ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចិន​បដិសេធន៍​ការបង្កើត​តំបន់​គ្មានការហោះហើរ​​នៅ​ភាគ​ខាង​ជើង​កោះតៃវ៉ាន់ 


រូបឯកសារ៖ យន្តហោះចិន J-15 ហោះចេញ​ពី​លាន Shandong កាលពីថ្ងៃទី០៩មេសា(An Ni/Xinhua via AP, File)
រូបឯកសារ៖ យន្តហោះចិន J-15 ហោះចេញ​ពី​លាន Shandong កាលពីថ្ងៃទី០៩មេសា(An Ni/Xinhua via AP, File)

ចិន​បាន​បដិសេធ​នៅ​ថ្ងៃ​សុក្រ​នេះ​ថា​ ខ្លួន​មិន​បាន​បង្កើត​តំបន់​គ្មាន​ការហោះហើរ​លើ​សមុទ្រ​ខាង​ជើង នៃ​កោះតៃវ៉ាន់​សម្រាប់​ថ្ងៃ​អាទិត្យ​នោះ​ឡើយ បើទោះបីជា​រដ្ឋាភិបាល​តៃវ៉ាន់​និយាយ​ថា​រដ្ឋាភិបាល​ក្រុង​ប៉េកាំង​បាន​ប្រាប់​ខ្លួន​ថាចិន​ដីគោក​នឹង​ធ្វើ​ដូច​នេះ​ក៏​ដោយ។ នេះបើតាម​សេចក្តីរាយការណ៍​របស់​ទី​ភ្នាក់ងារ​សារព័ត៌មាន Reuters។

ក្រសួង​ដឹកជញ្ជូនតៃវ៉ាន់​បាន​បញ្ជាក់​ថា​រដ្ឋាភិបាល​ក្រុង​ប៉េកាំង​ពី​ដំបូង​បាន​ប្រាប់​រដ្ឋាភិ បាល​ក្រុងតៃប៉ិ​ថា​ខ្លួន​នឹង​បង្កើត​តំបន់​គ្មាន​ការ​ហោះហើរ​មួយ​ចាប់​ពី​ថ្ងៃ​១៦​ដល់​ថ្ងៃ​ទី​១៨​ ខែ​មេសា​ខាង​មុខ​នេះ ប៉ុន្តែ​ក្រោយ​មក​បាន​បន្ថយ​រយៈពេល​នៃ​តំបន់​គ្មាន​ការ​ហោះហើរ​នោះ​មក​នៅ​ត្រឹម​២៧​នាទី​វិញ​នៅ​ព្រឹកថ្ងៃ​អាទិត្យ​ ក្រោយពី​តៃវ៉ាន់​បានជំទាស់​ប្រឆាំង។

បើទោះ​បី​ជា​យ៉ាង​នេះ​ក្តី ក៏​អ្នកនាំ​ពាក្យ​ក្រសួង​ការបរទេស​ចិន​លោក Wang Wenbin ហាក់​ដូច​ជា​បាន​លើក​ឡើង​ផ្ទុយ​ពី​នេះនៅ​ក្នុង​សន្និសីទ​សារព័ត៌មាន​ប្រចាំ​ថ្ងៃ​មួយ។

លោក​បាន​និយាយថា«ខ្ញុំ​បាន​ឃើញ​របាយការណ៍​ព័ត៌មាន​ផ្សេងៗ​ដែល​និយាយ​ថា​ចិនបង្កើតតំបន់​គ្មានការហោះ​ហើរ​ដែល​នេះ​ជា​ព័ត៌មាន​មិន​ពិត​ទេ។ អាជ្ញាធរ​ពាក់ព័ន្ធ នឹង​អនុវត្តន៍​វិធានការ​ដើម្បី​ធានា​ឱ្យ​មាន​ការ​ហោះហើរ​ដោយ​សុវត្ថិភាព។

លោក​បន្ថែម​ទៀត​ថា​អាជ្ញាធរ​អាកាសចរណ៍​ស៊ីវិល​ចិន​ នឹង​ចេញ​សេចក្តីព្រមាននិង​ជូន​ដំណឹង​ជា​មុន ប្រសិន​បើមាន​សកម្មភាពដែន​អាកាស​ណា​មួយនោះ។

បើ​ទោះ​បី​ជា​យ៉ាង​នេះ​ក្តី​ ក៏​តៃវ៉ាន់​បាន​ចេញ​លិខិត​ជូន​ដំណឹង​មួយ​ទៅ​ឱ្យ​ក្រុម​អ្នក​បើក បរ​យន្តហោះរបស់​ខ្លួនឱ្យ​ដឹង​រឿង​នេះ​សម្រាប់​ព្រឹកថ្ងៃអាទិត្យ​ដោយ​ប្រើពាក្យ«ការ​បិទ​ខ្ទប់​ផ្លូវ​អាកាស​ ដោយ​សារ​សកម្មភាព​ហោះហើរ​របស់​យន្តហោះ»។

តំបន់​ដែន​នេះ​ជា​ផ្លូវ​ហោះហើរ​ដ៏​មមាញឹកមួយ​រវាងតៃវ៉ាន់​និង​ចិន​ដីគោកនិង​ពី​តៃវ៉ាន់​ទៅ​កូរ៉េ​ខាង​ត្បូង​ក៏​ដូច​ជា​ទៅគោលដៅ​ផ្សេងៗ​ទៀត​ផង​ដែរ៕

XS
SM
MD
LG