកិច្ចបែបស្ថាបនានិងស្មើភាពជាមួយនឹងចិនដោយមិនប៉ះពាល់នឹងសន្តិសុខជាតិរបស់ខ្លួន។
លោក Wang Wenbin អ្នកនាំពាក្យក្រសួងការបរទេសចិនបានឆ្លើយតបដោយចោទ ប្រកាន់ថាសហរដ្ឋអាមេរិកបច្ចុប្បន្នកំពុងប្រើប្រាស់បញ្ហាបច្ចេកវិទ្យានិងពាណិជ្ជកម្មរវាងប្រទេសសេដ្ឋកិច្ចទាំងពីរជាឧបករណ៍និងអាវុធ«ក្នុងនាមសន្តិសុខជាតិ»។
លោក Wang បានថ្លែងក្នុងសន្និសីទកាសែតខ្លីៗប្រចាំថ្ងៃកាលពីថ្ងៃសុក្រ ទី២១ ខែមេ សាកន្លងទៅថា«សហរដ្ឋអាមេរិកកំពុងអនុវត្តយុទ្ធសាស្ត្រ «ធ្វើតិច ការពារខ្លាំង»ហើយជំរុញឱ្យមានការផ្តាច់ខ្លួននិងបំបែកសង្វាក់ផ្គត់ផ្គង់និងឧស្សាហកម្ម»។ លោកបន្តថា «បំណងពិតប្រាកដរបស់សហរដ្ឋអាមេរិកគឺដកហូតសិទ្ធិអភិវឌ្ឍន៍ពីចិនហើយទុកឱ្យសហរដ្ឋអាមេរិកបន្តធ្វើជាមហាអំណាចដើម្បីផលប្រយោជន៍អាត្មានិយមរបស់ខ្លួន»។
ក្នុងពេលប៉ុន្មានឆ្នាំថ្មីៗនេះ រដ្ឋាភិបាលក្រុងវ៉ាស៊ីនតោនបានផ្តោតលើការបង្កើនការគ្រប់គ្រងលើពាណិជ្ជកម្មបច្ចេកវិទ្យាជាមួយចិន ដោយអះអាងថា បច្ចេកវិទ្យាទំនើបៗមួយចំនួនដូចជា បច្ចេកវិទ្យា 5G បញ្ញាសិប្បនិម្មិតនិងការគណនាបរិមាណដោយប្រើ ប្រាស់កម្មវិធីយោធាសំខាន់ៗគួរតែទិញពីប្រជាជាតិដែលជាសម្ព័ន្ធមិត្ត។ សូម្បីតែបច្ចេកវិទ្យាទូទៅដូចជាកម្មវិធី TikTok ដ៏ពេញនិយមនោះក៏ស្ថិតក្រោមការត្រួតពិនិត្យដែរ ដោយសារការសង្ស័យថារដ្ឋាភិបាលចិនប្រើប្រាស់វាដើម្បីតាមដានឬគោលបំណងអ្វីផ្សេង។
លោក Gary Hufbauer ជាសមាជិកជាន់ខ្ពស់នៃវិទ្យាស្ថាន Peterson សម្រាប់សេដ្ឋកិច្ចអន្តរជាតិបានថ្លែងថា ប្រតិកម្មមិនសាទររបស់រដ្ឋាភិបាលក្រុងប៉េកាំងចំពោះសេចក្តីថ្លែងការណ៍របស់អ្នកស្រី Yellin មិនមែនជាការភ្ញាក់ផ្អើលនោះទេ។
លោកGary Hufbauerបានប្រាប់VOAផ្សាយជាភាសាចិនកុកងឺថា៖ «គិតពីទស្សនៈរបស់ចិន ពួកគេយល់ថា និយមន័យសន្តិសុខជាតិរបស់សហរដ្ឋអាមេរិកត្រូវបានពង្រីកខ្លាំង ហើយពួកគេមិនដឹងច្បាស់ទេថា វាគ្របដណ្តប់លើអ្វីខ្លះ។ ក្តីបារម្ភរបស់ពួកគេគឺថាវិធានការសន្តិសុខជាតិជាច្រើនតាមពិតទៅរឹតត្បិតបច្ចេកវិទ្យានិងឱកាសសម្រាប់រីកចម្រើនរបស់ពួកគេ»។
លោកDavid Dollar ដែលជាសេដ្ឋវិទូនៅវិទ្យាស្ថាន Brookingsបានប្រាប់VOAថា ចិននឹងមានការប្រយ័ត្នក្នុងការឆ្លើយតបជាវិជ្ជមានទៅសហរដ្ឋអាមេរិក «ដោយសារតែនៅមានសំឡេងប្រឆាំងជាច្រើននៅសហរដ្ឋអាមេរិក» ប៉ុន្តែ «វាទំនងថានៅពេលណាមួយឆាប់ៗនេះ កិច្ចសន្ទនាកម្រិតខ្ពស់រវាងប្រទេសទាំងពីរនឹងចាប់ផ្តើមឡើងវិញ»។
នៅដើមខែនេះ មន្ត្រីជាន់ខ្ពស់មកពីក្រសួងពាណិជ្ជកម្មសហរដ្ឋអាមេរិកបានធ្វើដំណើរទៅទីក្រុងប៉េកាំង និងទីក្រុងសៀងហៃដើម្បីរៀបចំកិច្ចការសម្រាប់ដំណើរទស្សនកិច្ចជាសក្តានុពលរបស់អ្នកស្រី Gina Raimondo រដ្ឋមន្ត្រីក្រសួងពាណិជ្ជកម្មសហរដ្ឋអាមេរិកនៅពេលក្រោយក្នុងឆ្នាំនេះ៕
ប្រែសម្រួលដោយលោក ជឹង ប៉ូជីន
ចិនប្រតិកម្មយ៉ាងសោះកក្រោះចំពោះការអំពាវនាវឱ្យមានការចរចាឡើងវិញរបស់រដ្ឋមន្ត្រីហិរញ្ញវត្ថុអាមេរិក
វ៉ាស៊ីនតោន —
